Na teena le mau a le Wilex e faapea e $10 miliona le tau atoa o mea na faaleagaina i le mu,… i se fua faatatau a le faamasinoga e na o le $8 miliona 600 afe tala le tau o mea na faaleagaina
O le afi na mafua i se fesootaiga o uaea eletise agai i se palaka o se masini ea mālūlū, lea ua faamaonia i suesuega na faia, na mafua ai le mu o le fale gaosi sukalati a le Wilex i Moataa.
Ua fitu tausaga talu ona faaleagaina lenei kamupani gaosi sukalati i le afi, na tuuaia ai e le pulega o le kamupani se tasi o transformer e tu i luga o se pou moli a le EPC e lata lava i le fale faigaluega na mafua ai ona mu ma faaleagaina uma le fale ma meatotino a le Wilex.
Sa tuuaia ai foi e le kamupani le faatamala o le au faigaluega a le EPC i le tuai ona titina le laina eletise na mafua ai le faaletonu, o le mafuaaga o le vave ona sosolo o le mu ma lē mafai ai ona faasaoina le tele o ana meatotino. I le faaiuga a le faamasinoga ua lagolagoina ai le faaiuga o suesuega a ni alii popoto mai fafo i faalavelave tau mu, lea o loo faaalia i le latou lipoti na tuuina atu i luma o le faamasinoga e avea ma molimau tetee a le EPC, e faapea o se uaea o se fesootaiga tau eletise o se tasi o masini e maua ai le ea malulu poo le air condition i le vaega e teu ai oloa a le Wilex, na mafua ai le mu, ae lē o le transformer poo le tuai tali atu o le aufaigaluega a le malosi faaeletise.
O le taunuuga o lenei faamasinoga e lua vaiaso o suesueina molimau, ua faaalia ai foi ma le teena o le mau a le Wilex e faapea e $10 miliona le tau atoa o mea na faaleagaina i le mu, ma ua faaitiitia le tau aofaiga o mea na faaleagaina i se fua faatatau a le faamasinoga e na o le $8 miliona 600 afe tala.
O lona uiga na pau lea o le tau o mea na faatamaia e le afi, e aofia ai le fale, o masini ma oloa, ma ana manumalo ai le Wilex semanu o le vaegatupe lea latou te maua e totogi e le EPC.
Talu mai le taimi na afaina ai le lumanai o le Wilex i Moataa i le faalavelave e lei toe pa‘ō pe minoi se galuega e tasi ae na taatia ai lava le fale atoa ma ona vaaiga ina ua mae‘a le mu e oo mai i le taimi nei.
Faaalia e le faletua o le alii pule o le kamupani i se talanoaga i le telefoni, e lei mautu se fuafuaga pe toe tuuina atu le faaiuga ua aumai i le Faamasinoga o Talosaga Apili.
“E lei oo i ai se mafaufau i lena tulaga i le taimi nei, ae o le a faatali se‘i taunuu mai lo‘u toalua o Eddie o loo malaga i fafo.
O le manumalo o le EPC i le finauina o lana mau tetee i tuuaiga, o se fiafiaga i le alii pule, le afioga Muaausa Joseph Walter ma le pulega o le faalapotopotoga.
