“Mo Nora, o se faamanuiaga tele mo au lou feiloai i se tamaitai talavou e matua tele lona faaaloalo mo isi tagata e pei o au, ma e mautinoa foi, o oe o se tamaitai e te matua faaaloalo ia te oe lava. E faaalia i le auala o loo e tautuaina ai tagata i le faleaiga.
O uiga na e le o faigofie ona toe maua i talavou i aso nei. Ou te mautinoa, ua e maua le puna lilo o le fiafiaga, o lou alofa le faatuaoia i soo se tagata. Tau ina ia susulu pea lau lamepa, ia sulugia ai nisi tagata e te feiloai atu i ai.
O le tupe, ua na o sina meaalofa faatauvaa mo oe.”
Ua maligiligi loimata o le teine a o faauma ona tapena le laulau. Ua ia foi i le fale ma faamatala i ona matua le toeaina ma lana tusi. Mulimuli ane na faateia le teine ina ua ia iloa ane, o le toeaina lea na ia tautuaina, o le tagata tonu lava lea e ana le faleaiga lea e galue ai.
O le taimi muamua foi lea ua faatoa vaai ai le teine ma le toatele o le aufaigaluega i le toeaina, aua e ese tagata ia o loo galulue i le pulega a le faleaiga.
