Sa vave ona maua le fesoasoani mo leoleo i le sailia o ē na faatupuina le faalavelave matautia, na faapāina ai ni pomu ma talepe ai le faaiuga o se malafoni na semanū e faaiuina ma le matagofie, le Boston Marathon i le afiafi o le Aso Gafua o le vaiaso ua tea. O se faalavelave na toe lalaga ai lagona faanoanoa ma le tiga o tagata uma o le malo tele, a o toe tomanatu i se mea matautia foi faapea na tulai mai le aso 11 o le masina o Setema i le tausaga 2001.
O nisi o meapueata mo le saogalemu i le auala tele faapea meapueata a nisi lava o tagata sa iai i le taimi tonu na tupu ai le faalavelave, na tuuina atu i leoleo ma amata ai loa ona faasalalau solo ata o ni alii talavou se toalua, ma lolofi ane ai le tele o faamatalaga ma molimau, mai ia i latou e iloa tonu nei alii.
O i laua uma o se auso, ma e tusa ai ma lipoti ua tapenaina nei e le Setete o Massachusetts ni moliaga o lenei auso, atonu e amata mai moliaga o ni faiga faatupu faalavelave i totonu o le atunuu (federal terrorism charges) e oo atu lava i ni moliaga tau fasiotitagata (murder case).
O le afiafi o le Aso Tofi na maua ai e leoleo le alii matua, ae na uma ai lava lona ola ina ua lavea tonu i se pulufana a o faia ni a latou taugafana ma leoleo i le taumafaiga e pueina lenei alii. O le alii laitiiti o le auso ua molia nei, na faatoa maua e leoleo i le afiafi o le aso na sosoo ai, Aso Faraile, ma o loo ola mai lea alii e ui o loo iai i se tulaga tigaina i ni manu‘aga foi mai pulufana, o loo taoto nei i lalo o le puipuiga a leoleo i le falemai i Beth Israel Deaconess Medical Center.
Dzhokhar Tsarnaev, 19 tausaga, i lona ata ina ua mavae lona faauuga mai le Cambridge Rindge and Latin High School (photo – Robin Young/AP)
O Dzhokhar Tsarnaev ua 19 ona tausaga, ae tusa ai ma lipoti, pe ā o le 10 pe 11 o ona tausaga na malaga ane ai lona aiga i le Iunaite Setete. I nisi o molimau o loo ta‘ua ai le oo mai o lenei aiga i Amerika o ni tagata sulufai. O Dzhokhar, e faamatalaina faapea o se tamaitiiti e alofagia e tagata, e lē mimita pe fia lauiloa. Sa taalo soka i le aoga, ma na tofia foi e avea ma kapeteni o le au pii a lana high school, ma iu ai ina manumalo i se sikolasipi e tusa ma le $2,500 e totogi ai lana aoga.
Sa pei lava lenei tamaitiiti o isi uma tama ma teine talavou i Amerika, ma ina ua oo i lona tausaga mulimuli o le aoga, sa auai atu foi i le siva a le vasega faaiuaso (senior prom) ma faapea ai lava ona auai atu i isi pati a ana uo mai le aoga. E lei leva ona maua lona tagatānuu poo lona sitiseni mo le Iunaite Setete o Amerika.
Na ta‘ua i nisi molimau, o se tama e atamai tele i le aoga. Peitai e iai foi lipoti o loo faamaonia ai, sa tau faaletonu nisi o mataupu a Dzhokhar a o aoga i le iunivesite, le UMass Dartmouth, ma e tolu suega e lei pasi ai nisi o ana mataupu. Ae o le mau a le toatele, sa vaaia pea le fiafia o lenei alii ma tele ana uo i le iunivesite, ma i le lipoti a se tasi nusipepa i Amerika, o loo ta‘ua ai faamatalaga a nisi o ana uo, e latou te ono tulai e molimau i uiga lelei o lenei tama talavou.
Na faamatala se tamaitai sa la vasega faatasi, o Sierra Schwartz, o Dzhokhar o se tama e faaleuo ona uiga, e filemu, e leai ni ona uiga malolosi, e toafilemu lava ona uiga ma lona leo i taimi uma. Ae o se tama foi e mālie ma fiafia e faauo ma isi tamaiti, e tatau lava ona iai sana uo e la te nofonofo faatasi ma aai i le taimi o le lunch. E leai ma se taimi na tau matauina ai e ana uo ni ona uiga fouvale pe fia faatu‘iese mai isi tagata.
