O Nora ua 19 ona tausaga, o se tamaitai talavou e lei faia sona aiga, ma o le tolu ai lea o masina talu ona galue o se tamaitai tautua i totonu o le faleaiga.
O se tamaitai e soifua ae i se aiga ma ni matua e mafuta tele i le Atua, o le olaga atoa o Nora e faatonutonu uma i taiala o le Tusi Paia. Ma o se tasi o tauloto apoapoai a ona matua, ina ia faamautinoa lona tautuaina lelei o tagata aemaise i tama ma tina matutua.
Ua taunuu atu Nora ona faaloaloa atu lea o lona lima i le toeaina ma faapea atu, “Talofa Tama, afio mai ta o e momoli oe i le laulau lale.”
E lei faia se tala a le toeaina, a ua na o si ana ataata, ma luelue lona ulu e momoli ai lana faafetai i le tamaitai tautua.
Ua taunuu i le laulau, ona toso lea i tua e Nora le nofoa ina ia faatele le avanoa e oo atu ai le toeaina, ona ia toe tuutuu atu lea i ai o le laulau.
Sa faamautinoa e Nora ua saofai lelei le toeaina i lana laulau, ona ia faatu lea o le tootoo o le toeaina e faalagolago i le laulau, ina ia faigofie mo lana toe aapa ane i ai.
I si leo vaivai, ua faapea ae ai le toeaina ia Nora, “Faafetai lava Afafine. Ia faamanuia le Atua ia te oe ona o ou uiga alofa.”
“E le afaina Tama,” o le toe tali atu lea a le teine. “Oi, o lou igoa o Nora. Ou te toe foi mai e siaki oe, pe a e sauni e ota lau taumafataga. Ae soo se mea lava e te manao vave i ai, na ona e talo atu lava ia te au.”
