E lē o faigofie ona talia e le lalolagi o aiga, uo ma ē masani o le susuga ia Jerry Collins le tala ua faaiuina ana galuega ma lenei olaga. E lē gata i le lio lea, ae o le lalolagi o tama taaalo i le taaloga lakapi i soo se tulimanu o lenei kelope.
E tau talatuu mai foi le lio lea i le toatele o tagata o le lalolagi sa fai Jerry Collins ma fetu pupula na taulai i ai le latou vaai i taimi o taaloga a o iai o ia i le faatinoina o ona tiute o se numera 6 logologoa ma le tautaua mo le Olopeleki, aemaise ai foi o isi ‘au i atunuu i fafo, e oo lava i le taimi nei o loo taalo ai i se tasi o kalapu i Falani, lea lava ua faaiuina ai lona ola i totonu o eleele o lea atunuu.
Na matuā faateia le faalogo ina ua pa mai le tala ma na leai se isi e silafiaina Jerry na lei lagona le faanoanoa, misialofa ma le tele lava o le mau fesili pe aisea. I tala i mea tutupu o le lalolagi, na numera tasi lava le tala e uiga i le maliu faafuasei o Jerry ma si ona faletua o Alana i le silasila ma le faafofoga a tagata i le lalolagi atoa i le Aso Toonai atoa ai ma le Aso Sa i luga o televise.
Na oo mai lava i le Aso Gafua ananafi sa faapea ona logologoa i luga o tala o mea tutupu i le lalolagi (world news) ia lenei faalavelave. O iina e iloa ai le tele o soifua sa faapea ona aiāina i le soifua taalo a lenei alii talavou, o se tasi sa faapea ona tulimatai e le toatele i le taaloga lakapi.
E oo lava i faiaoga o aulakapi tetele a le lalolagi e lē talitonu i le tala e uiga i lenei faalavelave. I luga o le upega tafailagi o loo faapea ona gasolo mai ai le tele o feau faamaise, o feau alofa ma feau faamafanafana e ala i tusitusiga ma ata o Jerry o loo faapea ona tuu ane i luga o upega o tafailagi e i latou o loo latou misia lenei alo o Samoa.
O le a faafefea ona faigofie ona talia le tala pa mai pe a fua atu i le pele o le susuga Jerry Collins i loto ma agaga o le toatele. O lana taalo malosi ma ona uiga tausaafia, o lona lē faailogalanu ma lona lotomaulalo ua fai ai lava ia ma faataitaiga lelei i le tele o tama taaalo loo faapea ona taaalo i soo se taaloga i le lalolagi.
E manatua pea o ia i lona lauulu auā o taimi uma lava e vaaia ai Jerry i luga o le malae, e vali samasama lava lona lauulu o se faailoga lea o lona tauaveina pea o le lanu samasama a Ueligitone o le ‘au sa faapea ona uluai lauiloa ai i le taaloga lakapi. O le maliu faafuasei o Jerry Collins faapea si ona toalua o se tala faamomoi loto i nai ona uso Samoa ma uso Pasefika sa latou taaalo i kalapu eseese i totonu o Falani.
O nisi o i latou nei e oo mai i le taimi nei o loo faapea ona latou faatasitasi pea i le falemai ma siomia le moega o loo taoto ai le afafine o Collins e igoa ia Ayla mo ona togafitiga. O nisi o i latou nei e iai Chris Masoe, Neemia Tialata, Henry Tuilagi ma le toatele o i latou ua lolofi ane ina ua maua lenei tala faavauvau.
O le vaveao o le Aso Faraile i le tusa le ma le 10 minute e tea ai le 3 (3:10am) o le taimi tonu lea o loo ua faamauina e leoleo sa faapea ona tulai mai ai le faalavelave, ina ua so‘a le taavale na malaga atu ai Jerry ma si ona toalua ma le la tama teine e se pasi i luga o le motorway e latalata ane i le nuu o Beziers i le itumalo o Languedoc i ei le itu i Saute o Falani.
O Jerry sa i le nofoa i tua ma si ona afafine ae o lona toalua o Alana sa ia aveina le taavale, ma na maliliu faafuasei ai lava ae se‘i vaganā ai si a la tama e na o le 4 masina le matua sa faapea ona faanatinati atu i le falemai mo le togafitia i ni manu‘aga tuga sa feagai ai ma ia.
E oo mai i le taimi nei o loo taumafai pea leoleo e saili tonu le mafuaaga o lenei faalavelave ma o se taimi o muamua o le a mae‘a ai a latou sailiiliga o loo faatinoina pea, ona faatoa faalauiloa mai lea o le mafuaaga moni. O Jerry sa fanau ma soifua a‘e i Samoa ona malaga mai lea i Niu Sila a o laitiiti o ia.
