“Na fanau mai ma le faaletonu i lona ulu”
O au o mātua fanau o le meaalofa sili ona tāua mai le Alii. E leai se matua e lē nutimomoia le alofa i se tasi o le fanau e ola mai ma ni ma‘i faigata e pei o Baby Josie mai Salepouae i Saleimoa.
E vili tiga mātua e saili togafiti i le falemai ma taulasea Samoa pe a aafia le fanau i ma‘i, ma e faapena foi sailiga a mātua o Baby Josie i le fia maua o se fesoasoani e ave ai i fafo si a la pepe mo togafitiga faafomai. Na fautuaina e fomai e lē mafai ona togafiti aafiaga o le la pepe, ona o se faaletonu na fanau mai lava ma lo la alo. E ta‘ua lea faaletonu o le Hydrocephalus ma o le faasolo ona tuputupu a‘e o le pepe, e faasolo ai foi ina lapoa ma tupu le ulu.
E ui i fautuaga a fomai ae sa lē nofoai mātua o le pepe i le sulufai i le Toomaga mo Tagata Puapuagatia i le fia maua o se fesoasoani e ave ai i Niu Sila Baby Josie. Na faatino le galuega fesoasoani a le faalapotopotoga ma tali mai ai fomai faapitoa i Niu Sila ma faailoa mai, e lē mafai lava ona faatino se taotoga ona e ogaoga tele ma matuia aafiaga o le ulu o Baby Josie.
Sa faaauau pea le fesoasoani a le Toomaga mo le ulugalii e ala i fesoasoani sa ave i ai i le itu i fautuaga faapea nisi o vaega manaomia i le tausiga o le la pepe. O le Toomaga foi na latou saili atu ni seleni i nisi e agalelei i le pepe, ma maua ai nisi o fesoasoani e pei o lavalava ma meaai faapea ma seleni. Sa tuuina atu uma lava i le ulugalii mo le tausiga o le la pepe. Peitai na ufitia lagona o le pulunaunau e fia faasaoina lona ola mai ma‘i faigata, ina ua valaau le matai ia Baby Josie i le aso 24 o Mati 2011.
O se faanoanoaga lea i ona mātua ma le aiga atoa, ona ua momotu le mafutaga ma se tasi o le aiga aemaise faato‘ā valu masina lona matua.
O le molimau foi lea a le peresitene o le Toomaga le faletua o Lina Chang i le lagona o le ootia alofa i mātua o le pepe ina ua logotala i le uma o lona ola. Faaalia e le peresitene sa faatino lava le mea silisili e gata ai le latou fesoasoani ae lē taumasina se tagata ma le finagalo o le Atua, e fa‘i le matua faapea foi i le fanau ma se pito itiiti.
O le vaiaso na tea nei na faia ai toe sauniga o Baby Josie, ma o se tasi lea o fanau sa i lalo o le vaaiga a le Toomaga mo Tagata Puapuagatia. O faamaisega ma faamafanafanaga i mātua o Baby Josie ina ia maua le lototele e feagai ai ma tiga o le olaga ona o le ta a le maliu ma le oti aemaise o se tasi o le fanau ua amia e lei umi se mafutaga talu ona foai mai e le Alii le oloa tāua.
