O i latou o sui o le ekalesia Asofitu o le toe afio mai le misiona i Lalovaea e faamamalu le Sapati i le Aso Toonai e pei ona masani mai ai, e le toatele e pei ona faaalia e se sui o le ekalesia i le ofisa tutotonu i Lalovaea. “E le toatele le vaega lena ua toe foi i le Sapati i le Aso Toonai”.
O le tali lea i le fesili a le tusitala na tapa ai se finagalo o lea sui o le ekalesia ina ua alu le taeao o tuu vili i le ofisa o le Peresitene aoao le susuga Uili Solofa e le maua se avanoa.
Sa faapea mai le alii peresitene i le telefoni ina ua tuu i ai e lana failautusi, e mae‘a loa lana fono o loo faia ona valaau atu lea mo se 15 minute.
Na uma le 15 minute ma toe valaau pea le tusitala ae maua le tala mai le failautusi ua matuā pisi le peresitene i le tapenaga o le fono faaletausaga a le ekalesia o loo usuia i le vaiaso nei i Siufaga i Savaii.
Na toe valaau i ai i le failautusi i le aso na sosoo ai ma aumai ai le tala, ua le maua se avanoa ona ua pisi tele, ae onosai sei mae‘a mai le fono i Salafai.
O le taumafaiga e fia talanoa i le taitai o le ekalesia ona e fia maua sona finagalo e tusa ai ma le faasalalauga ua aumai e se vaega o tagata lotu o le ekalesia, ua latou faailoa ai le ave o a latou talosaga poo submission i le Peresitene aoao o le ekalesia i le lalolagi, ua faailoa i ai lo latou teena pea o le suiga o le sapati ua faamamalu i Samoa, e mafua mai i le suiga o aso ma le laina tuaoi faavaomalo le International Dateline.
O le faasalalauga na tuuina mai e le vaega o le EventPolynesia i le vaiaso ua mavae, e le o faailoaina mai ai pe toafia tonu sui tapuai o le ekalesia i Samatau faapea Laulii ma nisi afioaga o iai aulotu Asofitu o le misiona, ua latou sainia talosaga tetee ua ave i le Peresitene aoao o le ekalesia i le lalolagi.
O loo manatu nisi o le ekalesia ua latou lagolagoina le suiga o le aso o le sapati, o le tetee pea o nisi i le suiga e le o malamalama ona e manatu ia sui o le ekalesia, ua avea le mataupu i le suiga o le sapati, ua tafu ai se afi mumū saesae ua faaoloataua ai loto o isi tagata tapuai, ma faaluafesasi ai i a‘oa‘oga a le ekalesia aemaise lava o le faamatalaina o le sapati ua suia i ai e pei ona faamamalu i le Aso Sa, ma tutusa ai ma aso tapuai o isi ekalesia kerisiano uma i le atunuu.
O nisi o atunuu o le Pasefika e pei o Kilipati, o loo faamamalu le latou sapati i le Aso Sa, ma o le mafuaaga ona o le suiga o le laina tuaoi faavaomalo na mafua ai foi.
Sa faailoa lea tulaga i se feiloaiga a tusitala ma taitai o le ekalesia ina ua faailoa le suiga o le sapati a le ekalesia a o lei suia le laina tuaoi faavaomalo i le aso 29 o Tesema o le tausaga ua mavae 2011.
