O se tala faanoanoa ua taunuu mai i le foi mai ai o mātua o le alualutoto o Anastasia lea na siimai atu i Niu Sila i le masina na tea nei ona o lea ua faalauiloa le tali a fomai e lē mafai ona faia se taotoga i le patu lea e i tua o le ulu o lea pepe.
Sa faatino siaki i vaiaso ia na iai le ulugalii e ana le pepe ma si a la tama i Niu Sila ma na taumafai e saili pe mafai ona faatino se taotoga e aveese ai le patu lea na fanau mai lava ma le pepe ma sa iai foi masalosaloga o se isi ona ulu.
Peitai ua leai se taotoga ua mafai ma o le faamatalaga a fomai a fai se taotoga e uma lona ola ae e sili le toe faafoi mai i Samoa ma tausi pea pepe sei toe vaavaai lelei poo fea e agai i ai le tupu a le fula lea.
O lea sa i lalo o le tausiga a le Toomaga mo ē Puapuagatia lea aiga ina ua malaga atu i Niu Sila aemaise le mau Samaria Agalelei na o latou ofo seleni mo le agai atu ai o mātua o pepe mo sailiga togafiti.
O faamalositino o le siva o le Zumba lea na fai ma maua ai le pasese o le tamā o le pepe e malaga faatasi atu ai ma lona toalua ma le la tama.
O le ofo a le alo o Samoa o loo avea ma leoleo o Malo Aufaatasi i Iraq ma Isaraelu o Vincent Schmidt lea na faia ai foi ni faamalositino e ana uo i Samoa nei o le One Touch ma maua ai foi se isi seleni e lafo i Niu Sila i le tausiga o pepe ma lona aiga aemaise isi mau foai na maua e le faalapotopotoga fesoasoani atoa ai le aiga o le pepe lenei i le tau sailiga lava o se fesoasoani mo ia.
Ona pau le saunoaga a le ulugalii e ana le pepe o le faafetai i le atunuu i le fesoasoani atu ma atonu o tatalo faaauau o le a faapea ona maua ai se isi suiga o pepe ma na molimauina le paee o Anastasia, ua tele le suiga o lona tino talu mai le taimi mulimuli na feiloai ai lea aiga ma tusitala o Samoa nei a o sauni atu ai le siigamai.
O le tatalo ina ia alofagia e le Atua Pepe Anastasia i le feagai ai ma le faigata o le fula lea e i tua o lona ulu ma o le galuega lava a lona tina o fai nei na o le fafaga lava e pei ona fautuaina e fomai i fafo i le siimai atu ai i Niu Sila. Ua savali i le tolu masina le matua o lenei pepe ma ua vaaia lava le tupu o le patu lea e i tua o lona ulu ae ua telē le suiga mai i le taimi na faatoa fanau mai ai pepe Anastasia ma le taimi lenei ae ua foliga lava ua vaivai foi pepe ma na ta‘ua e ona mātua i le fono ma tusitala e na o le moe lava o pepe ma ona pau lava le galuega lea ua fai i ai o le fafaga ma le tausi ia te ia.
