Lē fiafia le pulega Crusaders i faaupuga lē taualoa a Andy Haden

“E lē faailogalanu le Crusaders, soia le pepelo ma le tele o lapisi”- Todd Blackadder

O se lafoga na faia e Haden i luga o televise faasalalau a o iai i faatalanoaga i mataupu tau taaloga lakapi, lea na ia ta‘ua ai e faapea o le ‘au faaitumalo a Crusaders, e iai ana aiaiga maumaututū i le pikiina o tama taalo, e pei o le filifilia lava na o se toatolu o tama Pasefika poo Polenisia e tatau ona iai i le autaalo lea faaitumalo o le Crusaders.

Na ia ta‘ua foi o loo faamaufaailogaina i totonu o le franchise manual a le Crusaders ma e tulai mai ua pei e faailogalanu i tama Polenisia (darkies). O ni faaupuga matuia ia ua faasalalau i luga o le ea ma ua lē fiafia ai le pulega ma le Iuni lakapi a Canterbury aemaise le alii faiaoga o le Crusaders, Todd Blackadder.
I se feiloaiga a le pulega o le Iuni lakapi faapea le vasega o tusitala ona ua aliali mai ua malomaloā lava le mataupu ma tulai mai o ni tuua‘iga lē talafeagai ma lē faamaonia.

Na faaalia se lagona o le pule sili (CEO) Hamish Riach e faapea, e lē moni nei faaupuga, ae mai le 15 tausaga o iai i totonu o le Iuni lakapi e le‘i tulai mai lava ni uiga faapea, ma ia faia ai loa se luitau mo Haden ina ia aveesea mai lona tulaga o se “amepasa” faavaomalo aemaise lava i le taamilosaga o le Ipu o le Lalolagi.
E pei ona silafia o Haden o loo aumau i Wales, sa taalo mai Aukilani ma avea ma loka mo le All Blacks (1972-1985). Ua lē tasi ai ni faaupuga soona lafo e lenei lava alii, ma na ta‘ua e le alii faiaoga o le Crusaders, ua faamaimau taimi i luga o televise ma ua atili ai ona iloa e le lalolagi lona pepelo e leai se taunuuga.

Na faalauiloa mai igoa nei o tama Pasefika na filifilia mo le Crusaders ina ne‘i galo i le alii tautala o Haden e pei o: Aaron & Nathan Mauger, Afato Sooalo, Vunibaka, Vilimoni Delasau, Casey Laulala, Brad Mika, Johnny Leoo, Ross Filipo, Joe Maddock, Kahn Fotualii, Tii Paulo, Tusi Pisi, Tone Kopelani, Mose Tuialii ma Ropati Fruean, ae o nisi foi e o mai Aukilani, o le nuu moni o Haden ae o lea lava e fai nei tala faatupu.

Na lipotia mai sa toe fai se saunoaga a Haden i luga o leitio ina ua matuā vevela le mataupu ma ia faamanino ai e faapea, e lē o se faailogalanu le uiga o lana faaupuga, ae o loo taulai ona lagona i lana vaai faatama taalo lakapi ma le ituaiga metotia o loo faaaogāina i luga o le malae.

Na ta‘u pepeloina lea faaupuga e le pulega a le Crusaders faapea foi se lē malilie o tama taaalo, ma ua iai se manaoga ina ia faatoese Haden e tusa ma nei faamatalaga ua ia faia faalauaitele i luga o le ea.

Ua kolosi e Haden le laina sese, ma ua fai tonu lava nei mumugaveve i le vaiaso e fono ai le faiaoga o le Crusaders ma lē o loo faatautaia feutagaiga mo taaaloga a le tama taalo lauiloa, o Sonny Bill Williams.