Le vaetama

E tele mafuaaga ma pogai e vaetama ai fanau a matua Samoa. Atonu i le mafaufau o le palagi, e pau lava le mafuaaga e vaetama ai se tamaititi Samoa, ona ua le mafai e matua ona tausi i le itu faaletino.

Peitai e ese mai le pogai na faia ai le maliega a le ulugalii o Pale ma Vao ma le ulugalii o Ulu ma Tala ina ia faia sa latou vaetama.

O Pale ma Ulu, o se auso, peitai e eseese o la tina e ui e tama faatasi i le toeaina o Vae lea ua maliu. E lei ola faatasi ae foi Pale ma lona uso matua o Ulu, o lea sa seasea ai mafuta nei tama ma sa leai foi ni faia mafana ia i laua ma a la fanau.

Peitai o Ulu o se tamaloa e malosi lona tamaoaiga; o se toeaina faipisinisi sa fai ana pasi ma nonofo ma lona aiga i se nuu o le talafatai o Apia. O si ona uso o Pale, e nonofo ma lona aiga i se nuu maotua.

Na logotala Ulu e galue lona uso o Pale o se avepasi, ma o se tagata e galue faamaoni tele mo pule o loo faigaluega ai, ona mafaufau ai lea o Ulu, e lelei pe ia faafesootai lona uso, e sau e galue mo ia.

Na ia faapea ifo foi, ‘atonu o se avanoa lelei foi lea e masani ai ma faifai mea faatasi ma lona uso, e ui sa lei ola ae faatasi. Na taulau lava le mea na manao ai Ulu, ma na malie Pale e faamavae ese mai lana galuega na galue ai, ae alu ane e fealuai i pasi a lona uso.

Sa matua fiafia Ulu ma lona toalua le fafine o Tala, ua sao le la faaiuga e aumai Pale e fealuai i le isi a la pasi, aua ua amata ona ila si tamaloa o Ulu i le le faamaoni o tagata ese sa ia faafaigaluega.

Peitai talu ona fealuai Pale i le isi pasi fou a Ulu, ua matua tele tupe e maua i le pisinisi, aemaise ai le matauina e Ulu ma Tala, e lē galue Pale e na o se tagata faigaluega, ae galue o se tagata o le aiga, i le auala na ia tausi lelei ai ma faamaopoopo mea o le pisinisi a lona uso.

Na talanoa le ulugalii o Ulu ma Tala, ua matua faamalieina i laua i le tautua a Pale, ae i le taimi e tasi, e tau polepole foi le tamaloa o Ulu, i alu a‘i alu a‘i le latou mafutaga, tei ua toe mafaufau lona uso e fia see atu i se isi galuega, ma toe motusia ai foi le la mafutaga lenei ua matua mafana, lea sa lei iai muamua, ona o Ulu e toatasi lava ia i le faletama a le toeaina o Vae i le tina o Ulu, a o Pale e iai le isi ona uso.

Ona talanoa lea o le ulugalii ma iu ai le la faaiuga, ua tatau ona iai se mea taua e faapine lelei ai lenei mafutaga. Fai mai le manatu o Ulu, ‘Ou te le toe manatu ia Pale o se isi o lau aufaigaluega, ae o lou lava uso moni, o lea e ma te galulue i le ma pisinisi.’

Na aami loa e Ulu ma Tala le tamaloa o Pale ma lona toalua, si fafine matamuli o Vao, ma faailoa ai le manaoga o Ulu ma Tala, pe faamata e malilie Pale ma Vao, ae aumai le la tama pepe lea e iai, e vaetama mai mo laua e la te tausia, e faapine ai le latou mafutaga. O le manao o le tamaloa o Ulu, ia alu sao ana tupe, e tausi ai lana fanau, ma se tasi o fanau a si ona uso.

Na fetagisi le ulugalii o Pale ma Vao, aua o se taimi muamua lea ua faatepa ai e se tasi o la mafaufau i se mea faapea, lea sa le taitai ona kolosi i ai o la mafaufau, e faamatuu ese atu se tasi o le la fanau e tausi e se isi tagata.

Sa vave ona malamalama le tamaloa o Pale i le uiga o le manaoga o lona uso, ma i lona loto foi sa ioe i ai, peitai na iloa e Pale le matua mafatia o si ona toalua, aua ua tagi tautala le fafine o Vao fai mai, ‘a ave ese atu lana tama, e tusa lava lea ua ia tipieseina se isi ona itutino.’

