O le upu moni e lē o toe taugofie ni galuega tetele e pei o faleaoga ma malumalu o ekalesia auā o nei aso ua maualuga le tau o le soifuaga auā ua siitia foi tupe maua a tagata mai galuega ma pisinisi o loo tausi ai le soifuaga o aso uma ma totogi pili ma fai faalavelave masani o le atunuu. Peitai o le molimau lava ia i le galuega o le Malumalu Katoliko o le Matagaluega i Apia, e lē taugofie pe a fua i le fausaga o loo fausia ai.
O fausaga o malumalu o aso ma tausaga ua mavae e fau fuafua i fausaga o malumalu tetele faapea o le ekalesia Katoliko i le lalolagi. O le molimau a le afioga Patele Ricky Bernard o le tausi matagaluega a Apia ma o le ‘agai o tupu’ o loo nafa ma le fausia o le Malumalu, e lei maua se faamaumauga i lenei taimi o se tupe ua faaalu, peitai ua lē taunuu fuafuaga sa iai muamua e umusa i le masina nei o Tesema. O le saunoaga a le afioga Patele Ricky e faapea o le faaiuga o Me o le tausaga fou 2014 e faatoa mae‘a ai le Malumalu.
O le manaomia o le fesoasoani tau tupe mo le galuega ua faaalia ai e le faletua o Epi o se sui o le komiti o le galuega, o le matagaluega a Aukilani i Sisifo o le ekalesia Katoliko i lea vaega o Niu Sila ua muamua taunuu mai le latou meaalofa tupe. O le po siva na faatino e le matagaluega e pei ona faaalia e le failautusi o le komiti suetupe le faletua o Tauilo Olaaiga, na maua ai le seleni ua foai atu mo le galuega.
O le molimau a le failautusi na taunuu atu loa le tusi valaau o le afioga i le taitai Matagaluega saili loa se auala e mafai ona tuufaatasi ai se meaalofa.
O le aao mafola o tagata o le matagaluega faapea uo ma ē masani aemaise o aulotu na maua ai le seleni ua tuuina atu mo le galuega. O le leo o le faafetai mai sui o le komiti o le galuega o le malumalu na molimoli i le aumalaga aemaise foi o le fetalaiga Legaoi Opeta sa fai ma fofoga o le afioga Patele Mikaele ma le aumalaga.
Sa iai se sailiga tupe sa faia i se taimi e lei mamao atu o lenei tausaga i le faamoemoe e fesosoani i le galuega o le malumalu. O lea sailigatupe o se koneseti o pese faaopera sa ofoina mai ai e nisi o alo o Samoa e lelei i pese faaopera le faia o se koneseti. Sa fesiligia le faletua o Epi pe ua taunuu atu se seleni mai lea faamoemoe, ae o le tala mai a le faletua e leai. “O le foai muamua lava lea ua oo mai”, e faasino le finagalo o le faletua i le foai a le Matagaluega a Massey.