Ua tautino le Pule sili o le Matagaluega a le Palemia ma le Kapeneta le faletua o Vaosa Epa, e lei talanoa i se tusitala e uiga i ni tupe o le polokalame o galuega faavaitaimi le RSE ua toesea poo ua gaoia, pe ua faamalolo foi se isi o le vaega o loo nafa ma le polokalame.
“O lea ou te sailia le tamaitai tusitala lena e faapea na faia le lipoti ona ou te lei talanoa i ai”.
Faaalia foi e le tamaitai Pule sili e leai se isi o le vaega o le RSE ua faamalolo. Peitai ina ua fesiligia e le tusitala o lenei lipoti pe mafai ona aumai sona finagalo pe moni o aafia ni tupe o le polokalame, sa soisoi le Pule sili ma faapea mai, poo le a le feau a le tusitala e fia iloa ai lea tulaga.
Sa toe tulitatao atu i se fesili le tamaitai Pule sili pe moni, o loo aafia ni seleni o le polokalame ma sa ia faapea mai o le a iai se taimi ona aumai lea o sona finagalo i le mataupu.
E lei mafai ona faamaonia pe teena foi e le Pule sili le iai o se faaletonu o aafia ai le polokalame i le tulaga tau tupe. O le lipoti a le tamaitai tusitala o Lagi Keresoma o le Talamua Online o loo lipotia ai e faapea e $20,000 se tupe o loo masalomia ua toesea ma ua agai ai le faauluuluga o le Matagaluega a le Palemia ma le kapeneta e faamalolo le alii o loo faauluulu i ai le RSE unit ae sei faatino se suesuega.
“Ou te fia iloa poo ai na talanoa i ai le tamaitai tusitala ona o loo faigaluega lava le vaega o nafa ma le polokalame”, o le saunoaga lea a Vaosa, ae pe loa le telefoni a le tusitala o lenei lipoti ona ua uma le tupe fafaga poo le credit.
Sa saunoa mai le failautusi a le pule sili ua maea ona ia tuu le telefoni a lenei tusitala i le Pule sili, peitai e lei toe maua lava se fesootaiga seia oo ina tuuina atu lenei lipoti mo le faasalalauina.
E lei manuia taumafaiga i le fia maua o se avanoa i le Minisita o le matagaluega a le Palemia ma le kapeneta le afioga i le Palemia mo se faamatalaga, ona o le aso tonu na taumafai atu ai mo sona finagalo, na faatoa taunuu ai i le atunuu ina ua maea sana malaga taua sa feiloai ai ma le Pulenuu o Aukilani le alii o Len Brown, mo le talanoaina o se nofoaga mo le ofisa o le Konesula o Samoa i Aukilani. O le polokalame o avanoa faigaluega faavaitaimi i Niu Sila ua toatele nisi o le atunuu ua maua ai seleni e fesoasoani i o latou aiga.
O se polokalame foi ua mafai ai ona maua le fesoasoani tau tupe mo nisi o aiga limavaivai i Samoa.
O le a tuliloaina pea e le tusitala lenei mataupu mo se atoaga.
