“O se gaioiga sili lea ona ogaoga ua outou faia’…Faamasino
O le molia o nisi o matai, ma nisi o faletua ma tausi o le aulotu a le ekalesia EFKS a Tanugamanono i le lē usitaia o le faaiuga a le faamasinoga o fanua ma suafa, o se mataupu ua fai si umi o taatia i le tulafono lea ua lua tausaga talu ona tulai mai lea gaioiga ae na faato‘ā lau le faaiuga a le faamasinoga i le Aso Lua 15 o Oketopa 2013.
O se tasi o tamalii o le nuu ma le aulotu sa seei i le tofi faipule o le Palemene le afioga Anauli Pofitu Fesili sa molia i le lē usitaia o le faaiuga e vase tonu le tuaoi o le fanua o loo iai le malumalu ma le maota o le faifeau ma le fanua o le aiga o le tina o Afu Faumuina ma le paaute ma le niu.
Faaalia i le fofogaina o le mataupu lenei na aveesea ia vaega (paaute ma le niu) ina ua fai le galuega a le aulotu. O se isi lea o vaega o taualumaga a le faamasinoga i le faamasinoga a lea aiga ma le aulotu, ona o le fanua lea na taualuga lava lea mataupu sa feteenai ai itu e lua, i le faatino e nisi o le aulotu ma le nuu o se gaioiga solitulafono na susunu ai le fale o le aiga o Afu Faumuina, ma faaleaga nisi o a latou meatotino e pei o taavale.
Na molia nisi o le nuu i lea gaioiga ae molia isi o le aulotu i le lē usitaia o le faaiuga a le faamasinoga o fanua ma suafa, lea na ioe i latou i le moliaga a leoleo ma ua salatupe e ta‘i selau tala a le tagata e toatasi. O le aiaiga a uma galuega o le Aso Lua na tea nei e lei totogia ua totofu uma i le falepuipui mo le ono masina.
O i latou ua faamaonia moliaga e aofia ai Anauli Pofitu Fesili, Tavui Iose Grey ma lona toalua o Maeva, faapea Sinave Lima ma Tumaalii Peni. O le faletua o Anauli o Leata, na molia foi ae ua toe faaui i tua e leoleo le moliaga, ae peitai sa lē oo atu i le faamasinoga ina ua valaau le mataupu i le lua vaiaso ua mavae, ma faatonu ai se tusi saisai e sailia ai.
O le tusi saisai foi lea na faatonuina e saili ai ma Tumaalii Peni lea ua faamaonia lona moliaga. O le tausaga ua mavae na iloioiloina ai e le faamasinoga maualuga se tagi a le aiga o Afu Faumuina mo se taui o a latou meatotino na faaleagaina. Na manumalo ai le finau a le aiga ma faatonuina ai e le faamasinoga nisi o matai ma sui o le nuu e totogi se vaegatupe e silia i le miliona tala i le aiga. O loo apili ei latou na faasaga i ai le faaiuga le mataupu ma o le masina fou e suesueina ai e le faamasinoga o talosaga apili le court of appeal.
O le faaiuga ua sala tupe ai nisi o le aulotu EFKS a Tanugamanono sa faaolooloma‘au le latou loia o Rosella Papalii i le faamasinoga pe ua talafeagai ona faapafala se faaiuga a le faamasinoga e aunoa ma se faamaoniga o solitulafono lea e ta‘ua o le discharge without conviction, peitai na iloa atu le lē talia e le faamasinoga o le talosaga ina ua lulu le ao o le tamaitai faamasino a o faia le folasaga faaiu a le loia sa tulai mo sui o le aulotu.
Na saunoa manino le faamasino e matuia le solitulafono na faia ei latou aemaise o le aveesea o pine sa faatonuina e le faamasinoga o fanua ma suafa e fua tonu i ai le tuaoi. Sa ta‘ua e le loia mo sui o le aulotu o Anauli o loo toe sauni i le palota e sailia ai tofi faipule o le Palemene ma o le isi mafuaaga o le talosaga ina ne‘i faamaonia ma faia se faasalaga ona afaina ai lea o le faamoemoe o lea tamalii.