O le po o le Aso Lulu o le vaiaso lava lea a o vevesi le setete i le tau sailia o ē na faapāina le pomu i le Aso Gafua, sa vaaia ai e nisi tamaiti aoga a le UMass Dartmouth le alii o Dzhokhar o iai i se pati, ma e leai se tasi na masalomia auā na vaaia lava lona toafilemu (“relaxed”) i lena po.
I tusitusiga a Dzhokhar i lana itulau i luga o se social networking site faa-Rusia e ta‘ua o le Vkontakte, o loo ia ta‘ua, a o lei siitia ane i le Iunaite Setete, sa aoga i le School No. 1 i Makhachkala, o le laumua o Dagestan, ma sa ia tusia ai o ia e tautala i le gagana Chechen, le gagana Peretania ma le gagana Rusia. O loo ta‘ua ai foi o lana moemitiga autū lava, ia maua sana galuega lelei ma tele ana tupe (career and money).
Fai mai ana uo ma ē sa latou aooga faatasi, e latou te lē manatua se taimi e faapea na faailoa ai ni manatu poo ni lagona o lenei alii e tusa ai o mataupu faapolokiki.
Na ta‘ua e i latou o loo galulue i le aoga e aoga ai lenei alii o Dzhokhar Tsarnaev, o le Aso Lulu o lena lava vaiaso, sa agai lava lenei alii i lana faasologa masani, sa iai i le fale taalo mo ana toleniga, ma faasolo atu ai lava i lona potu e moe i lena afiafi, ae o le taimi lea o loo vevesi solo leoleo e tau tuufaatasi uma ata ma video o lenei alii ma lona uso, ma tau saili ai i laua.
Sa faia se faatalanoaga i le telefoni a le nusipepa o le The Globe ma se tasi o tausoga o nei alii, o Zaur Tsarnaev e 26 ona tausaga, ma na ta‘ua ai, e iai lona talitonuga o le alii matua, o Tamerlan na faaosoina le osofaiga lenei. Faapea mai Zaur, ‘sa masani ona ia lapataia lona tausoga le alii laitiiti o Dzhokhar, e faaeteete mai ia Tamerlan, e lē o lelei le olaga na ola ai.’ Foliga mai o lea alii matua, sa tele ina aafia i ni faafitauli. Fai mai Zaur, ‘o le tele o taimi e lē fiafia ai Tamerlan. E lē taitai ona vaai o ‘ata pe fiafia. E masani foi ona ia fasia lana uo tamaitai. Ma e lē o se tagata lelei.’
O Tamerlan Tsarnaev i nisi o ana toleniga i le faipelega i le Wai Kru Mixed Martial Arts center ia Aperila 2009 i Boston. Sa fusu i le paga mamafa (heavyweight) ma na ta‘ua lona manao e fia fusu mo le Iunaite Setete i se taimi o i luma (photo – BARCROFT MEDIA/Barcroft Media via Landov)
O Tamerlan Tsarnaev, ua 26 ona tausaga ma o ia e matua i le auso. O le 15 o ona tausaga na malaga ane ai lona aiga e faamautu i Amerika. Na faasolo lona olaga ma iu ina lelei i le taaloga o le faipelega, ma sa fai ma sui o New England i le tauvaga o le Golden Gloves i le 2009 ma le 2010. E tele masalosaloga, o ia lenei na faaosoina le osofaiga na faapāpā ai pomu, ae na ia tata‘i atu i ai ma lona uso laitiiti i lana faufauga na fai.
I le tausaga e 2004 ina ua mavae se tasi o fusuaga na manumalo ai Tamerlan, na faatalanoa e le “The Lowell Sun” lenei alii, ma sa ia ta‘ua ai, o ia e fiafia i le Iunaite Setete o Amerika. E fiafia i Amerika auā e tele atu galuega e maua ai nai lo Rusia. Fai mai e telē le avanoa e maua ai ni tupe se tele i Amerika pe afai e naunau le tagata e faigaluega.
O se tasi o faiaoga o le alii o Tamerlan, na faaali sona manatu e faapea, na te manatua lenei alii o se tamaitiiti e ese le faaaloalo ma talenia, e lē gata i ona tomai i le taaloga faipele, ae poto foi e ta le piano ma le vaiolini.
