Ua laga e le Alii Palemia fuafuaga a le Malo e iloilo ai tofiga faa-Ofisa Sili Lagolago ma Pule Sili Lagolago i matagaluega a le Malo na faalua lava ona ia laga poo ai e ana nei faiga. Ta‘ua e le taitai o le Malo, ua nunumi ma tuai ai le faatinoga o galuega ma ua lē iloa tonu lava poo ai e faia faaiuga e saili atu i ai ona o le toatele lea.
Ua tele tusitusiga ma lipoti ua faia e ofisa faasalalau i le fuafuaga a le Malo ma na tapa le Pulega o le Komisi o Tagata Faigaluega a le Malo le PSC pe lē o i latou e faatatau i ai le faamatalaga a le Alii Palemia.
Peitai na o latou ta‘ua na maua le faatonuga a le Kapeneta ma e lē o sa‘o le faamatalaga a ofisa faasalalau ma nusipepa ua faapea mai ai o le uiga o le faamatalaga a le Palemia o loo faatatau i Sui Pule ae lē o faatatau i Ofisa Sili Lagolago (Assistant CEOs).
“E leai ma se aafia ai fua o Ofisa Sili Lagolago i le faaiuga lea a le Kapeneta,” o se saunoaga lea a le Taitaifono o le Komisi o Tagata Faigaluega – le Tofa Tuuu Ieti Taulealo.
O le faamatalaga foi lea na faafeiloai ai le tatou ofisa e lana failautusi ua faapea mai ai e sese lipoti ua agiga ona o loo faatatau le saunoaga a le Alii Palemia i fono ma tusitala ia ua faalauiloa i “Deputies, not CEOs”.
Faaalia e le Tofa Tuuu Ieti, o le faatonuga a le Kapeneta na fai faatatau i “Deputy CEOs”. O le taimi lenei na ia ta‘ua e toalima lava DCEOs poo Pule Lagolago o loo umia nei tofiga i totonu o Matagaluega a le Malo.
“E oo atu i le faaiuga o le tausaga ua na o le toalua e totoe i ia tofiga auā o isi o le a faapea ona malolo litaea ae o nisi o le a see ese ma nei tofiga ona o nisi foi tofiga,” o sana saunoaga lea.
O totonu la o Faalapotopotoga a le Malo o loo feoloolo le numera o i latou o loo faapea ona galulue i tofiga nei e pei ona iai le Pule Lagolago o le Faletupe Tutotonu o Samoa, le Pule Lagolago o le NPF, Pule Lagolago o le Faalapotopotoga o Eleele a le Atunuu – o nisi ia o faalapotopotoga a le Malo o loo iai tofiga nei.
Na toe fesiligia Tuuu Ieti pe iai se eseesega ae na ia ta‘ua o totogi o i latou nei e iai le eseesega, e maualuga laititi atu le totogi o le tagata o loo i le tofiga Pule Lagolago nai i lo le Ofisa Sili Lagolago e $80,000 agai i luga le totogi amata ae o le Pule Lagolago poo le Sui Pule e amata atu lona totogi i le $90,000 (tala i le tausaga).
O le atugaluga o le Palemia atoa ai foi le Itu Agai le Tautua Samoa na o latou laga foi lenei mataupu o le lē iloa poo le ā le eseesega o tautua nei e lua, o le toatele o tagata ua lē iloa tonu lava poo ai e agai i ai i faaiuga ma ni faamalamalamaga o ni mataupu ona ua lē iloa poo ai e uma loa Ofisa Sili agai i ai, poo Sui Pule (Pule Lagolago) poo Ofisa Sili Lagolago.
