O se lagona lea na faaalia e le alii Faamasino o le Faamasinoga Maualuga, le Afioga Vui Clarence Nelson ina ua faasala se alii e suafa ia Semi Semi, i lona faamata‘u ma ave faamalosi tupe o se taavale la‘u pasese i le tausaga na tea nei.
O lea faato‘ā tolaulau le faasalaga o lea alii, lea ua nofo falepuipui mo masina e ono (6) ona o lana solitulafono ua faamaonia.
Faaalia e le alii Faamasino, e leai lava se isi faasalaga e tatau mo solitulafono faapenei, ma ua taatele ma aafia ai soifua o nisi o loo faia le auaunaga o le feaveai o pasese.
O le alii ave taavale na tagi, na faatu lana taavale e Semi Semi ma nisi alii o ni ana uo i Vaitele. Na feosofi i totonu ma faatonu loa vaega eseese o Faleata e fia agai i ai ma le faamatalaga na fai i le avetaavale, aua le popole o loo iai le $300 (tala) e totogi ai le latou feoaiga o lea po.
Na masalosalo le avetaavale e lē o tautala sa‘o atu Semi ma ua lē ui loa i nisi o auala na faatonuina e agai i ai ae ua alu sa‘o lava le taavale i le ofisa o leoleo lea e i Tuanaimato i Faleata. E lei oo le taavale i le fale o leoleo ae faalogoina e le avetaavale ua pipii atu se mea ma‘ai malulu i lona tuaua.
Na faatonu le taavale e taofi ma aveese ai loa e le alii lenei ma ana uo tupe uma o le galuega a le avetaavale o lea aso. O le faafetai lava a le Faamasinoga o le lē aafia ai o le soifua o le alii avetaavale.
E lei leva atu nei foi se faasalaga o nisi foi alii na faasiilima se isi avetaavale, o se tamā matua i Falelauniu. O le isi avetaavale o se faletaavale i le taulaga na uma ai lava lona soifua i le tausaga na tea nei ma na tuu lona tino i le pusa i tua o le taavale (keli) ina ua uma ona osofai i se agaese e se pasese talavou foi.
Na maua atu si avetaavale lea e se isi foi avetaavale na foi ane i le momoliga o sana pasese o loo tu atu lava le taavale la‘u pasese laitiiti a lea tamā i se pa e latalata ane i le uafu i Mulifanua, agai loa e saili poo fea le avetaavale ae maua ane, ua maliu lea tamā.
Ua tele faalavelave faapenei ua aafia ai avetaavale ma o le faamatalaga a le Afioga Vui, e tatau lava ona iai se auala e mafai ai ona puipuia avetaavale mai ia ituaiga osofaiga.
I le faasalaga o Semi na faaalia ai e le Alii Faamasino, o le galuega a avetaavale, e tāua tele ae o loo tele foi ina aogā i le tunoa o po e lē o toe feoai nisi, o i latou nei e tali mai i le toatele o le atunuu i le moomia lea o auala o femalagaiga. Ae o le fai ma osofai faapea, e lē o se auala lenei e tumau ai le fia auauna o avetaavale i le atunuu.
O le alii lea ua falepuipui i lenei moliaga, ua tele foi isi ona moliaga i le faaaogā o le malosi e gaoi ma ave faamalosi ai meatotino a tagata. O se alii na taofia foi i le toese i Tafaigata ona o isi solitulafono o le faomea ma le gaoi, ma ona fesootaiga ma fualaau faasaina, ma o le faasalaga la lea ua ave i ai e le alii Faamasino o le toe sala foi i le falepuipui mo masina e ono.
O le fautuaga foi ua ave i le mamalu o avetaavale la‘u pasese ina ia faaeteete ma ia mataala i taimi e faatino ai a latou galuega. O le toatele lava ua iai faletaavale ua galulue ai ma o uaealesi o loo tele ina faaaogā ae o loo iai lava taavale o loo feoai ai nisi o avetaavale e lē o faaaogāina ni uaealesi ma o loo faaaogā telefoni feaveai e nisi.
Atonu o se isi auala lea ua faigofie ai ona osofai nisi o avetaavale ona o le leai o se fesootaiga faapea ma faletaavale. O loo iai foi nisi ua aafia o loo feoai solo lava e leai ni faletaavale mautu e faigaluega ai ma maua ai le puipuiga mai isi avetaavale pe a tulai mai faafitauli faapea.
