E toatolu sui o se Komisi o le a filifilia e silasila i le faaaogāina lelei o eleele faaleaganuu o le atunuu mo atinae tau pisinisi auā se manuia o aiga, nuu, ekalesia ma le Malo i le itu tau tamaoaiga.
O le faamalamalamaga lea a le Minisita o Punaoa faalenatura ma le siosiomaga le afioga Faamoetauloa Dr Faale Tumaalii, o lana matagaluega e fitoitonu i ai le tulafono tau faaofi o le tofia o se komisi e silasila i le faaaogāina o fanua faaleaganuu mo pisinisi, ina ua saunoa e faataatia le tulafono taufaaofi mo lona faitauga faalua, lea na avanoa ai foi ma faipule o le Palemene e saunoa faalauaitele i le tulafono taufaaofi.
I le taatia mai o lea fuafuaga a le Malo o loo faaalia ai e le minisita, o sui e toatolu o lea komisi o le a feagai ma suesuega i totonu i le faaaogāina o eleele faaleaganuu mo atinae tau pisinisi. Peitai sa saunoa le faipule o Faasaleleaga Numera 2, le susuga Papalii Li‘o Ta‘eu Masipa‘u, i lona manatu i tuaa ua fai i lagi le folauga na latou faataoto i le faavae o le atunuu se aiaiga e lē mafai ai ona aiāina e se isi le pule o fanua faaleaganuu, lea e patino tonu lava i matai ma suli o aiga e faasino i ai sea fanua tau Samoa.
O lona finagalo o le tāua lea ia te ia o eleele nei ina ne‘i avea le faatūina o le komisi ma ave ai eleele nei e faaaogā i pisinisi, e afaina ai lona tulaga umia e nisi mai fafo o le a faaaogāina, aemaise lava o le umi o ni tausaga e faaaogā ai i se lisi, ae poo fea o le a tua i ai fanau ma auga tupulaga o se aiga.
O le Minisita o Tupe le afioga Faumuina Faaolatane Tiatia Liuga, na tulai ma faamanino le aano o le fuafuaga a le Malo lea na ia faaalia ai, e matuā leai se agaga o le Malo e pule ese eleele faaleaganuu, ae o eleele o loo silasila i ai le fuafuaga a le Malo o fanua tetele o loo fili e le fue ma laau tetele o le vaomatua ae lē o faaaogāina.
Na faaalia foi e Faumuina e leai foi se agaga o le Malo e mamulu ai le pule o nei fanua, ona e tutusa lelei lava le lagona o le faipule ma lagona o le Malo i le faatāua o aiaiga o le faavae i le faatumauina o le umia o eleele faaleaganuu e matai ma suli o aiga.
O le tauaofiaga a le Palemene i le masina faaiu o le tausaga o le a toe soalaupule ai lenei tulafono taufaaofi i lona faitauga faatolu, ona taoto mai ai lea o se taimi o le a amata faamamalu ai, ma saofagā ai loa ona tofia se komisi o eleele e silasila toto‘a i lenei fuafuaga a le Malo.
O le valusefulu pasene o eleele i lo tatou atunuu o loo umia, o eleele faaleaganuu i le pule a suafa matai o loo faasa‘osa‘o i aiga e fia o le atunuu.
