O le aso lenei ua leva ona moemiti ma taulai uma i ai moomooga o le tamaitai talavou lalelei o Simone. E na o le pau lava lea o le afafine o le tamaloa o Peni ma e iloa uma e tagata o le nuu ma le ekalesia le leaga o le faiga o lenei teineititi e lona tamā, mai lava i lona laititi, aemaise foi ina ua maliu faafuasei si ona tina.
Ma na iloa lelei e le teine, o le aso o le a faaipoipo ai, o le a matuā matagofie mea uma i lona tapenaga, aemaise na te iloa lava, o le a faatino uma e lona tamā mea e manao e fai i lana faaipoipoga.
Ua o ane uma lana aumea mamae i le potu o le faletalimalo na totogi faapitoa e le tamaloa o Peni e fai ai teuga a lona afafine ma lana laina.
O loo talanoa solo le teine o Simone ma ana uo ma inuinu a latou ipu uaina, a o galulue le tamaitai teuulu ma le alii faafafine o loo ia faia vali a teine.
Ua mafaufau le teine i le faagasologa mai o lona olaga, e na te maua uma lava soo se mea e manao ai mai lona tamā. O lea foi ua oo lava i lona aso tele, ua atoatoa uma tapenaga a si ona tamā mo ia. Ua o mai uma tagata o lona aiga sa manao ia iai, o ana uo uma mai aso o aoga ua o ane uma foi.
Pau lava le mea lea e iloa e Simone o lea e lei matuā mafolafola lelei, o le la faiā ma lona tinafai, le fafine o Alisa, lea ua nonofo nei ma lona tamā.
Peitai e lē o se mea o mamafa tele ia Simone, auā e mautinoa lelei e le teine, poo ā lava ni taumafaiga a le fafine o Alisa e tipi i lalo le tele o nisi mea na manao le teine ia fai i lana faaipoipoga, e lei taulau Alisa, auā ua faatino uma lava e le tamaloa o Peni manaoga o lona afafine.
E oo foi la i le vili ane a le fafine o Alisa i lena taeao, e siaki le teine poo lelei mea uma o ana tapenaga, sa pei e aamu i ai le teine ma le faiga o ana tala i ana uo o loo faagasolo le faiga o o latou lavalava. E lei umi a ona talanoa le teine i le telefoni i lona tinafai, ae toe tuu i lalo.
<!–nextpage–>
“Ua ta leiloa lava poo le ā le mea e soona mamafa ai fua i lona finagalo le faiga o a tatou teuga,” o tala ia a Simone ma ‘ata‘ata aamu, a o ioe uma ane i ai ana uo o loo i totonu o le fale.
“Ai o popole si ou Mamasita, ne‘i uma lau faaipoipoga e alu ese atu ma ave uma tupe a lou Daddy ae valiano ai ia,” o le faaopoopo ane lea a le tamaitai uosili o Fia, ona toē lea ma fai latou tala aamu i le fafine.
Na pau le itu lea e alu i ai le mafaufau o Simone, ua tuai ia ona amata lana faaipoipoga ma se‘i faamae‘a atu, ona fesagai loa lea ma si ona tamā e faasino ane meatotino uma ia o le a uili ane e lona tamā ia te ia.
Na fesili le isi teine aumea mamae ia Simone, poo ā uma ni uiga o lona tinafai e lē fiafia ai. Na tali Simone, “Oi, i le amataga lava a o tau sue mai se avanoa o le auntie i lo‘u tamā, oka se suiti mai ia a‘u. Ae lei umi lava talu ona uma ona faaipoipo, ae amata loa ona ou vaaia ona uiga e pei ua taumafai ia vavae ese le alofa o lo‘u tamā mai ia te au.”
