O se taeao malulu, ae ua pisi foi taavale i feoaiga a tagata e tulituli faatauga o le Aso Toonai, aemaise i flea maketi aua e faigata ona maua ni paka o taavale.
E fai foi la o le faatopetope o le feoaiga a taavale, ae o tagata foi latou ua leai lava sei mafaufau i nai tagata matutua o loo tau tootoo atu i faleoloa.
I lenei tumutumu, o loo tau etuetu atu ai lava si toeaina e foliga o loo taumafai atu sona auala e fia oo i totonu o le faleaiga, lea o loo tumu mai ai tagata na usu atu mo a latou malu o le taeao. Pe tusa ma le tai tolu mita le uumi o ana laa, ona toe tu lea ma tau mapuea a o totoo i si ona tootoo laau lea o loo piipii i ai lana savali.
E iloa atu masae o lona ofutino, e maanuminumi ma pisipisia lona ofuvae uumi o loo fai, ma nai ona seevae ua le o toe tele se malosi o iloa atu ai.
Ua ulufale le toeaina i totonu o le faleaiga, ma o ona lavalava ma ona foliga le taualoa, ua tu ese ai lava o ia mai le anoano o alii ma tamaitai i o latou laei matagofie aemaise foi le sasala manaia o a latou faamanogi.
Ua atoa lelei le tino o le toeaina i totonu o le vaega e ulufale ai tagata, ona tu lea ma tilotilo solo e peiseai o loo ia saili mo se tasi e fesoasoani mai ia te ia.
Na vave ona iloa mai e le tamaitai o Nora, ona savali faatopetope mai loa lea o Nora e faafeiloai le toeaina.