Ua lē taunuu le fono faaletausaga sa faatonuina e le faamasinoga e valaau i le aso aso 13 o le masina nei o Aukuso e toe sailia ai se laulau a fono a le Komiti Faafoe e pulea galuega a le Koluse Mumu i Samoa.
Peitai o loo iai le pogisa o nisi sui aemaise le mataupu i le tulaga ua taoto ai nei upufai o le faalapotopotoga ina ua faia le faaiuga a le Komesina o sulufaiga poo le Ombudsman le afioga Maiava Iulai Toma, e leai se fono faaletausaga e taloina ona o tulaga na aliali mai i le lesitalaina o sui fou o le faalapotopotoga.
I se talanoaga ma se tasi o molimau faatuatuaina sa i totonu o le soalaupuleina o le mataupu, ua ia faailoa mai ai e faapea ua iai se maliega ua osia i luma o le faamasinoga o le a filifilia ai e itu e tolu o loo aafia i le mataupu e saili mai ni o latou sui agavaa e toalima a le itu ona faamaonia aloaia lea e le Komesina o sulufaiga ma avea loa i latou ma Komiti e pulea le Koluse Mumu a le atunuu.
“O le taunuuga lena o le matou feiloaiga i le faamasinoga i le Aso Faraile na tea nei (12 o Aukuso 2011)”. O le saunoaga mai lea a le molimau faatuatuaina ua lē finagalo e faasalalau faalauaitele lona suafa.
O le feiloaiga i le faamasinoga na auai sui o le itu a le afioga Muagututagata Peter Ah Him, le itu a Faleao Maka Sapolu, ma sui o le Koluse Mumu aoao faavaomalo a le lalolagi le Red Cross International Federation, lea o loo galulue faatasi i le soalaupuleina o faaletonu ma faatino galuega a le Koluse Mumu a Samoa.
“O sui na sa auai, ae leai se faamatalaga na faia i le faamasinoga e faapea e filifili e le Komesina o Sulufaiga ni sui agavaa ma talafeagai e tauaveina le laulau a fono a le Komiti Faafoe”. O le isi lea finagalo o le molimau na ia teena ai finagalo o le Komesina o Sulufaiga o loo faasalalauina i se tasi o nusipea o loo ia ta‘ua ai o ia e iai le pule e filifilia ai sui o le Komiti Faafoe ona ua lē faia se fono faaletausaga.
E tusia lenei lipoti e lei maua mai le maliega aloaia i le va o itu e tolu na faia i luma o le faamasinoga i le Aso Faraile, 12 o Aukuso a o lumanai le Aso Toonai 13 o Aukuso lea na tuu e usuia ai le fono faaletausaga ua lē faataunuuina.
O lea maliega e ta‘ua o le consensual agreement, ua malilie ai itu e tolu e saili mai e latou o latou sui e toalima ona momoli lea i le Komesina o Sulufaiga mo lana sainigalima e faamaonia ai ia sui e avea ma Komiti Faafoe mo le taimi nei.
O le lesitalaina o sui fou o le Koluse Mumu na mafua ai ona gugulu le toatele ma aliali ai nisi faiga faapiopio i tua a nisi o sui o le faalapotopotoga ma mafua ai ona le faia se fono faaletausaga ona ua fesiligia le tulaga agavaa o ia sui fou e avea ai ma sui auai o le faalapotopotoga.
Na faafuasei ona faailoa le solomuli ese o le komiti faavaitaimi sa vaaia le Koluse Mumu lea sa taitai ai le tofa Faleao Maka Sapolu ina ua aliali lea tulaga i le lesitala.
E leai se faamatalaga auiliili na aumai i lea komiti i ni mafuaaga o le faafuasei ona o ese, ae pau le tala o le latou faaiuga lea ua faia a o tālia le fono faaletausaga ua lē faataunuuina.
