Na tālo le fono a toeaiina o le Matagluega Aukilani i Matu o le Ekalesia Faapotopotoga Kerisiano Samoa i nisi o toe ulutaia ma le mamalu o le isi vaega o le ekalesia EFKS i Westmere, mo le fia maua o se feiloaiga ona o le mataupu ua vaeseuga ma ua leva ona taoto. O le finagalo o toeaiina, le afioga i le Taitaifono ma le Fono Faatonu sa tauala i se tusi sa tusia ma tuulima ane i le tamā matua, le fetalaiga ia Tuasa Mai, i se nofoaga faitele i Aukilani i Sisifo.
E pei ona ta‘ua i luga, o le aano o le tusi, o le tāloina o le fono a toeaiina o le Matagaluega, ona o le fia feiloai atu i lea foi itu o le galuega, ona o le mataupu lava e tasi. Peitai ua mae‘a ona faailoa le tali a le fetalaiga ia Tuasa Mai ma lana itu, ma o loo matuā teena ai le finagalo o toeaiina ma le Komiti Faatonu mo se feiloaiga.
O le faato‘ai ai o le mataupu i le Samoa Times, sa mafua ai ona fiafia e saga vaailiili atili, ona talu ai o mataupu faapea e fai lava si ma‘ale‘ale, aemaise ai o loo i le tulafono ma lima o Loia lea lava mataupu. Na faamatuuina mai e le fetalaiga ia Tuasa Mai ma le Fofoga o le ekalesia le susuga ia Sulamanaia Tuliaupupu, le tusi sa tauaaoina ane e le fono a toeaiina, ina ua tāpā, ona o se manaoga faapitoa lava o le Tusitala ma lana galuega.
O le taulimaina o lea tusi sa maitauina ai ni vaega ninii e telē sona tāua, ma o ni vaega e ‘anoa ma e iai foi sona fesootaiga ma aafiaga agai i le mataupu o loo moe i fogalemalo. Peitai ua lē ausia e lē na tusia le tusi ma ua fāoa ai le tulaga aloaia ma le amanaia o le vatapuia ma aiā tatau a isi uso a tagata, faapei o i latou sa faatuatusi i ai le tusi.
Sa faia i ai se suesuega faapitoa a le Samoa Times lava ia, ona o le faatāuaina o le mataupu ma le popoe i le va ma le tulafono, aemaise ai o le finagalo lē faamalieina o le isi itu sa agai i ai le tusi ona o auala i fesootaiga sa tatau lava ona faia pea. Na oo lava ina saili e le Samoa Times, se fautuaga faaletulafono e saga lagolago ai se vaivaiga o le tusitala. E lē gata i lea, a o le amanaia pea ma le faatāuaina o aiā tatau ma se finagalo mai ia Tuasa ma lana foi itu, a o lei suesueina atili nisi vaega o lea lava mataupu.
Vaega o le tusi sa mafua ai ona lē talia e Tuasa, mafua ai le faia o suesuega –
Leai se tuatusi sa aumai ai le tusi
O tulaga aloaia i tusi mo auala i fesootaiga faapei ona tusia ai lea tusi, e talitonu sa tatau ona iai se tuatusi e mafai ona toe fesootai i ai ma faafoi i ai se tali i se tulaga aloaia i fetusiaiga, ona o le auala lea sa faaaogāina e tiliva ai le feau. I le ma lea, sa tatau foi ona iai se numera o se masini faasee (fax machine) ma se numera telefoni a le ofisa autū mo le faatinoina o fesootaiga e faamaonia ai le tulaga aloaia ma le faatumauina o le maualuga o le va fealoaloai lautele.
O le ulutusi (letter head) sa faaaogāina, o loo atagia ai e lē o iai vaega laiti e pei ona ta‘ua, ae pei lava ona ta‘ua muamua, o nisi ia o vaega aupito i tāua ma e amanaia tele e le tulafono, talu ai o le mataupu o loo i le Faamasinoga, ma e ono oo lava i ai se tala. Sa ta‘ua foi e Tuasa, sa fesiligia le Failautusi o le Matagluega, pe o le ā tonu le mataupu o loo fia talanoa ane ai toeaiina. Ae o le tali a le Failautusi sa faapea ane ai, e oo lava foi ia te ia o le Failautusi, e lē mafai ona ia faailoa ane faamatalaga uma e uiga i le talosaga a le Fono Faatonu.
