Maoae le sao o Tama Samoa i le Manumalo o le Sifi Super 15
E tusa ai ma faamatalaga sa faasalalauina muamua e le alii Faiaoga o le Manu Samoa, ma le Iuni lakapi a le atunuu e faapea, o le toe filifilia o le alii kapeteni, Mahonri, ona ua matua lona soifua.
O le faalauteleina o lea faamatalaga, o lona uiga ua lē toe iai se isi malosi o ia te ia e faatino ai le taaloga, ma lona tulaga faakapeteni i le Manu Samoa. Peitai o le maitau i ai i taaloga sili ona tāua a le Sifi, na mafua ai ona ausia le siamupini ma le siitia o le tulaga o lana taalo i lenei tausaga, sa faamaonia ai le tele o le sao o lenei tamafanau a Samoa. O lana taalo sa ia faatinoina i se tulaga matautia ma le maualuga tele, ma sa avea o ia ma faataitaiga pito i luma o tama taaalo uma o lea au ma le kalapu.
E le gata i lea, o ana gaioiga uma sa faia i taimi uma sa taalo ai, sa ia tatala ai se avanoa, pe sa ia amata mea i gaioiga ma osofaiga tāua tele a lana au, ma fai ma faitotoa e kolosi ai le laina sikoa, ma manumalo ai.
O se ata mautinoa lea, ua ia toe faatepa ai le Iuni Lakapi a Samoa, le Faiaoga ma le Pulega o le Manu Samoa, e lei taitai uma lona malosi, peitai ua toe faafouina lona malosi faataulealea, faatama taalo lakapi.
E talu ona amata taalo Mahonri i taaloga uma a le Super 15 i lana au le Sifi a Waikato, o le tama taalo o le Manu Samoa, sa ave i ai le faamuamua a le Faiaoga, ae lona lua le sui o le autele a le Olopeleki, ua leva ona taalo ai.
O le isi lea tulaga e mautinoa lava sa faamaonia ai le toe faatoatoaina ma le faamoemoeina o lenei alo o le atunuu, i lona tulaga. E le gata i le malosi o le tino, a ua toe faaopoopoina foi ona agavaa i le mafaufau e faatino ai gaioiga, ma ana faaiuga fai i totonu o le malae i taimi o taaloga.
O se tasi o vaaiga ma tulaga sa mataina tele i le taaloga ma le Malie a Aferika, sa maitauina ai foi le maualuga ma le malolosi o tama Samoa, sa auai ma filifilia i lea taaloga tāua. O nisi foi o i latou sa tauina le taua, ma sa muai kolosia le laina, ma toe sikoaina sikoa na siitia ai ai ma siamupini ai le Sifi mo le 2012, mo le uluai taimi.
O le alii o Tim Nanai Williams, Sonny Bill Wiliams ma le isi foi sui o le Manu Samoa, le susuga ia Kane Thomson faapea Lelia Masaga, o alo uma nei o Samoa, sa kolisia le laina a le Malie ma sikoa na avea ma faamalosiau, ma saga malolosi atili ai le Sifi.
E lei gata ina sa sikoa, ae sa maoae lava foi la latou faatinoina o o latou tiute ma gaioiga i totonu o le taaloga, sa fai ma ki o le manumalo ma le siamupini o le Super 15 2012.