Le saolotoga mo tusitala ma tagata uma

I se fonotaga a tusitala i Aukilani i le faaiuga o le vaiaso na tea nei sa faaautu i le matua tauave, “International Amnesty Freedom for Everyone”, ma na auai atu i ai le toatele o sui eseese mai nusipepa, leitio ma televise i lea fonotaga. O le amataga foi o le masina lenei o Me na faamamaluina ai i le lalolagi atoa le au tusitala, le au pueata ma i latou uma o loo galulue i le auaunaga o faasalalauga, o ē na maliliu a o faia o latou tiute i atunuu eseese o le lalolagi. Na faapea foi ona talanoaina ai le tele o ni metotia ma auala eseese e faaleleia ma toe faalauteleina ai agavaa o le au tusitala, i auala faaonaponei aemaise ai le aia tatau a tusitala e latou te tusitusia ai ma lipotia ma faailoa ni mataupu eseese e tatau ona silafia e tagata uma.
I le galuega lava ia faatusitala e pei ona taua i lea aso, e latou te lipotia ai tala lelei, o mea faalēlelei, o mea matagofie ma le lē lelei, o tala fiafia ma tala faanoanoa. Sa taua e nisi o i latou na faia ni lauga e faapea, e tele ni mataupu i totonu lava o le Pasefika e tatau ona suesue ma lipotia e lē o tele le silafia i ai o tagata lautele, e pei o le siosiomaga ma le suiga o le tau ua iai nei.
Sa toe faataua ai lava le faamoemoe ina ia galulue faatasi le au tusitala ma le komiuniti, le malo, ma tagata taitoatasi, ina ia faigofie ai ona maua fesootaiga ma faamatalaga moni ma le maufaatuatuaina i soo se mataupu. O lenei foi ituaiga galuega e moomia ona faatinoina e ni tagata e tuu atoatoa atu lo latou taimi, mafaufau ma le loto i le galuega, e iai le agaga e faamaoni ma alofa moni i lana tiutefai o sē o loo lipotia pe tusia se tala i se mea o loo tupu.