O le lē mautonu o Tuasa ma le mamalu o le ekalesia talu ai le tusi, atoa ai ma le lē faailoaina o le aano o le mataupu o loo fia feiloai ane ai, sa mafua ai ona aapa loa i se fautuaga a le Loia. O le agaga lava o lea itu, o le vaai pea ma popole i le va ma le tulafono ona o loo moe ai le mataupu.
Sa fesiligia le tulafono, ona talu ai o le tusi sa faamatuuina e pei ona silasila i ai, o loo iai le imeli a le susuga i le Failautusi a le Matagaluega, o le telefoni (land line), ma le telefoni feaveai. Peitai sa faapea mai le tulafono e talia, ae sa tatau lava ona iai se tuatusi, ma tulaga masani e pei ona silafia ona e iai sona tāua tele.
Lē amanaia tulaga o tiute ma aiā tatau
E lē o amanaia le tulaga aloaia o Tuasa Mai, o ia o le sui e toatasi Tausi Mea faaletulafono a le ekalesia i Westmere o loo totoe ma soifua mai (Trustee of Westmere Congregational Christian Church of Samoa Trust Board). O lea faaiuga sa faamaonia i luma o le Faamasinoga Maualuga i Aukilani ia Tesema o le tausaga 2010. Sa faalauiloa e le Faamasino, Honorable Justice Andrews ma faamaonia ai le aloaia o Tuasa Mai.
Peitai o le tusi sa tauaaoina e lē o amanaia ai lea tulaga o Tuasa e pei ona faatāuaina foi e le tulafono. E lē gata i lea, ae foliga mai o loo ta‘ai faafala le mamalu o le ekalesia i lalo o le faaupuga Paia i le Ekalesia, peitai o loo iai lava tofiga ma tiute tauave o loo maioio mo matata eseese e pei lava o soo se aulotu.
Sa tatau foi ona tofu itu uma e lua, ma kopi o le tusi sa faamatuuina e toeaiina, ina ia silafia ai ma tausisia pea faiga amiotonu ma le malamalama lelei. E iai foi le tāua o lea foi tulaga, ina ia faaauau ai le amanaiaina o aiā tatau ma tiute o tagata uma. O le leai o se kopi a Loia o se tasi o vaega o loo atugalu foi i ai lea itu, aemaise ai o loo masalomia le leai foi o se kopi a le isi itu o le ekalesia lava a Westmere e pei ona vaeluaina i le taimi nei.
O le tali a le tulafono i lea foi vaega, sa ioe i le tatau lava ona faitauina ma amanaia le tofiga ma tiute taualoa o le fetalaiga ia Tuasa e pei ona aloaia i le Faamasinoga Maualuga i Aukilani.
O le finagalo o le tamā matua ia Tuasa Mai, sa ia ta‘ua ai e faapea, e moni lava vaega sa mamafa i ai le vaai, ae o lona lava finagalo e lē o se fia tausi mamalu poo le fia iloa o se isi, peitai afai e amanaia i le vaai faaletulafono ia vaega laiti o lona foi lena manatu.
O le mafuaaga foi lea o le tāpā o le nusipepa ina ia faalauiloa pea ma saga manino ai gasologa uma o lenei mataupu ona ua faitau tausaga o loo saili fofo pea mo sona taunuuga amiotonu ma le saoloto.
O le tusi e pei ona lomia, o le kopi lea o le tusi sa faamatuuina mo le toeaina mālōlō manumalo, le susuga ia Lisale Tu, fetalaiga ia Tuasa Mai le Paia o le Ekalesia.
Teena talosaga a le Fono Faatonu a le Matagaluega, tauala i le tusi a le Loia
E teena e Tuasa le tusi talosaga a Toeaiina ina ia faia se feiloaiga i le aso 24 o Iulai o le tausaga nei lava e pei ona ta‘ua i le tusi. O le teena o lea feiloaiga, ona e faavae i mataupu e pei ona tusia i luga, e lē o faamalieina ai lea itu ma le vaai faaletulafono i le mataupu.
Na ta‘ua e Tuasa e faapea, O fea sa iai lea finagalo tāua o toeaiina o loo ua taumafai mai ai nei, mai le tele o tausaga ua mavae, a o taumafai e saili fofo ma suiga mālie le mataupu?