Ua faaauau pea tala a le teine, “Ae tou te iloa la si mea mālie, e leai se avanoa na ou tuua i ai. Na iu a ina ou faasa‘oa i le isi aso. Na ou fai i ai, ‘Vaai oe Alisa, poo le ā lou taumafai malosi i fea ia lelei le ta faiā, e lē taitai ona e suia ai lo‘u tina moni. O au fautuaga uma foi na e tau faaofi mai i le auala e tatau ona faasoasoa ai a‘u tupe, e matuā leai lava sau pisinisi i mea e faaalu ai ma tupe ma lo‘u tamā. Pau a le mea e tatau ona e faia, o lou taumafai e faafiafia lo‘u tamā ina ia fiafia le lua ulugalii, a o a‘u e te lē faia mai ni tonu o lo‘u olaga, o lo‘u tamā ma te feagai’.”
E fai lava tala nei a le tamaitai o Simone ma taliē faatasi ai ma ana uo.
Ua ia faamatala uma i lana aumea mamae le mālie o lona vaai atu e foliga o loo popole le fafine o Alisa i le tele o le tupe lea ua alu i le tapenaga o lana faaipoipoga, ae leai lava ma sina ona tamai popole i ai.
“Na pau lava lana mea e fai o le saini o siaki ma tuu mai i le keige, pe la o ni ana tupe, o tupe a lo‘u tamā!”
E lei uma lelei le tala lea a Simone, ae toe tatagi foi lana telefoni feaveai. Na tali e le teine, ma na vaaia e ana uo le faasesepa o mata o le teine a o talanoa i le telefoni, ona latou iloa foi lea, o le fafine o Alisa lea e vili ane.
<!–nextpage–>
Ua geno ane le tamaitai i ana uo e aua le pisa, ae o lea ua tago mālie ifo ua oomi le ki e faaleotele ai le la talanoaga ma lona tinafai, ina ia mafai ona faalogologo uma ai le latou vaega.
“Ia o ā la ni lua fuafuaga mo le lua honeymoon, o fea e te lua honeymoon ai?” o le fesili ane lea a le fafine o Alisa. “Ua lua mafaufau i ni lua galuega e te lua fia faigaluega ai pe a fai le lua aiga? Auā o lena e te iloa e lē telē se totogi o Tommy i lana galuega lea e iai nei, e tatau lava la ona e taumafai e fuafua lelei mea e faaalu ai au tupe ina ia sefe se lua tupe auā le lua aiga, o lena o le a e lē toe toatasi, ae ua lua toalua.”
O le mimita tele o le tamaitai o Simone i ana uo ia e faalogologo ane, na faapea atu ai, “Alisa, aisea e te popole ai fua, o lea ou te lē o popole lava a‘u ia? Ua leva ona fai mai Dad e ma te nonofo i le fogafale aluga o le fale o loo iai le pisinisi, ma o lea foi o le a toe faaluaina mai le telē o lo‘u alauni. E leai la se mea o le a soona vevesi ai fua lou mafaufau, faitalia lava Dad ma faatulaga uma mea mo le ma aiga.”
Ua tuu i lalo le telefoni lea na fai, ona toe faasesepa foi lea o mata o Simone i ana uo, e ta‘u atu ai lona ‘ino‘ino tele i le fesootai soo ane o le fafine o Alisa.
Ua toe itula lea e totoe o loo fai ai teuga a le tamaitai faaipoipo ma ana uo sili, ma ua toe toatasi lava le teine o loo tau faauma ana teuga, ona sagai ane loa lea o le ‘au teuulu ma faamatagofie foliga, e galulue faatasi i teuga a Simone lea e faatulaga e mulimuli i ai, ina ia mautinoa e atoatoa lelei le faalaleleiina o le pele e toatasi a le tamaloa o Peni.
Ua mae‘a uma teuga ma ua faatali mai foi i fafo le limo uliuli e momoli faatasi ai le tamaitai faaipoipo ma ana aumea mamae i le falesa. E taunuu le limo i luma o le falesa pe toe luasefulu minute amata aloaia le sauniga. Ona fai lea o le tonu, e agai atu tamaitai i se potu o loo i tua ane lava o le falesa, e tau ina mapu teisi i ai, se‘i ta tonu le taimi ona faatulaga loa lea o le latou savavali mai i totonu.
Ua matagofie le teuteuina atoa o totonu ma fafo o le malumalu, ua atili ai le mimita o le tamaitai o Simone a o tilotilo solo aemaise foi o lea ua iloa atu le matuā tumu mai o totonu o le falesa, ae o lea lava e gasolosolo atu tagata.
