O le aso 28 o le masina nei o Me e toe foi atu ai le faamalologa tolu masina a le faafeagaiga o le ekalesia EFKS i Moataa le susuga Dr Taipisia Leilua ma le faletua ia Ramona. Peitai ona o aiaiga masani a le ekalesia i le va nonofo ai ma se faifeau ae alu se faamalologa, ua iu ai le filifiliga a le aulotu e ala i se palota na faia e tatala le feagaiga ma le faifeau. O mataupu lava faalotoifale i le va o le faifeau ma le aulotu le mafuaaga.
Ua lua nei Aso Sa talu ona tuanai le filifiliga a le ekalesia na palota ai le to‘a 59 e tatala le feagaiga ae palota le 31 o sui o le aulotu e faaauau pea le feagaiga na osi ma le faifeau. E tele tala feaveai i mafuaaga o lea faaiuga ae o se molimau faatuatuaina na faaalia ai, o uiga faaalia o le faifeau ma ana tala soona lafo ua tiga ai loto o le aulotu aemaise i tulatoa o le ekalesia o matai foi o le nuu le mafuaaga. E lei maua se finagalo o le faifeau le susuga Dr Taipisia ona e tusia lenei lipoti o loo malaga i fafo ma lona faletua. Ae o le Aso Sa talu ai na feiloai ai le susuga i le toeaina o le Pulega ma faifeau ma o latou faletua ma le aulotu ma faailoa ai e le toeaina le susuga Peteru Tone, e alolofa le ekalesia e faamagalo ni sese o le auauna a le Atua, ae ia toe foi atu le faifeau e faaauau le galuega.
Peitai na faaalia e se molimau faatuatuaina o se sui o le aulotu, na teena lea finagalo o le toeaina ona o le talitonuga o le aulotu, ua mae‘a ona faatino le latou filifiliga, ma o le iuga lava lea e lē toe suia. E iai ni lagona o nisi sa lagomia i le faaiuga ua taunuu i ai le filifiliga lea na mafua ai ona feaveai i luga o auala o fesootaiga televavave ni lafoga a nisi o tupulaga o le ekalesia ma aliali ai foi le lē fiafia o se isi sui tamaitai matua i le mae‘a o le sauniga taeao o le Aso Sa na faia ai le feiloaiga ma le pulega.
E tusa ai ma molimau faatuatuaina na ta‘ua ai o i latou uma ia na faia i ai se finagalo o le nuu ma faasala ai i le taitolu selau tala. O se tina matua o le ekalesia ua 86 tausaga o le soifua na faasala ai foi ina ua pisa lea tina ma faaali ni ona lagona lē fiafia i le faaiuga ina ua ta‘ape le sauniga lotu na oo atu ai le susuga i le toeaina o le pulega ma faifeau e faia le faatoesega ma toe ave le tuualalo ia toe foi atu le faifeau.
O le faaiuga o le masina nei e pei ona faaalia e se molimau o le a tatala ai le feagaiga ma toe avanoa ai le ekalesia EFKS i Moataa mo le faia o se latou filifiliga poo ai se isi leoleo mamoe o le a latou osi feagaiga e tausia ma fafagaina agaga o le ekalesia.
