Tatala aloaia le uluai CD a le ‘Crossroads Papakura Samoan Methodist Church’ i le aso Toonai na se‘i mavae nei
‘Lagi ia se pese fou, auā o lenei aso, ua tatou tatala ma faalauiloaina ai, ‘Le manuia na leiloa…’
O se tasi lea o vaega o le saunoaga a le susuga ia Reverend Peter Williamson, se tasi o tausi itumalo a le Lotu Metotisi Koneferenisi Niu Sila, ina ua ia tulai e ootiina le lipine ma ina ua mae‘a ona tatalo faamanuia mo le galuega e pei ona sa alofaiva i ai le mamalu o le ekalesia ma le aufaipese, i ona matafale ma tulagatofi eseese, aemaise le susuga i le faafeagaiga ia Reverend Tavita A.S. Palelei ma le faletua ia Faafeai Palelei.
Saunoa le susuga ia Tavita Palelei, ‘O le faamoemoe ua taunuu o le laau o le soifua lea. E faapena se agaga fiafia ma le faagaeetia ona o le faamoemoe sa fauao, faupo, o se faamoemoe foi sa fita i tuga ai le Taitai Pese ma lona ofisa ma le Ekalesia, ae o lea ua lau i ula, tepa i ula, ua a‘e le faatautaiga ina ua tau lau o le faamoemoe, ma ua to le matūpalapala mai le Atua, auā ana lē seanoa o Ia, semanu e lē faataunuuina ma le manuia le miti a le Aufaipese. A o la a le faisalamo, ‘Aua nei ia te i matou, a ia tuuina atu le viiga i lou Suafa.’
O le tuufaatasiga, aemaise o le faanotaina ma le teuteuina i metotia faamusika i nei ona po aemaise le faaaogāina o meafaaili o loo lagi ai viiga o le Atua, sa faatautaia lava lea e le susuga i le faafeagaiga ia Tavita Palelei faapea le lagolagosua a le susuga i le Taitaipese, Fu‘a Faavale ma susuga i Faipese, Alaelua Masi Tevita ma Judyan Tevita, aemaise le maave eseese o le ekalesia.
O se taumafaiga e maoae foi lona tino mai aemaise foi o le faaaogāina ai o le tomai ma le taleni faamusika a le susuga ia Tavita. Ma o lenei moemitiga o se fatu na amata totōina i le ekalesia e le susuga i le faafeagaiga sa ia vaaia le galuega i Papakura peitai ua fai i lagi le folauga, susuga ia Reverend Alalafaga Palelei.
Na matuā faatumulia le malumalu ma le hall a le ekalesia ‘Crossroads Papakura Methodist Church’ i le faatinoina o lenei faamoemoe. Sa taitaia le sauniga faapitoa o lea aso e le afioga i le Sea o le Sinoti Samoa, Koneferenisi Metotisi i Niu Sila, Reverend Tovia Aumua.
O se aso e le gata ina toatele le mamalu o le aufaigaluega mai aulotu eseese a le Sinoti Samoa sa auai ai, ma saunoa faamanuia ai foi e pei o le susuga i le faafeagaiga ia Reverend Suivaaia Te‘o aemaise foi o pesepesega matagofie sa tapenaina e le aufaipese mai le ‘Samoan Methodist Church, Manurewa’ o loo vaaia e le susuga ia Reverend Fatu‘atia Tufuga ma le faletua, faapea foi uo mamae ma tauaiga sa latou molimauina.
Sa faapea foi ona auai ai ma le susuga i le Faatonu o mataupu tau Pasefika a le Ekalesia Metotisi Koneferenisi Niu Sila, susuga ia Reverend Dr Asofiafia Samoa Saleupolu.
Na lei alo tamala foi le tapenaga o le fofoga taumafa i ona teuga eseese mo le auvalaaulia aemaise foi o faaaloaloga sa aao i ai le susuga i le faafeagaiga ma le ekalesia e tusa ai o le talisapaia o lo latou faamoemoe.
Ua iai foi le fuafuaga mo le faatauina mai o kopi o lenei CD, e mafai ona faafesootai soo se sui o le Aufaipese o loo iai suafa i luga o le faavaa o le CD, aemaise le susuga ia Reverend Tavita Palelei ma le faletua ia Faye i le telefoni (09) 2670865 poo le mopili: 021 0485885 poo le afioga ia Lupematasila Faalua Saleupolu i le telefoni: (09) 2663867.
