E to’a 14 le aufaauu a le Iunivesite o Griffith na faatumulia ai le faletalimalo i Acacia Ridge i le po o le Aso Toonai, aso 3 o Tesema. O i latou nei e aofia ai le faletua o Rev Isamaeli o se faafeagaiga EFKS, le faletua lea ia Kuinivia Liaina, faapea lona alo tamaitai ia Serafi Liaina.
O nisi o le aufaauu e aofia ai Jimmy Leilua, Faataape Togitasi, Francella Alofipo-Timu, Eric Alo-Emile, James Tuiluga, ma le tamaitai o Gau.
O lea dinner na maitauina ai pe tusa ma le 400 tagata na auai, o aiga ma uo ma faafeagaiga faapea le lagolago a Samoa i Brisbane. Na iai nisi na teena i le faitotoa ona ua tumu ma utiuti avanoa. Na taitaia e le susuga i le Toeaina ia Ps Andrew Schmidt i se tatalo ma se agaga faafetai i le Atua ua tau lau o le tausinioga.
O le susuga ia Sam Lutelu na fai ma fofoga o le po e faafeiloaia le auvalaaulia faapea aiga uma o le aufaauu.
Na saunoa faapitoa le pule faufautua o le Iunivesite a Griffith, o Suzanne Wilkinson, sosoo ai ma le saunoaga a Faimalotoa John Pale, o le Peresitene o le Leo o Tagata Samoa, i le matagofie o se luitau mo tupulaga a Samoa.
Na matuā faamalieina le aofia ina ua sausaunoa le faletua o Kuinivia Liaina ma ia tolaulauina ai ni lu’i na feagai ma ia a o tauivi ina ia mae’a lona taumafai.
Na ia saunoa faapitoa, “E leai se alofaga o se tasi e faapea mai ai o ia ua matua ma e lē toe aogā ona toe alu i le aoga”. Auā foi o ia o se tasi o tagata matua i le aufaauu, o lea foi ua faauu faatasi ma si ana tama teine.
O lea la e tautino atu, pe e te talavou pe te matua ua 50 ou tausaga pe sili atu foi, o loo iai pea lou avanoa e faataunuuina ai sau miti mo le lumanai e ala i le aotauina.
Na maua foi se avanoa e saunoa ai le Tamaitai Samoa o Glenda Stanley, o ia lea o le sooupu a le Iunivesite ma fanau aoga a le Pasefika, ma faaiu ai i le siva tele e sami ai le soifua manumalo ina ua faapaleina i tikeli ma faaailoga faapitoa mai le Iunivesite.
Na taualuga i le siva Samoa a le tamaitai o Grace Brown a o mālie mai le musika a le faaili matagofie a le Simply Savai sa faafiafia i lea po.