O le faamatalaga a Tuuu Ieti, o le tofi Ofisa Sili Lagolago o vaega nei o suiga a le Malo mo le faaleleia atili o auaunaga a ana matagaluega ma faalapotopotoga i le tau amata mai o le vaitau o le 2000 lea ua iai nei ofisa sili lagolago, ae o le amata mai lava o pulega sa iai tofiga nei o Pule Sili sosoo i ai ma Sui Pule poo Pule Lagolago, ma e foliga mai o tofiga tuai nei e lei suia lava talu ona faaofi mai Ofisa Sili Lagolago.
Aisea na lē aveesea ai ina ua faamautu suiga a le Malo (Government reforms) e lē o manino i ai le Taitaifono o le Komisi o Tagata Faigaluega.
O faaiuga nei o loo agai mai lava i le Kapeneta e pei foi ona iai tofiga ma le filifiliga o nei tofiga maualuluga e pei ona vaaia i lenei vaitaimi.
O le tulaga la ua lē manino ai nei, ona o lea na agiga le tofiga Ofisa Sili Lagolago ma le Pule Lagolago i saunoaga a le alii Palemia ae o lea ua tali mai le Komisi o Tagata Faigaluega, o tofi Pule Lagolago na faatatau i ai le faamatalaga a le alii Palemia ona o tofi nei na laga i le faatonuga a le Kapeneta mo le iloiloga o le aveesea.
Mo Matagaluega lava ia a le Malo e oo atu i le faaiuga o le tausaga toe lua tofiga o loo iai pea nisi ae e lē o aofia ai la pule lagolago a faalapotopotoga tuma‘oti.
Ae o le saunoaga a le alii Palemia ma lipoti ia ua mae‘a faalauiloa i lenei mataupu ua agai ai tusitala i le lagona o le tuuitiitia o le numera o Ofisa Sili Lagolago lea na saunoa i ai le Alii Palemia aemaise le Taitai o le Itu Agai.
Ua atili ai lea lagona ona o lea ua tau leai lava ni Pule Lagolago poo Sui Pule i totonu o Matagaluega a le Malo.
Na agai sailiga a le tatou ofisa i Apia i nisi o matagaluega a le Malo i le numera o Ofisa Sili Lagolago o iai nei ma totogi amata i le fuaina o le tupe ua alu i nei tofiga a le Malo ma mātauina ai, o le tele o Matagaluega e i le va o le taiono (6) i le taivalu (8) le aofai o Ofisa Sili Lagolago o loo galulue ai se‘i vaganā ai le Matagaluega o Tupe e to‘a 10 Ofisa Sili Lagolago ma le Pule Lagolago e toatasi.
O le Matagaluega o Punaoa faale-Natura e toaiva (9) Ofisa Sili Lagolago.
A toaono (6) Ofisa Sili Lagolago o lona uiga o totogi amata o le toaono lea e alu ai le $489,600 i le tausaga. A toavalu (8) Ofisa Sili Lagolago e alu ai le totogi atoa e $652,800 i le tausaga ae a toasefulu (10) e pei o le Matagaluega o Tupe e alu ai le $816,000 i le tausaga i le matagaluega e tasi i tagata nei e to‘a 10 ae lē taulia ai le $90,000 o le Sui Pule.
Toeitiiti lava a miliona tala atoa e alu i lea vasega o tagata faigaluega. A toafitu (7) Ofisa Sili Lagolago e pei o le Matagaluega o Faamasinoga o lona uiga o le tupe e alu i totogi o tagata nei e toafitu i le tausaga e $571,200.
O lea la ua tālia le galuega ua fuafua nei e pei ona ta‘ua e Tuuu Ieti Taulealo i Sui Pule poo Pule Lagolago ae o suiga a le Malo i ana galuega faaauau ua faamautu ai nei tofiga o Ofisa Sili Lagolago e mautinoa e faaauau suiga nei e pei ona amata mai i le amataga o le vaitau o le 2000.
O le itu tāua i le Komisi o Tagata Faigaluega o le faatino o le galuega ma suiga ua faapea ona tuuina mai e le Kapeneta ma o lea ua agai i Sui Pule poo Pule Lagolago.
