I le tele o finagalo faaalia o lea aso mai ia i latou na auai ma molimauina le faamoemoe na faagasolo aemaise foi o ē na tapenaina ma faamaopoopo, e mautinoa ai o se polokalame sa ausia tonu le fuafuaga ma le autū na tulimataia.
O le Womens Pamper Day poo le aso na faapitoa mo le faalaleleiina atili o tina ma tamaitai i vaega eseese o latou tino ma le soifuaga atoa, aemaise foi isi uma auaunaga aogā mo le komiuniti, sa faatautaia i le maota poo le hall a le EFKS East Tamaki i Dawson Road, Flatbush, i le Aso Toonai, 24 o Novema, mai lava i le 10am i le taeao e oo i le 2pm i le aoauli, ona see atu ai lea mo taaloga, seia pā‘ia le 4pm i le afiafi.
E tusa ma le 500 i le 600 le mamalu o le atunuu na auai atu e sapaia le faamoemoe, e pei ona faasafua mai ai le valaaulia i soo se tamaitai ma soo se tina, ina ia afifio atu e talia lelei nei faamanuiaga mo latou.
Na amata le polokalame i le tatalo ma sina upu puupuu na laugaina e le susuga i le Faafeagaiga a le EFKS East Tamaki, Rev Eperone Futi, sosoo ai loa ma le saunoaga puupuu a le tamaitai o Helen Wong mai le vaega a le Breastscreen Aotearoa.
Sa faapupula atili ai e Helen le faamoemoe tonu o lea Aso, ina ia faatino soo se gaioiga e avatu ai se tausiga faapelepele i tina uma ma tamaitai e pele i o tatou olaga, aemaise le unaia o le faaaogā lelei o le auaunaga o loo faia e aunoa ma se totogi, o le siakiina lea o susu o tamaitai (se‘i tulou), e pei ona iai le pasi sa paka ai lava i le lotoā a le EFKS East Tamaki. O lea auaunaga e faia fua, mo tina uma ma tamaitai o le Pasefika ua aulia le 45 – 69 tausaga o le soifua.
E tele isi meafai na faatino i lea lava Aso, e pei o le faataitaia o le auala e gasese pe kuka ai taumafa e aogā mo lo tatou soifua maloloina (Healthy Cooking), o le vaega a le Pacific Heartbeat na nafa ma na faataitaiga.
Na fai foi le Zumba auā le faamalositino; sa faataitai e le vaega o le Floristry School a le MIT auala eseese e fatu pe tui ai ni teufugalaau matagofie; o faaliga o laei i sikaili eseese a le vaega o le Kila’s Style, aemaise foi o ni tautalaga poo lauga e faagaeetia lagona (inspiring talks) na folasia e Jo Donson ma Buck Stowers.
O le isi itu sili ona tāua i lea Aso, auā sa auai atu foi vaega eseese o loo latou faalauiloaina ma unaia polokalame aogā tau le soifua maloloina, o polokalame tau a‘oa‘oga.
O se taimi lelei na maua ai le avanoa o tagata lautele o le komiuniti e fesiligia ai ni fesoasoani e aogā poo ni vaifofo foi ni faafitauli ma faaletonu o loo aafia ai o latou soifuaga, e pei o aafiaga i taaloga faitupe, lea sa tautuaina e le auaunaga a le Problem Gambling Foundation NZ.
Sa faatāua foi le tulaga saogalemu o fanauiti, ma sa faia nisi o faataitaiga faatino aemaise ata faalauiloa, o auala eseese e puipuia ai ola o fanau mai le malelemo i vaitaele ma le sami, faapea foi le puipuia mai le lavevea i taavale e pei ona maumau ai le tele o ola o nai fanau o loo lavevea i luma lava o latou fale, a o faasolomuli le taavale. Sa faataitai foi le auala e tatau ona faamau lelei ai fusipau o nofoa puipui o le fanauiti i totonu o le taavale.
E pei ona ta‘ua, na mae‘a le polokalame sa faatino i totonu o le hall a le ekalesia, ona me‘i atu lea i le paka o loo i autafa ane lava, ma faagasolo ai nisi o tauvaga o taaloga e pei o lakapi pa‘i ma le basketball.
Pe tusa o le 5pm i le afiafi o lea lava aso, na taunuu ai le Pulenuu o Aukilani, Len Brown ma tauaao atu faailoga ia i latou sa auai i taaloga. Na oo lava le polokalame i le 9pm i le afiafi ina ua faasolo ina goto ifo le lā, ona ki loa lea o molī o le laau Kerisimasi, e faamae‘a ma taualuga i ai lea Aso fiafia ma le faapitoa mo le komiuniti.
E momoli ai le faafetai faapitoa i le susuga Rev Eperone Futi ma Pauai Afele mai le EFKS East Tamaki, o Jacks the Butcher ma le faleoloa o le SuperValue i Dawson Road, le Otara/Papatoetoe Local Board, Audrey Williams ma le komiti o tapenaga mai le East Tamaki Healthcare, Breastscreen Aotearoa, Mangere Community Health Trust, Arthritis NZ, Problem Gambling Foundation NZ, Safekids NZ ma le WaterSafe NZ.
Ua faamaonia le muagagana, “o le pulupululima faatasi e māmā ai se avega” (many hands make light work).
