Lē au le taumafai a Destanee Aiava

Destanee Aiava - Photo: Australia Tennis
Destanee Aiava – Photo: Australia Tennis

Ua lē manuia le taumafai a le tamaitai tenisi talavou o Destanee Aiava i le Australian Open (AO) i Melepone.

Na ofi Destanee i le taaloga autu, ae peitai na faia’ina i lana taaloga muamua na fetaui ai ma Madison Keys o le USA 2-6 2-6.

Na taalo foi i le Doubles a tamaitai na paga ai ma Naiktha Bains o Ausetalia lava, ae na faapea ai foi ona toilalo i le taaloga muamua. Ua faaletonu ai ma le taumafaiga a le tamaitai Samoa e siiita lona tulaga i totonu o le taaloga talu ona liliu polofesa i le 2016.

O le tolu ai lenei o tausaga o taalo Destanee i le Auatralia Open o le tolu ai foi lea o tausaga o faia’ina i le taamilosaga muamua. O le taaloga ma Madison Keys o le n numera 17 i Melepone na faailoa ai le matua eseese o le tulaga o loo iai Aiava ma tamaitai maualuluga o le taaloga.

E lei iai foi ma se suiga tele i lona tulaga i totonu o le ATP a tamaitai talu ona liliu faapolofesa. I le 2016 na ausia ai e ia le tulaga 516 i le lalolagi, ae ua pa’u i le 547 i le lisi a le ATP.

I le taaloga ma Keys na matua pulea e le Amerika tulaga uma o le taalgoa. E na’o le 60% o ana ‘ai na manumalo mai le “serve” faatusa lea ia Keys e ova ma le 80%. E faa-ono ona sese faalua le “serve” i le “double fault” faatusa i le leai a Keys.

A’o le fuainumera taua tele o le aofaiga o taaloga na manumalo e na’o le 4 faatusa i le 12 mo Keys.

E fai lava si vava mamao o le agavaa a le tamaitai talavou ma le Amerika i le taaloga. O Keys foi e lē o se tagata faatauvaa, ua au o ia i le Quarter finals o le Australian Open, e toalua isi ua faia’ina ia te ia, toatolu ia Aiava.

E ui i ia faigata ae o Destanee e na’o le pau lea o le tamaitai Samoa i le lalolagi atoa o loo taalo faapolofesa i le lalolagi i le Tenisi. O ana taumafaiga i le Australian Open i le 2019 e fesoasoani lea i lana tupe maua mo le tausaga atoa.

E $75,000 Ausetalia na ia maua mo le Singles ma le $10,000 na maua i le Doubles, o seleni ia e maua e i latou e faia’ina i le taaloga amata  o le a faaopoopo lea i le $213,000 o le atoaga o ana tupe manumalo ai i le taaloga talu ona taalo faapolofesa i le 2016.

E lē o se tulaga tele lea aua o iina e faatupeina ai tulaga uma o lana taalo e iai le faiaoga, malaga atu i taaloga i isi atunuu ma le tele o tulaga e faatino i lana nei matata. Faatusa lea ia Madison Keys o le a ia maua le $460,000 i le quarter final i Melepone. Na’o seleni e moe miti iai Aiava mo le taimi nei.

Mo le faagasolo i luma o lana taumafai e ao ai ona matua galue o ia i tulaga uma o lana taalo. E lē o iai se eseesega tele o le 2016 ma le 2019 i lana taalo.

O se tulaga taua tele lea e ao ona a’oina e le faiaoga a le tamita’i tenisi.

O le isi ana galuega tele o le a fai o le saili lea o Taamilosaga (ATP Tournaments) e taalo ai ma fausia ai lona a’e a’e i le apefai agai i luga i le lisi o tamaitai taalo i le lalolagi.

E na’o le pau lea o le auala e maua ai le lelei o lona tulaga, ae o se ala e faigata ma mamao tele.

E faato’a vaaia se manuia tele pe a ausia e ia i luga atu o le 200 i le lalolagi. E fai lava le vava mamao o lea tulaga ma le tulaga 547 o loo nofo ma ia i le taimi nei.