Ua lē avea le tusi faatauanau a le faipule o Gaga‘emauga Numera 2 ma lana loia i le pulega o le faletelevise i Mulinuu o le TV1 (Samoa Quality Broadcasting Limited) e totogi atu le silia i le $700,000 e le televise ona o se lipoti e faapea ua faaleaga ai le suafa ma le tulaga aloaia o le tofi faipule o Levaopolo Talatonu faapea lona aiga ma le itumalo, e vavevave ai se gaioiga a le pulega o le televise.
O le tusi mai le alii faipule ma lana loia e faapea o loo faailoa ai i le pulega o le TV1 se latou lipoti na faasalalau i le taimi o le faamasinoga o Levaopolo Talatonu ma se tasi o tamaitai faigaluega o lana pisinisi faamomoli, ma oloa mai fafo na sese ma faaleagaina ai le tulaga o Levaopolo, lona aiga, ma lona itumalo aemaise o lona tofi faipule o le Palemene.
O le lipoti a le TV1 na faia a o faagasolo le molimau a se tasi o tagata faigaluega o le ofisa o le tiute, e pei ona faaalia e Levaopolo i se lipoti, na faasalalau ai e faapea sa molimau lea tagata faigaluega na ia faatau atu ni pusa fagu malosi o le uiki i se faleoloa.
“Na aumai le faamaumauga a le faamasinoga i le molimau ae leai ma se faamatalaga faapea na faia”, o le faaaliga lea a se molimau faatuatuaina e latalata i le faipule. O loo fesiligia e le afioga Galumalemana Faiesea Matafeo le pule sili o le televise i Mulinuu pe aisea na lē tuuina atu ai e Levaopolo ma lana loia se faaseā i le lipoti i le taimi na faasalalau ai, ae sa faatali se‘i mae‘a le faamasinoga.
“Lona uiga ana lē aumaia nei le iuga ua lē faamaonia moliaga e lē faia se faaseā ma aumai tusitusia”.
O le Aso Faraile na tea nei na mae‘a ai le sefulufā aso na ave e le loia a le faipule, le afioga Te‘o Richard Tapeni Faaiuaso, i le fale televise e totogi atu ai le silia i le fituselau afe. “O aiaiga ia o le tusi a uma le 14 aso e leai se finagalo o le pulega o le TV1 ona tuu atu lea o le mataupu i le faamasinoga”, o le saunoaga lea a le loia.
O le faaaliga a Levaopolo i se tasi o lipoti e miliona le tupe o le a su ai le TV1 i le faamasinoga. O le manao foi lea o le tamaitai pule o le fale televise ina ia maua ai le avanoa e folasia ai le latou mau e tusa o le tuua‘iga. Ua faaalia ua mae‘a ona faaulu le tagi ae e lei faatulagaina se aso e fofogaina ai i luma o le faamasinog maualuga.
E iai foi isi auala o faasalalauga poo le media o loo fuafua le faipule na te suina ona o lana mau sa lē sa‘o le lipotia o ona moliaga ma le tulaga tonu na aafia ai i le faamasinoga. Ua lē faamaonia moliaga o Levaopolo Talatonu ma le tamaitai faigaluega o lana kamupani.
