O Siamani, Niu Sila, e oo lava i tagata uli ma le tele o tagata Saina, o loo manatua e le aumatutua, tusa ma le faamauina o tala faasolopito o le atunuu, e toatele Saina ma tama uli sa aumai i taimi o pulea Samoa e Siamani ma Niu Sila, o latou ia sa galueaina faatoaga e pei ona ta‘ua o Faatoaga a Siamani poo faatoaga a le Esetete Tausi mulimuli ane ai.
E iai Mulifanua, o Suga i Vailele, Fiaga, Vaipapa, Aleisa e pei ona sa iai se vaega o lea afioaga sa igoa ai lava ia Solomona poo Afia.
O loo ola ai pea le sa‘i a nai tama uli ina ua aveese mai e le Ekalesia Metotisi ma faamautu i Aele o gauta lea o Faleula, o loo nonofo ai lava e oo mai i le taimi nei.
O tagata Saina ma tagata uli, e aupito sili ona tautaua i le lalolagi i le malolosi e galulue i galuega Leipa, e peiseai o le ala lea na aumai ai i taimi o Siamani ma Niu Sila, o le totoina o le koko, niu faapea ma le kofe.
Ua tatou molimauina foi le tele o galuega konetarake o loo galulue ai nai alii Saina, ma vaaia pea le malolosi pe a faatusatusa foi i Saina o loo galulue i le toga kapisi ma tamato o le malo i Nuu.
O le tele o konetarake malolosi ma moomia e malo tetele, o tagata Saina e mafuli ina galulue ai. O tuutuuga ma galuega faakonekarate, e faamau le taimi e mae‘a ai, ona fua lea o le tupe e faaalu ai.
O le ala lea e matuā moomia ai tele tagata Saina, e lē gata e galulue malolosi, ae galulue mae‘ae‘a, ma umi foi itula o le aso o maua pea le malosi e galue ai.
E lē se mataupu fou i le faafogafoga a le atunuu ma lau silasila le o mai o tagata Saina i Samoa, tatou te feola mai ua leva ona feamoai solo ato tui e tutumu i oloa a nai alii Saina. O nisi o latou ua faaipoipo i tamaitai Samoa, ma ua ola ai lava o le toto Samoa ma le toto Saina.
E lē o se vaaiga e fou i le silasila le iai o Saina i totonu o le atunuu, e faapea foi i nai tama uli, ua leva o tatou faifai mea ma galulue faatasi.