Ua toe lava o ni nai minute faagasolo le savali i totonu, ma ua logo ane foi o lea ua faatali i le isi itu si ona tamā e momolia o ia i totonu. Ae matala atu loa le faitotoa o le potu o loo iai tamaitai, ma tuu atu e se tasi se teutusi samasama i le tamaitai uosili o Fia, e faaoo atu ia Simone.
<!–nextpage–>
O le mea muamua lava na tau i ai le mafaufau o Simone ina ua amata ona tatala le teutusi ma ‘ata‘ata, atonu o se isi o a la uo ua lē auai ane i le faaipoipoga lea ua lafo ane sana faamanuia. Ua tatala le teutusi ma se‘i a‘e i fafo le tusi, ma e lei atoa se minute na fegasoloai ai mata o Simone e lau vave le tusi, ae faateia le fale atoa i le palasi ifo o le teine mai le pito sa tu ai, ua faō i luga o le kapeta ma tagi faataitaiō. Ua laga ane ana uo ma taumafai e faatoafilemu le teine, ae ua matuā faataitaiō ma saa solo ona vae.
Na lagona lelei mai i totonu o le falesā le faataiō a le teine, ona tamoe ane lea o le alii faifeau e fia iloa le mea ua tupu. Na taotaotua ane ai ma le tamā o le alii faaipoipo, ma o se vaaiga uigaese na latou vaaia i lea aso, ua toe matagā uma teuga a le tamaitai sa fai.
O lona ofu silika paepae ua palapalā solo i le mea lea e saofai ma saa solo ai ona vae, ae o le ulu sa aulelei le teuteuina, ua toe maveuveua ma matagā i le soona vau e le teine a o faataiō. Na vaaia e tagata o loo uu e Simone se laupepa, ma o le tusi lena sa momoli ane e se tasi ia te ia.
Peleina Simone,
Ia e malie i la‘u tala lea o le a fai atu, ae ua toe solofua ma taofia lau faaipoipoga. Ina ua uma le ta talanoaga i le telefoni, ona ou alu lea se‘i o ma talanoa ma si au uo o Tommy, ma faamatala uma ia te ia le sa‘o o mea uma lava nei e te lē o iloaina.
Ma ina ua uma le ma talanoaga ma Tommy ma ua ia iloa le sa‘o o mea uma, ona ia filifili lea ma faapea mai, e lē mafai la ona faaipoipo atu ia te oe, ma o le taimi nei o la ua toeititi taunuu Tommy i Ausetalia.
O le mea lenei ia e iloa, o lo‘u faaipoipo atu i lou tamā, sa faavae uma lava i luga o pepelo; o pepelo a o taumafai e puipui lona igoa tauleleia, aemaise ina ia faafoliga atu ai ia te oe o loo manuia ana meafaitino uma na o loo e mitamita ai.
Ma ina ua ou alofa i lou tamā, sa ou manao e fai mea uma e faafiafia ai o ia, e aofia ai le faatagā faafoliga atu o loo sologa lelei ma olaola lana pisinisi, ae o le mea moni ua leva lava ona gau ma tau se‘i e faletupe, ae o la‘u pisinisi lea na toe faatauina maia le pisinisi a lou tamā. O nei mea uma sa faia ina ia maua ai pea e lou tamā lou alofa mo ia.
<!–nextpage–>
O lea ou te faamalie atu ai, ua lē manao Tommy e te lua faaipoipo, ma e lē oo foi le fuafuaga lea sa e faapea ai e te lua nonofo i le fogafale aluga o le fale o la‘u pisinisi, ma ia e mautinoa i le aso lenei, e leai se faaluaina o lou alauni, ae o le a matuā tipi ese e te lē toe maua se tupe.
Faamolemole, se‘i e logoina lou tamā e ta‘u i ai, ua ou faateaeseina nei o ia mai la‘u kamupani. O lea foi ua ou talosaga i le faamasinoga mo le tatalaina i se taimi vave o le ma faaipoipoga.
Tau ina ia manuia lou olaga Simone. O o‘u moomooga alofa,
Alisa.