Na lei maua se tasi a le aiga i lea afiafi, ona talosaga lea o Pale ia Ulu ma Tala, e tuu mai se taimi sei la talatalanoa ai ma si ona toalua, ona toe fai ai lea o se latou tala.

Na alu lena po o tagi si fafine o Vao, pe a mafaufau atu i lenei faaiuga o le a ono le toe vaai atu ai i si ana tama pepe, le tamaitiiti o Ese.

Na toeitiiti lava atoa le vaiaso o talanoa e le ulugalii o Pale ma Vao lenei mataupu, ona iu ai lava lea ina malie toai si fafine e faatea si ana pepe mai lona suasusu, ae sauni e momoli i le aiga o le uso o lona toalua ma le latou aiga.

O le iai o se isi faaopoopoga laitiiti i totonu o le aiga o Ulu ma Tala, sa avea o se fiafiaga tele i le fanau a le ulugalii, aua ua matutua teine ma faigaluega, ae o lea ua toe sagai uma ane e tausi le latou pepe.

Ua tuputupu ae nei le tamaitiiti o Ese i totonu o le aiga faipisinisi, ma o se olaga manuia i le itu faaletino sa ola ae ai. I na taimi uma sa matua mamafa le tulafono a le ulugalii i le la fanau atoa ma soo se tasi sa latalata ane, e matua sa taputapu se tasi ona fai se tala ia Ese a o tuputupu ae, faapea e ese ni ona matua.

O le talosaga malosi foi lena a Ulu ma Tala ia Pale ma Vao, ia alolofa e aua nei o la taumafai e tau i le la tama le latou sootaga. E ui ina faigata lenei manaoga, ae sa malamalama lava Pale ma lona toalua.

Ua faasolo lava ina matua le tama o Ese ae na te lei iloa lava e le o ia o se tama moni a ona matua. Peitai sa matauina e Ulu ma Tala uiga o le tama, e ese le fiafia e alu e talanoa pe fesoasoani foi i le tamaloa o Pale, o nisi foi taimi e iloa ane ai e le aiga, e masani ona afea e Ese le fale o le aiga o Pale ma Vao ma le la fanau, pe a tuua ana aoga, ma tafao ai lava faatoa toe vilivili ai lana uila i le latou fale.

O le popole tele o Ulu ma Tala i uiga nei o le tama o Ese, na tetei ai si ulugalii o Pale ma Vao, ua la maua le tala ua ave e le aiga o Ulu ma Tala si tama o Ese e faanofo i Niu Sila ma faauma ai ana aoaoga. Sa faanoanoa tele Pale ma Vao i lenei tala, aua e ui lava sa le mafai ona iloa e Ese o laua o ona matua moni, ae i le ulugalii, na lava lo la vaai atu i ai i aso uma, e mafanafana ma fiafia ai o la loto.

Ma na avea foi le lē toe iai o le tama o Ese i lona aiga, ma mafuaaga ua amata ai lava ona tau le toe tele foi ni fesootaiga a nei aiga e lua, ona ua tau le fiafia Pale ma Vao, aua sa iai lava lo la manatu, e tusa pe le iloa e Ese le latou faia, ae maimau pe ana faailoa mai e Ulu ma Tala le taimi o le a aveese atu ai Ese ma Samoa, sei faamavae lelei atu i ai nei le toe iai se isi avanoa e la te toe vaaia ai le tama.

Ae paga lea, e foliga mai na le taulau atoa le fuafuaga na mafua ai ona aveese faatopetope atu Ese ma Samoa, aua e lei umi ona masani le tama ma tagata eseese i Niu Sila, ae faamatala loa e se isi i le tama lona tupuaga moni, ma o se tala na matua faateia ai le tama, ma na iloa lelei e le aiga le tele o le suiga o le tama ia latou.

Na iu ina faaipoipo Ese ma ua fai foi lana fanau, ma ua matua faamatalatala lelei e le tama i lana fanau le tala atoa o lona ola ae i totonu o se aiga e ese mai lona aiga moni.

O se tala na matua momomo ai loto o Ulu ma Tala ina ua faalogo ua toe amata ona agaigai le la tama i lona aiga moni, ae ua faigata se isi gaoioiga, aua ua matua le tama, ua leai se malosi tele ia Ulu ma Tala e toe taofi ai Ese mai ana faaiuga ua fai.