Ua mae‘a ona ona umusa nisi galuega o faleaoga tulagalua, ae o loo fausia nisi faleaoga i le taimi nei i le fesoasoani a le Malo o Iapani. Peitai i le tuanai ona tatala ia galuega e pei o le faaleaoga o Manunu, o lea foi na umusa i le Aso Faraile ua mavae le faleaoga fou tulagalua o le afioaga o Salelologa.
E $226,000 le foai a Iapani i le komiti ma le mamalu o alii ma faipule o le nuu ua avanoa ai ona tagolima i ni seleni auā le fausia o se faleaoga mo alo ma fanau lalovaoa o Salelologa. O Saina le isi Malo ua tetele nisi o faleaoga ua ia faatupe lea e ua oo i le miliona poo le sili atu foi le tau, ae o Iapani lava ia o lana polokalame mo atinae laiti o loo auala mai ai vaega tupe e sili atu ma le luaselau afe o loo toomaga i ai le tele o nuu i le fia fausia pe toe fausia o latou faleaoga tulagalua.
Ua lagona i lenei vaitau iuleo ua faapea mai, ua tatala tonu lava nisi o faleaoga i le taimi ua faitau masina ona oo lea i le palota tele a le atunuu i le masina o Mati o le tausaga fou. Peitai o le mau lava ia a nisi, e lē o toe iai ni faatosina faapea o toe aafia ai nisi auā o galuega nei o fesoasoani a isi Malo, ae na pau le itu ua foliga ai o ni faatosina o le palota ona o le taimi ua mae‘a ai ma tatala nisi o faleaoga, aemaise ua aliali ane ai ma foliga o le faipule o le itumalo.
Peitai o le finagalo o se tasi o faipule na ia faailoa mai ai, e sese tele lea lagona poo se manatu. “E te silafia foi, e faigofie tele i tagata ona faamatala ma faauiga se tulaga faapea ia fesootai ma le palota, ae e lei alu le faipule fai i le ofisa o Iapani o loo maua ai le fesoasoani, ia fau tonu le galuega ia fetaui ma le taimi o faatosina o le palota”.
O le vaiaso na tea nei na sainia ai foi se isi fesoasoani a Iapani ma sui o le komiti a se isi aoga tulagalua i Upolu mo le fausia foi o se falea’oga, ae o le galuega o le faleaoga o Salelologa ua tatala aloaia, o se isi lea faailoga vaaia o galuega lelei mo le atinae o le atunuu o loo gapatia ai lea Malo e ala mai i seleni.
O le polokalame fesoasoani a Iapani e mafai foi ona faatupe ai nisi o atinae e pei o falemai, ma isi galuega e mafai ona tautua ai tagata lautele o Samoa. O Iapani foi na fausia le taligalu sima umi ma maualuga o loo siomia ai le taligalu o le taulaga o Apia, ma ua mafai ona puipuia ai le saogalemu o le taulaga mai le maualuluga o galu e fafati ma ono ‘aia ai le eleele.