O lona olaga atoa sa tuputupu a‘e i Porirua i le Laumua i Ueligitone. Na ta‘ua i se pepa o faamatalaga sa faapea ona tuuina mai e le susuga i le faafeagaiga o le EFKS Porirua le susuga Rev Nove Vailaau, na ia ta‘ua ai le matuā misia tele e le Ekalesia o le susuga Jerry. I lana saunoaga na ia ta‘ua ai o Collins o se talavou lotomaulalo toe faamaoni, toaga i le lotu toe faaaloalo i soo se tasi o le Ekalesia.
Na ta‘ua e Rev Vailaau, e iai se aso sa faapea ona tofia ai Collins e tatalo i lotu filifili a le Ekalesia, ma sa malaga mamao mai lava e faatino ona tofiga ona toe foi ai lea ina ua uma ona tatalo e pei ona sa filifilia ai.
I le saunoaga lava lea a le susuga Rev Vailaau na ia ta‘ua ai, o le a matuā misia Jerry i ona uiga tausaafia ma le tamalii. O lona naunau e faataunuu soo se vaega o le galuega i le Ekalesia e faapea ona tofia ai o ia o se faamanuiaga lea ma o le a lē galo lenei sui o le Ekalesia.
I le tau fai lolofi mai o faamaisega o loo ta‘ua ai le misia e le toatele o le susuga Jerry, aemaise ai lava i latou sa taaalo faatasi i le Olopeleki mai le tausaga 2001 seia oo mai i le 2008. O le mae‘a o le taamilosaga o le Ipu o le Lalolagi i le 2007 na faateia ai Niu Sila ma le lalolagi atoa ina ua faalauaitele mai le faamavaega a le susuga Jerry, ma o le 2008 o le tausaga mulimuli lea na ia taalo ai mo le Olopeleki, aemaise ai lana ‘au o le Hurricanes e pele ia te ia.
O le tausaga 1999 sa faapea ona uluai filifilia ai le susuga Jerry Collins i le au a Ueligitone i le taamilosaga a le NPC, ae o le 2001 o le uluai taimi lea na filifilia ai loa mo le Olopeleki.
O le tausaga e 2008 sa faamutaina ai lana tautua lakapi mo Niu Sila ae faapea ona faatasi atu ma taaalo i nisi o Konekarate i le Atu Europa, Iapani ma Falani lea ua faamutaina ai lana taleni ma lana auaunaga i lenei olaga.
O le tulai mai o Jerry i le taimi sa taalo ai mo le Olopeleki, ua faamauina ai o ia o se tasi o numera 6 tautaua ma logologa. E leai se isi na ia ofuina le numera lea e tutusa ma Collins i lona malosi ma lona naunautai i le taimi e faatino ai le taaloga.
O lana pue o se tasi lea o vaega o le a manatua ai pea lenei alo o Samoa, ona e lei vaaia muamua i le au a Niu Sila se tasi e malosi lana pue e pei o Jerry Collins. E oo lava foi i le taimi o osofaiga, o se tagata e faigata tele ona pue i lalo.
O loo faagasolo i le taimi nei fesootaiga uma auā le momoliina mai o lona tino i Niu Sila mo ona toe sauniga. I nisi o lipoti lata mai o loo ta‘ua ai le faasolosolo manuia o si ona afafine o Ayla, e ui ina o lea ua faamaonia mai e lei tai tai lava ona tulai mai i se tulaga lelei tele si alualutoto.
Tau ia ina ia faamaise atu le Agaga Paia o le Atua i mātua o le susuga Jerry ma ona aiga uma, faapea ai foi mātua o si ona faletua ia Alana ma nai ona aiga ona o lenei faalavelave matuia. Talosia foi i le alofa ma le agalelei o le Atua ina ia iai lana faamalologa i tiga ma manu‘aga o loo faapea ona feagai ai ma si a la tama.
O le upu moni, o le a manatua pea Jerrry ma e faigata ona faagalo i le tele o augatupulaga sa vaavaai ma matamata i lana taalo. O le a faigata ona faagalo e ona aiga ona o lana filifiliga i vaega lelei uma auā le faaeaina o lona aiga i soo se itu aemaise lava i le tamaoaiga.
O le a faigata foi ona faagalo e nai ana uo sa o latou militino faatasi ma taaalo, i ona uiga tausaafia e pei ona faamatalaina e le toatele ia latou faamaisega.
O ia o se tagata e alofagia e tagata. O ia o se tagata e pele i loto ma agaga. Sa ola ma le fiafia a o iai i lenei olaga. O lona loto i le lakapi sa tuu atoa i ai lona malosi ma le lē faatafa.
Tofa Jerry Collins ma si ou faletua, ia manuia le lua malaga.
