Na amata mai i lena tausaga ua mavae ona tapena le Malo mo le fono a malo laiti o le lalolagi, lea e 193 atunuu o le a auina mai ana usugafono i Samoa ia Setema o le tausaga nei.
O se faamoemoe ua molimauina ua ave i ai le faamuamua i fuafuaga a le Malo i le toe amatalia o galuega o lenei tausaga fou, ona ua amata lava i le taunuu mai o le asiasiga lona lua a le sui failautusi o Malo Aufaatasi mo mataupu tau tamaoaiga le alii o Wu Hongbo ma lana aumalaga e toa sefulutasi, i le toe fia tuliloa mai o tapenaga talu le latou malaga muamua mai i le tausaga ua mavae e amata faamautu tapenaga mo lea fono tele a le lalolagi.
O lea la ua toe taliu le faigamalaga a le sui failautusi ae ua taoto nisi o vaega ua agai i ai galuega a le Malo e pei ona iai le komiti o galuega le task force o loo taitaifono ai le alii Palemia. O nisi o faletaalo i le malaetaalo faavaomalo i Faleata o loo i Tuanaimato o le a faagasolo ai le fono tele lea ua tuuina atu ai e le Malo le konekarate i le kamupani a le Ah Liki latou te toe faaleleia le faletaalo numela 3.
E ese foi le konekarate faufale o loo fausia le nofoaga e faamautu i ai le aufaasalalau ma tusitala o le lalolagi o le a malaga mai poo le media center.
O se isi lea o manaoga o tapenaga nei ia lelei le fesootaiga o nofoaga e faia ai le fono ma le nofoaga autu o faasalalauga ina ia faigofie le galuega o le faasalalauina o taualumaga o le fono mo atunuu o le lalolagi o le a auai. O se isi itu tāua ia silafia ai e le lalolagi mataupu o le a talanoaina ma faaiuga o le a taunuu i ai.
O le feiloaiga a le sui failautusi ma le Palemia ma tusitala sa faalauiloa ai e Wu Hongbo o se fono e tāua mo Samoa auā o se avanoa e faasalalalau faalauiloa atu ai i le lalolagi. O se tala ave foi lea o le atunuu e siitia ai ma le atina‘e o tagata tafafao maimoa mai i Samoa e pei ona faaalia e le sui failautusi.
O se itu na fesiligia ai Wu o le malupuipuia o le saogalemu o le fono, lea na ia faaalia ai o leoleo a Malo Aufaatasi poo UN police o le a leoina totonu o nofoaga o le fono, ae o lona talitonuga faatasi ai ma taitai o le Malo o Samoa o le a sologa lelei ma filemu taualumaga uma o le fono.
E 170,000 se foai tupe a le Malo Netherlands na tauaaoina i le vaiaso ua mavae i le afioga i le Palemia, Susuga Tuilaepa Sailele Malielegaoi e fesoasoani i tapenaga a Samoa mo lea fono tele.
Ua faaopoopo lea foai i le 300 afe euro tupe Europa ua foai e lea Malo i Malo Aufaatasi e faatupe ai le malaga mai i Samoa o usugafono ma totogi ai nofoaga o le a faamautu ai i lo tatou atunuu.
