Leai lava se tasi ua molia

E oo mai i le asō e lei iai lava se tasi ua molia i le maliu ai o le alii talavou o le afioaga o Leone ma Vaimoso lea na tulai mai i tua o le maketi o i‘a i Savalalo i le lua vaiaso talu ai.

E lē iloa poo fea tonu ua oo i ai suesuega a le Ofisa o Leoleo ua tuai ai ona molia se isi ae ona pau le faamatalaga a le sui sooupu o le Matagaluega, o lea e faasolo faatalatalanoaga, ma o ai lava e maua na faia le osofaiga ua maliu ai lenei alii o ia lea e molia i le fasioti tagata faamoemoeina.

O Holani Toso na fagogota ma nisi o alii o le vaa fagota e faigaluega ai, ma o le mae‘a la o le faiva o lea aso na agai ane ai i autafa lava o le maketi o i‘a ma na faapea mai leoleo o iina sa fai ai se inuga pia a ia alii.

O lipoti ua oo i leoleo faapea a o fai ai le inuga a nei alii na oo atu ai se isi potopotoga o taulelea ma na tulai mai ai ni feeseeseaiga ma fufusu ai loa itu e lua. O le taimi lea na ta‘ua e leoleo na tamoe ese ai loa Holani ma tuliloa e nisi ma na agai sa‘o lava i le sami.

O le molimau a i latou sa vaaia le fusuaga na taumafai lenei alii e ea a‘e mai i le sami mo se ea e mānavaina ae tau ai ma maa i le ulu.

O le ripoti a leoleo, o loo iai manu‘a tuga i le ulu o lenei alii ae e lē mafai ona fai mai se faamatalaga maumaututu talu ai o loo talia se fomai faapitoa e faia le suesuega ma se taotoga o le tino maliu o Holani ona faatoa mafai lea ona fai mai se lipoti maumaututu o ia manu‘aga.

E tatau ona manino pe o manu‘a o lona ao na mafua ai lona maliu pe na mafua ona ua malemo. O lenei alii e mai i le afioaga o Leone ae na mau paolo i Vaimoso.

O lea na ta‘ua e leoleo o loo faagasolo atu tagata e faatalatalanoa ae moomia foi le fesoasoani a le mamalu o le atunuu sa iai i le taimi lea ina ia maua ai poo ai tonu lava na faia le osofaiga na lavea ai le ao o lenei alii i maa.

Le alii ua maliu o Holani Toso (pito agavale) mai Leonē