Ua valaau leotele le matagaluega o le soifua maloloina i le lautele o le atunuu i Samoa e alolofa e agai ane i nofoaga i nuu ma afioaga poo nofoaga i le taulaga i Apia ma Salelologa e inu a latou fualaau o le mūmū tutupa, talu ai ua mae‘a aso e tolu na faatino ai le galuega ua iloa ai, e toatele e lei oo atu aemaise lava i le itupa o alii.
O le aso 25 i le 27 o Novema sa faia ai le faainu vai ma fualaau ae o le vaiaso nei o loo toe faaauau ai i le manao o le matagaluega ia faasopolia uma tagata o le atunuu.
O se suesuega na faia i le tausaga e 2007 na molimauina ai le toe siitia o le numera o tagata e maua i le ma‘i mūmū, lea a tuai ona togafiti ma titina ia mate le anufe, e maua le tagata i le tutupa o vae ma lima, faapea ma itutino sa e oo i susu o tamaitai.
O le suesuega lea na iloa ai le aafia o se vaega e tusa ma le 47 pasene o le faitau aofai o le atunuu. O le faaiuga o le vaiaso na tea nei na toe agiga ai i auala o faasalalauga se faatalauula a le Pule sili o le Matagaluega o le soifua maloloina le faletua o Palanitina Tupuimatagi Toelupe, ua logoina ai le atunuu e lei agai e faatino lea faamoemoe, ina ia o loa e inu ni a latou fualaau ma vai.
O le popolega o le matagaluega ona e tusa lava pe ua inu le fia afe o tagata, ae afai e iai tagata o loo nonofo ai anufe o le mūmū, o le a lē mafai lava ona tineia le gasegase ma o le a vaaia pea nisi o aafia i le tutupa o vaega o o latou tino.
O le itupa o alii o loo faaalia e le tamaitai pule sili o loo lē faamaoni i le faainuga fualaau ma vai, aemaise i latou o galulue ave taavale. E iai le talitonuga o le tele o taimi o alii ave taxi ma ave pasi ma ave masini i galuega o le pogai o le lē maua o se avanoa.
O tagata matutua ma le au talavou e tasi le fualaau lapoa ma fualaau ninii e iva e inu faatasi, ae o fanau laiti ma pepe ua ta‘i tausaga le matutua e inu le vai suavaia.
O le toatele o tagata sa inumia a latou fualaau e aafia i le niniva o le ulu ma oso le fia moe, ma o le talitonuga o le aogā lea o le fualaau.
O le anufe o le mūmū e feaveai e iniseti o namu, ma o le mafuaaga lea o loo fautuaina ai pea le atunuu e faamamā autafa o fale mai atigi fagu ma atigi apa poo pa‘u taavale faapea alavai o laoa ma maota, ona o ni vaega e nofo ai le suavai ma tautuufua ai namu. O vaivai to‘a foi isi vaega e nonofo ai namu.
