Ua leva ona loma le faamoemoe o le alalafaga o Leauvaa i Brisbane nei e pei ona tuufaatasia ai alo ma tamafanau a le alalafaga i le po o le Aso Toonai, 27 o Iulai. Sa valaaulia aiga, uo ma ē masani ina ia lagolago atu i le faamoemoe, ma na faafiafiaina le komiti ma le mafutaga i lea afiafi.
E ui lava ina aumau i nei atunuu, ae susue lava le faamalama ma tepa i lona nuu moni. “Na amata le mafutaga a Leauvaa i le tausaga 2008 a o loma le faamanatuina o le selau tausaga o le alalafaga talu ona omai mai Savaii si o matou nuu,” o le saunoaga lea a le peresitene ia Salā Kelemete Tito na faafoeina mai le mafuataga i lena taimi e oo mai lava i lenei tausaga.
O le masina o Setema o le 2008, na tuuina atu ai se fesoasoani mo le faamoemoe i Samoa e tusa ma le $20,000.00, ma sa lei gata ai le logologo puialii a le peresetene ina ia faamausaliina pea lenei mafutaga taumafai ma ua pei lava o se aiga e tasi nei tagata e ala i le lotogatasi ma le galulue faatasi.
Sa faia se sailiga seleni i le afiafi o le Aso Toonai, 27 o Iulai auā le toe faafouina o le malumalu Katoliko i Leualesi i Leauvaa.
Mo le silafia e tolu falesa Katoliko i Leauvaa, e tasi i le aai ae lua i le nofoaga o iai faatoaga lea o loo iai le falesa Katoliko i Leualesi.
Sa faamalieina le auvalaaulia i le mālie o musika a le DJ, le afioga ia Muliagatele Chong Nee ma le vaega, lea na faaosofia ai tagata uma i le alofa ma foaiina ai se seleni e tusa ma le $7,900.00. Sa fai ma Fofoga o le po le tofā a le alii matua ia Tunai Vaa.
O le Komiti Faafoe o loo tutū i le foe o lenei tausaga 2013 o loo iai le Peresitene o le Afioga ia Salā Kelemete Tito; o le Sui Peresitene o Salā Lafaele Eliepa; o le Failautusi o Neetia Moli, ma le Teutupe o Ps Falani Feo Molī.