Ua atoa le vaiaso o taumafai atu i se finagalo o taitai o le ekalesia Metotisi i Samoa mo se faamatalaga e tusa ai o le mataupu i le tina o Amelia Taavaoga, lea ua tuli ese ma eleele o le ekalesia Matotisi i A‘ele. E lei manuia sailiga mo se finagalo o le pelesetene ma le failautusi. O isi foi tulaga tofi o le ekalesia sa taumafai atu i ai e lei maua ai se faamatalaga. Peitai o le lagona mafatia o Amelia ona o le faaiuga na faailoa e le pelesetene i le sauniga lotu afiafi o le Aso Sa i tua atu e faatulai ese o ia, sa ia faailoa mai ai le toatele o tagata agalelei na ofo atu o latou fale ma fanua e faamautu i ai, ina ua logo tala i le mataupu.
“Ou te faafetai i le Atua ona o nei tagata agalelei, e viia ai pea lona alofa”. Na tutulu Amelia ina ua maua i ai se feiloaiga ma le tusitala i lona ofisa. Sa ia toe faamatala ai lona mafatia i le tele o faafitauli o loo feagai ma tagata o le latou aulotu Metotisi i A‘ele ona o le mafutaga ma le faafeagaiga ma lona faletua. O se tusi a Amelia na ave i le pulega o le ekalesia o loo faailoa ai nisi o faaletonu na tutupu a o lei oo i le faafitauli na mafua ai ona ave lana tagi i leoleo faasaga i ni upu na lafo e le faifeau ia te ia. O le iuga a le faamasinoga ua faapafala ai se faaiuga e aunoa ma le faamaonia o se moliaga o le faifeau, ua sauni Amelia e apili ona e lē o faamalieina i le faaiuga a le faamasinoga.
“Ua ou lagona lava ia faaaogā lo‘u tagata e fai ma avefeau mo nisi tagata o le aulotu ma lo matou nuu o loo mafatia i nei faaletonu ae e lē o mafai ona gagana ona o le fefefe i le faifeau ma lona faletua”.
O le tusi a Amelia o loo ia faamatala ai se mea na tupu i se tasi o fanau a le nuu ma le aulotu na faaoolima i ai le faletua. Na oo le mataupu i leoleo peitai na tootuli ma faatoese le faletua na mafua ai ona ave i tua le tagi ma leai se faamasinoga e faia.
“Sa ou faapea o faifeau ou te sulu i ai mo se fesoasoani a o lea ua ou lē malu i le auauna a le Atua”. O le isi lea lagona faaalia o le tina ona o se finagalo o le pelesetene na faaleo i le sauniga afiafi na faailoa ai le tuliesea o ia ma lona aiga.
Sa faamatala ai lava ma loimata le tina, ona sa iai lona talitonuga e tu le taitai o le ekalesia mo tagata ma faia se faaiuga amiotonu, a o lea ua manino e apo e le taitai le faifeau ma lona faletua. Faaalia e Amelia e lē mafai ona tuulafoaiina e le Atua mafatiaga o lana fanau pe afai e lē o iai le faimea tonu ma le faamasinoga tonu i se faaiuga o se mataupu.