O fea le toeaina sa iai muamua, Ioritana Tanielu, o ia sa ia silafia lelei ma malamalama i le mataupu, ae sa ia faalafi pea le amiotonu? Aisea ua toe naunau ai e feiloai ma fefaamafanafanai, a ua alu ma maimau le tele o seleni ma tupe?
O le finagalo lea ma le tagi talatala a lea tamā, sa ia ta‘ua foi o le amataga o le mataupu sa faigofie lava, peitai ua tosotoso lava ma ua oo i le Faamasinoga. O lea foi la ua sauni atu e faaauau nisi vaega o totoe, o tupe lava e fai ai. Ua faigata tele le tulaga ua oo i ai le mataupu, ma ua tatau ona tausisi pea i le faagasologa ua iai i lenei vaitaimi.
E lei manatu Tuasa e toe faia se isi faamatalaga agai i le mataupu, ona talu ai sa ia faapea mai o loo ua i le tulafono ma le Faamasinoga. E lē toe fia talanoa atili foi i ai, ae o le a taoto ai faapea, ma o lona finagalo moni foi lea ua mafua ai ona lē toe manao e faia se feiloaiga ma le Fono Faatonu a Toeaiina o le Matagluega e pei ona tatalo mai.
O le tusi a le tamaitai Loia sa faaleo ai le finagalo tetee o Tuasa ma le susuga i le Failautusi ma le mamalu o le ekalesia i Westmere, o le a agai i ai se tusitusiga i le vaiaso fou. O fetalia‘iga sa faailoa i luga o tusitusiga o se isi itu tāua tele, aemaise lava ituaiga mataupu faapenei.
O le a lomia ai foi ma le tusi, ua tusi ai nei le Loia agai i le Faamasinoga Maualuga i Aukilani, ina ia faia se poloaiga e taofia ai le Fono a Toeaiina o le Matagluega Aukilani i Matu, mai le faaaogāina o le paoa poo le malosi Faatoeaiina, Faataitai e toe mailei ai ma faoa aiā tatau a tagata lotu a o iai le mataupu i le tulafono ma le vaaiga a le Faamasinoga.
Ofisa Loia Woodroffe Law Partnership
O le tali tetee a Tuasa ma lana itu, o loo faatinoina i le uia pea o le tulafono e tauala i se tusi a le latou Loia, Woodroffe Law Partnership. Ua taulimaina foi e le Samoa Times se kopi o le tusi e pei ona faamatuuina nei e le tamaitai Loia, Leulua‘ialii Olinda Woodroffe, e tali ai le finagalo sa talosagaina e Faifeau Toeaiina ma le Fono Faatonu a Toeaiina e pei ona faailoa i le latou tusi sa tusia i le aso 8 o Iulai ma tuuina ia Tuasa i le nofoaga Avondale Race Course.
O le tusi a le tamaitai Loia, o loo matuā maioio ai foi sona finagalo i nisi o vaega o le tusi lava lea a Toeaiina, o loo lape ai ma e lē tusa ai ma le vaai ma le silasila faa-Loia ma le tulafono. E iai vaega o loo popole ma atugalu i ai le tamaitai Loia, e pei ona vaai toto‘a i le uiga o le tusi.
Sa ta‘ua foi e le Loia, le tulaga faanoanoa tele ina ua lipoti ane e lana Failautusi le taumafai atu e fesiligia le tuatusi ma nisi o faamatalaga sa manaomia agai i le Failautusi, peitai sa le manuia saunoaga sa faafetaui ane ai lana tagata faigaluega.
Saunoa le Loia, afai e nana ma faalilolilo uiga ma finagalo o le fono faatonu a toeaiina, atoa ma le faamatuuuina o nisi faamatalaga tatau, e foliga mai la oloo iai se tulaga o loo afifi ai. O le ala lea ua tusi ai nei le tamaitai Loia agai i le Faamasinoga Maualuga i Aukilani, ina ia faatonuina ai le Fono a Toeaiina e taofia faiga faapea, o loo taumafai ai e faaaogā le malosi faa-Toeaina, faa-Taitai e faoa ma faatosina aiā tatau a tagata lotu, a o iai i le tulafono le mataupu.
E iai se vaega tāua o le tusi a le tamaitai Loia, o le a auiliiliina mo le silafia atili o tagata lautele. O lea foi tusi o le a lomia i le vaiaso fou, ma o le a faalauiloa ai nisi vaega o lenei foi tulaga ua toe alia‘e mai i le mataupu lava a le ekalesia EFKS i Westmere.
