O se vaaiga uigaese le matagofie o le faatinoina o le tala i le “Fatu na totō” i le vaiaso atoa na tea nei i le Bats Theatre i le taulaga o Ueligitone.
Na amata ona faaali le tala i le Aso Gafua ma na matuā faatumulia le Maota na fai ai i malo faaaloalogia na valaaulia mo le tatalaina o lenei faamoemoe tāua.
Sa faapea lava i aso uma na faaalia ai le tala, le tumutumu atu pea i ai o tagata maimoa. O le itu e faanoanoa ai, ona o ni isi na malaga mamao atu na lē maua ni pepa e ulufale ai ona o le laitiiti o le nofoaga na fai ai.
O se vaaiga matagofie le faatinoga o le amataga seia oo lava i le iuga. O le upu moni e uma le tala ae lei uma le fia maimoa pea o tagata, ona e ese foi le faiga faapolofesa o ia ituaiga siva ma pese Samoa.
Na mālie tele le faiga o leo atoa ai ma le tāgatasi o taga o siva faaneionapo ua filogia ai lagona o le aumaimoa i le fiafia ma le ofo i le malolosi o tama ma teine talavou na faatinoina taga o mea uma.
Sa manaia le amataga i le faaaogāaga o le gagana Samoa e le tama matua o Matua i Falemua lea o loo faaautu i ai lea vaega. E faaperetania mai le fanau i le isi vaega o le tala ae tovā lava i pese ma siva sa matagofie ona faatagaina.
Na maligi loifofoga o isi ina ua faaalia le mafatia o le tina i si ana tama ua leva ona alu i atunuu mamao ae lei maua mai lava se tala.
O le taimi na pese toatasi ai le tina, na matuā lagona le ootia i le mafaufau atu i lagona na feagai ma mātua Samoa i taimi o teteaga ma fanau a o autovaa mai i Niu Sila nei mo le sailiga manuia o aiga.
Ua lē mafai ona galo le faananau o le loto ina ia tumau pea le gagana Samoa e tautatala mai ai le fanau e Samoa le tamā ae Palagi le tina.
O se vaaiga na matuā lagona i tino le faigata o le ola a‘e i gagana e lua, a o faatino e se tasi aupito itiiti o le tala.
Ua tautino mai e lenei vaaiga e lē se mea faigofie le fia iloa ma le fia malamalama o le fanau i aganuu e lua a mātua e pei ona iai ni isi aiga i le taimi nei.
O loo iai foi le faanaunauga ia faasolo pea ona faaalia lenei tala auā le faalauiloaina o aga a Samoa ina ua tuua le atunuu, ae malaga ese mai i le sailiga o le manuia o fanau i aoaoga ma le manuia o aiga.
Ia saga finau pea alo o le atunuu mo mea sili e pei ona aumau ai i nei atunuu.
Talosia ia toe maua se isi avanoa e toe faaalia ai lenei tala matagofie lona faatagaina auā i latou e lei maua ni avanoa e maimoa ai.
E momoli atu ai le faamalo ma le faafetai tele i le alo o Samoa: Tupe Lualua ma le vaega uma na faatagaina le “Fatu na totō”. Faafetai Faafetai tele!
