Le faamaonia moliaga o Stuart Webber

Ua togi i fafo e le Faamasinoga Maualuga le moliaga o le umia o ni paipa ma le faamoemoe e faatino ai se solitulafono, sa molia ai e leoleo se alii ua silia i le 40 tausaga le matua o Stuart Webber. O se osofaiga a leoleo i le fale o le aiga o le toalua o lea alii na maua ai se ato faafafa o loo fafao ai se tamai ato sa iai paipa e lua, lea sa molimau lona toalua sa faaaoga e Stuart e ula ai le pauta faasaina o le aisa poo le methamphetamine. Peitai e lei iai le na molia i le fale i le taimi na faia ai suesuega a leoleo.
O paipa na ave i Niu Sila ma faia ai se suesuega lea na faamaonia ai sa iai ni toega o le pauta o le aisa, ma e lei teena e Stuart lea lipoti. Peitai i le iloiloga o molimau e le alii faamasino sinia o le Faamasinoga Maualuga le afioga Lesatele Rapi Vaai, ua le mafai e molimau a leoleo ona faamaonia sa umia e Stuart paipa, atoa ma le le mafai ona faamaonia sa iai sona faamoemoe e faatino ai se solitulafono i lalo o le tulafono o fualaau faasaina le narcotics act. Ua ata faamaela nei le na molia ma alu fiafia i lona aiga, ua faaleaogaina le moliaga a leoleo sa nofo saisaitia ai talu mai le tausaga e 2006.