Peitai, i lalo ifo o na molimau e tele i uiga lelei o se tagata faaaloalo ma le uiga tamalii, ae o suesuega loloto na agai i ai le au atamamai e matuā vailiili ai le faagasologa mai o le olaga o lenei alii o Tamerlan i ana meafai o aso taitasi, ua amata ona lagalaga a‘e ai le isi itu pogisa o lenei alii. E toatolu ni tamaitai e masani ia Tamerlan, na fai ni a latou faamatalaga i le NPR e faapea, o se vaimea o le 2008 ma le 2009 na amata ai ona latou matauina ni suiga i lenei alii, ua amata ona naunau atu i le faatuatuaga Mosalemi. Ta‘ua i molimau a na tamaitai, sa latou matauina ua amata ona iai uiga pulepuletutu o Tamerlan i lana uo tamaitai, ma sa ia faatonuina foi lana uo tamaitai ina ia pupuni ona foliga e pei o tu a fafine Isalama, ma sa manao foi ia liliu lana uo tamaitai i le lotu Isalama.
I le 2009, na taofia ai e leoleo Tamerlan i se moliaga o lona faaoolima i lana uo tamaitai, ma e iai le talitonuga atonu o le moliaga lena, na mafua ai ona lē talia ana taumafaiga e maua sona sitiseni i le Iunaite Setete.
O nisi foi o faamatalaga na maua mai se tusitusiga sa faia faatasi ma ni ata na tuufaatasia, ma o loo tusia ai e le alii o Tamerlan se faamatalaga i lalo o se tasi o ona ata e faapea, o ia o se tagata e matuā mapolotu lava. Sa ia tusia o ia e lē inupia ma e lē ulaula foi, ma sa ia ta‘ua ai o aso nei ua lē o toe iai ni mea lelei o toe faatāua e tagata, ma ua lē o toe mafai e tagata ona pulea lelei o latou olaga. O inā foi na ta‘ua ai e lenei alii e faapea, ‘e leai ma se tagata i Amerika e la te uo mamae.’
E tele lipoti o loo ta‘ua ai e iai le toalua o le alii o Tamerlan, ma ua toatasi se la tama. O le tausaga e 2008 na muta ai ana aoaoga, ma e foliga sa suesue le alii mo mataupu tau suetusi.
Na maua foi i sailiiliga se lisi (wish list) o mea e manao le alii o Tamerlan e fia fai sa ia tusia i luga o se tasi o website le Amazon, e aofia ai ma nisi o tusi e fia faitau ma suesue i ai lenei alii. E aofia ai tusi i auala e sui ai foliga mo ni faiga taufaasese (identity fraud), o le tusi a Dale Caregie i le auala e maua ai uo ma taa‘ina ai tagata, ma le tele o isi tusi e iai ni sootaga i Chechen, e aofia ai ma se lomifefiloi ma se tusi e a‘oa‘o ai nisi o faaupuga.
E toatele nisi o le auaiga o lenei auso, sa faaleo o latou lagona ina ua faatalanoa e le tele o nusipepa ma televise i Amerika ma Rusia. O lagona o le lē talitonu i le mea ua fai e nisi o o latou aiga, o lagona mafatia, lagona masalosalo i mafuaaga ua faia ai e tama lenei mea, o nisi foi ua faailoa lo latou feita i le ta‘uvalea o le igoa o le aiga i lenei mea ua tulai mai.
O mātua o nei alii, o le tamā o Anzor Tsarnaev ma le tina o Zubeidat Tsarnaev, ma e iai ma o la tuafāfine e toalua. A o lei faimalaga mai le aiga i Amerika, o le tamā ia Anzor sa galue o se loia, ae ina ua iai i Amerika sa maua lana galuega o se inisinia taavale. O le tina ia Zubeidat sa faigaluega o se tasi e teuteuina foliga (cosmetologist). O le taimi nei ua toe foi mātua ma nonofo i Rusia.
Ina ua faatalanoa mātua o nei alii, sa la faaalia ai e lē o talitonu e mafai e le la fanau ona faatupu se faalavelave faapea ua maliliu ai ni tagata ma le toatele ua faamanu‘alia. E talitonu le tamā e tusa ma lana molimau, na o le Atua lava o loo silafia mai le tagata tonu na faatupuina lenei mea, ma e malosi lona lagona e ese se isi tagata na unaia lana fanau e faia lenei solitulafono.
E lei mautinoa se taimi o le a tulai ai lenei alii talavou, le alii laitiiti o le uso i le faamasinoga e tali i moliaga, auā o loo iai i se tulaga tigaina i ona manu‘aga i le falemai o loo taofia ai nei.
