Sola le Siufofoga o le Penina o Samoa i Kalaiesetete ma le faailoga o le “BEST Non-English Programme Award”, mai le faitau aofai o le silia i le 35 polokalame mai isi atunuu ma atumotu eseese o loo faaaogāina le Community Access Radio, i le sauniga faapitoa o le tufatufaina o Faailoga a le Canterbury Broadcasting Plains FM 96.9 Awards o le 2010.
O lenei auaunaga ua valu masina talu ona amatalia o loo faatautaia e le tamaitai o Tala Milo ma le alii o Pio Ami Liaina (Solosolo/Vailoa Aleipata) i afiafi o Aso Faraile taitasi i mataupu tau aoga, polokalame a matagaluega a le malo, aemaise faasoa lautele mo sina mea taumafa o le mafaufau.
E faafetaia le alofa o le Atua i taleni ma agavaa ua foai, aemaise le mafutaga a faifeau i totonu o Kalaiesetete mo faigalotu e tatalaina ai polokalame eseese, ae lē faagaloina le mamalu o le aufaafofoga i ou faiva tapuai ma le tu‘i mai o le mulipapaga.
Faafetai! Faafetai Tele Lava! Faamalo le Tapuai!
