O le feiloaiga masani a tusitala ma le Palemia na faaleo ai sona faanoanoa tele i le taunuu o le faigamalaga a le palemia o Niu Sila le afioga Toosavili John Key ma lana aumalaga i le po o le Aso Sa, aso muamua o Iuni 2014, ae aliali ai se faaletonu.
O le faasitepu e mo le faitotoa pito i luma o le vaalele sa faamoemoe e ulufafo mai ai le alii Palemia ma lana aumalaga sa tulai mai ai se faaletonu ina ua lē mafai ona faapipii i le faitotoa o le vaalele.
Na fiu taumafaiga e lei manuia ma faaaogā ai loa e le Palemia ma lana aumalaga le faasitepu o le faitotoa pito i tua o le vaalele. Na faaalia e le Palemia susuga Tuilaepa L Sailele Malielegaoi, sa lē tatau ona iai se faaletonu auā ua leva ona nofo silafia le aufaigaluega a le malaevaalele i Faleolo o le aso lea e taunuu ai le faigamalaga mamalu, ae sa lē lelei ona tapena lea vaega o le latou tautua.
O se faailo lea mo le aufaigaluega i le lumanai ai o le taligamalo a Samoa i le fono a Malo laiti o le lalolagi ona e lē tatau ona toe tupu mai se faaletonu e pei ona faaalia e Tuilaepa. Ua silasila ai nei le taitai o le Malo ma lana taupulega e toe faaleleia atili le tautua i le malaevaalele i le fausia lea o ni auala e pei o atunuu i fafo, e na ona taunuu lava o le vaalele savavali sa‘o mai le vaa ma agai loa i le vaega e siaki ai pepa malaga ma atopa‘u.
O le a lē toe timuia ai foi pe a taunuu se vaalele o faaletonu uiga o le tau auā o le a malutia uma le pasese pe a fausia ni auala e pei o atunuu i fafo.
O soo se mea fou lava e tatau ona faataitai foi i ai ma Samoa e pei ona faailoa e le Palemia. Afai e lelei ia faiga fou i fafo e tatau foi ona lelei mo Samoa.
O le saunoaga a le taitai o le Malo i le faaletonu na tupu ua toe faamanatu mai ai foi i le toatele o le atunuu o alala ma aumau i fafo le tāua o le toe silasila o le faigamalo a Samoa i ni faiga faapea auā o loo molimauina pea pe a taunuu vaalele e malaga mai ai le toatele i Samoa, tasi lava lea o faaletonu o loo tupu o le tau avatu o faamalu pe a timuga.
O le a siamu Samoa i le tautua a le malaevaalele faavaomalo pe a taunuu le fuafuaga ua faailoa nei e le Palemia o le fausia o ni auala e agai ane ai pasese e siaki pepa malaga ma atopa‘u, faapea foi mo pasese e malaga ese ma le atunuu.
