Nisi o malo faaaloalogia sa fai a latou saunoaga autu e uiga i matagaluega a le malo oloo galulue ai

Nisi o malo faaaloalogia sa fai a latou saunoaga autu e uiga i matagaluega a le malo oloo galulue ai

E moni o le komuniti Samoa sa taulamua i le polokalame sa faatinoina i le po o le aso Tofi ua mavae i le malumalu o le ekalesia Katoliko St Annes i Manurewa, ae sa tatala faasoloatoa le faitotoa i soo se tasi o loo fia faalogologo ma malamalama i se finagalo o le malo e uiga i le taugata o le soifuaga o loo ua iai nei.

E ui lava la i le taugata o le olaga i totonu o le atunuu lenei o Niu Sila, ae le nofonofoai ai le mamalu  o le atunuu aemaise o ekalesia i le faatinoina pea o le latou galuega e ala lea i le tuitui ma faatino nisi o polokalamee valaaulia ai Minisita e agai mai e fai ni a latou saunoaga e uiga i galuega  faatino a le malo aua le agai i luma o aiga nuu ma ekalesia, aua e iai le talitonuga o tagata lolotu ma aiga faapea komuniti taitasi e tupu le malamalama o tagata lautele i tulafono ma auala o loo agai iai le malo o le fesili ma auai i polokalame faapenei.

O le taua la o le faamoemoe i le po o le Aso Tofi ona sa mafai ona auai atu ai soo se tagata e fia malamalama i le mafuaaga ua taugata ai le soifuaga i totonu o Niu Sila. Na auai atu ai nisi o Samoa, o papalalagi ae ua oo foi i tagata e le o atoatoa le malosi o le tino sa faapea foi ona faatasi atu iai ona e fia iloa foi e latou le tulaga o loo iai agai iai tulafono a matagaluega taitasi a le malo.

Susuga i le tiakono ia Sanele Poluleuligaga na taitaiina le polokalame

Susuga i le tiakono ia Sanele Poluleuligaga na taitaiina le polokalame

O le ekalesia Katoliko sa tuufaatasi lenei faamoemoe i le taitaiga a le susuga i le taikono ia Sanele Poluleuligaga faatasiai ma le galulue faatasi a le Taimua Youth lea sa peseina pese e talitali ai le amataina o le polokalame ma le fofogaina o polokalame o le po.

E toalima Minisita na valaaulia i lenei faamoemoe ona o le manatu maualuga o le polokalame o le avanoa lelei lenei e faiai ni saunoaga mai nei Minisita e uiga i le soifuaga o loo iai nei aiga ma tagata i totonu o Niu Sila, o le Minisita ia Tracey Martin, o Hon Carmel Sepuloni, Hon Jenny Salesa, Hon Phil Twyford ma le afioga i le Minisita o tagata atu motu  ia Hon Aupito Sua William Sio. Peitai ane e lei mafai ona iai se Minisita sa faatasi atu i lea po ona o tuatuagia sa feagai ma i latou i totonu o le malo.

Pau le agaga fiafia o le mamalu o le atunuu sa auai atu i lea afiafi ona sa mafai ona faalogologo i nisi o faasoa a alii o loo  galulue i totonu o nisi o matagaluega a le malo, e pei ona iai le sui mai le Council le alii o Daniel Newman lea sa fesiligia i lea po e le polokalame pe mafai ona maua mai se fanua mai le Auckland Council e fausia ai se fale mo i latou ia o loo momoe i le auala, ae na tali mai le alii o Daniel e tuu atu le mataupu ia te ia o lea ia momoliina i totonu o le saofaiga a le Council ina ia faamatuu mai se fanua mai Papakura poo Manurewa aua tagata ia o loo momoe i luga o le auala.

O le tasi vaega lelei o le polokalame o le faaaogaina lea o tupulaga talavou, aua o le auga ma le faamoemoe o nei feutagaiga ma le sailiili manuia e faatatau lava mo tupulaga talavou o loo fai mai aemaise o so latou lumanai manuia. O le isi vaega taua, ia aoga lenei polokalame ia taumafai e tatai mai ai tupulaga talavou uma e faalogologo ma taumafai e taitai ni faamoemoe faapenei aua le manuia lautele o le komuniti. O tausaga uma lava e faatinoina ai lenei polokalame, aua e taua le tu’itu’i pea i le malo atonu e iai le taimi e tatalaina mai ai, ni auala e faafaigofie ai le taugata o le soifuaga o loo iai nei. O le tausaga nei sa agai ai lenei polokalame i le faatauaina o Fale (Housing) Tagata le atoatoa le malosi o le tino(Disability) fale mau totogi (Rental Properties) Tau o le soifuaga (Cost of Living).  E maea le polokalame o le afiafi ae ua iai le naunautaiga o tagata ua le uma le fia faalogologo i le manaia o faasoa a nisi o tamalii ma tamaitai sa fai ma malo faaaloalogia i lea po.