Mai lava i le taimi na amata ai ona uo Lola ma si alii o Feausi, e matua tetee lava matua o Lola i lea mafutaga.
O nisi taimi e tiga lava ona iai si tama o Feausi o loo tafao atu ia Lola ma ona tuagane, ae lagona atu lava e Feausi le ote ma le tomumu mai o le fafine o Sieni i totonu o le latou fale i le ita i lana fanau i le faataga soo o le la mea mativa ia o Feausi e alu atu i lo latou fale.
E vaai faaletagata ma vaai maulalo le tina o Lola i le aiga o si tama o Feausi. E ote le fafine o Sieni i lana tama i nisi aso ma faapea atu, ‘Kafefe ia te oe, poo fea se tulimanu o le faleoo o le aiga Masunu o le a e faapiolua ai ma tagi ai ou mata i le umukuka e fai meaai a makua o Feausi.’
O tala nei ma le feita o le aiga o Lola, ua tele ai foi ina pisa soo Lola ma si ana uo o Feausi, aua ua tau sisii lima o si tama, e le faapea ua faaitiitia lona alofa ia Lola, ae ua matua faigata lava ia Feausi ona iloa manino atu se lumanai mautinoa e oo i ai le la faigauo, ona o le malosi o le inoino o le tina o Lola ia te ia ma si ona aiga faatauvaa.
O le lē faigofie ona saoloto o o la lagona i le la faigauo, e iai lava nisi taimi ua tau faaisaisa ai foi le la mafutaga, ona e ui i le faavalea o le alofa o Lola i lana manamea, ae ua amata ona ia fesiligia soo si tama o Feausi, “O le a se tele o lou alofa mo au?”
O Feausi e le o se tama e tautala soo, ma e seasea faia ni ana tala se tele i taimi uma e vevesi ai. Peitai ua avea ma itu e atili ita ai Lola, ona e peiseai ua ia faauiga le tau le tautala o Feausi e faapea, ailoga o ano moni ane le tama ia te ia.
O le tele o taimi a vevesi Lola ma lona tina, ae sau ai pasae lona ita i si tama o Feausi. Peitai i le mafaufau o le tama, na pau lea o le auala sili na te onosaia ai nei mafatiaga uma, o le nofonofo filemu e le faia sana tala tele.
Ua faasolo pea tausaga, ma ua faaiuina aoga a Feausi i se tasi o aoga maualuga i lona atunuu, ma filifili ai e fia faaauau atili ana aoaoga i Ausetalia. Ona mafaufau lea o Feausi, a o lei alu ese mai Samoa, ua tatau loa ona faatoai lona fanoga ia Lola ina ia faamautinoa mea uma a o lei alu ese.
O le afiafi tonu lea sa vaai e Lola le latou faleoloa i le aso atoa ona sa pisi le ulugalii i mea a le latou ekalesia. Na agai atu Feausi ma sasalu loa le tomaaga i le teine, “Lola, e le o au o se tagata e mau upu. Ae pau le mea moni ou te fia tau atu, ou te matua alofa faamaoni ia te oe, ma e na o oe lava le tamaitai ou te fia mafuta i ai e faavavau.
Pe afai e te talia mai au, ou te folafola atu o le a ou tausia oe i aso uma ta te ola faatasi ai. Ou te iloa e le fiafia lou aiga ia te au, ae o le a ou taumafai malosi e faaleleia lena faia ma i laua. Lola, e te malie mai ta te faaipoipo?”
Na maligi loimata o le tamaitai i le fiafia a o taumafai e faaleo atu lona talia atoatoa o le manao o si ana uo. Ma e ui i se lē fiafia o le ulugalii ina ua faalogo ua ioe le la tama ia Feausi, ae ua leai se mea e la te toe mafai, ua matua maumauai lava le teine ma lana uo o le a faaipoipo.
Ua malilie nei matua uma e toalua o le a faataunuu pea loto o le fanau, peitai ona o lea o le a sauni malaga Feausi mo Ausetalia, na manatu ai matua e sili pe a fai muamua na o le faamau a o lei alu ese Feausi.
Ua alu ese atu nei Feausi i Ausetalia mo le faalauteleina o ana aoaoga, ae ua nofo pea Lola i Samoa ma faigaluega ai i se tasi o ofisa o le malo i Apia. E toetoe lava o aso uma e talanoa ai le toalua lenei, a le o le telefoni poo le imeli. Sa lei asa foi ma ni faigata, peitai sa malosi lo la alofa ma finau maumauai ai pea ia aua lava nei o la faavaivai i le la mafutaga ua amataina.
Ae paga lea, na tupu se faalavelave tau taavale i se tasi aso ma sa manua tigaina ai si tamaitai o Lola a o agai atu i lana galuega. Sa tau masalosalo fomai pe faamata e toe foi i se lelei ona manuaga, ona ua leai se malosi o si tamaitai e na te toe iloa pe malamalama ai i mea o faia e tagata.
E toetoe atoa le lua vaiaso o moe pea le teine ua le malamalama, ae ina ua toe faasolo ane lona malosi ma toe ala, sa ia vaaia ai ona matua o loo saofafai atu i autafa o lona moega. E tilotilo ae le teine, o loo tagi si ona tina ma uu lona lima, ma ua ia lagona le fia faamafanafana ane i ai, ae ua ia iloa nei ua leai se mea e na te toe mafai, ua leai sona leo. Ua na o le maligi o loimata o le teine ma tilotilo ae ma taumafai mai i ona foliga lana feau faamafanafana i nai ona matua.
Na oo ane le fomai ma faamatala i matua, ua telē se aafiaga o le faiai o le teine, o le mafuaaga foi lea o le leai o sona leo. Ua atili ai ona tagi le teine, ua tau lona mafaufau i lana manamea o Feausi, poo le a sona manatu ia te ia pe iloa le tulaga lae ua iai nei.
Ua tea i tua le teine i lona aiga, ae ua le toe lava sona malosi e toe foi ai i lana galuega, aua ua tausi patino o ia e nisi tagata i lona fale.
Ua na o le taoto lava ma tilotilo solo, ma o ona lima lava ua faaaoga e fai mai ai ni taga pe a manao e fia talanoa mai i lona aiga.
Pau le leo lea ua matua masani lelei ai Lola, o le leo o le telefoni i taimi uma e tatagi ai. Ma o taimi uma e tatagi ai le telefoni, e tau lava le mafaufau o le teine ai o si ana uo o Feausi lea e vili mai, ma ua atili ai ona tuia lona loto i le faalogo atu i le leo o le telefoni.
Sa matua augani le teine i ana uo ma lona aiga, ia aua lava nei logoina Feausi i le mea ua tupu ia te ia, ona e le manao e popole mai le tama a o alo atu i ana aoaoga. O lea na manatu ai loa Lola, o le a fai sana tusi ia Feausi, e faauma i ai le la faigauo ma tau i ai ua le toe manao e toe faatali umi atu ia te ia.
Na ave e le teine lana tusi i lona tina e lafo, ma ua toe faafoi atu i ai ma le la mama faamau sa tuu i ai e Feausi. Na pei a nofo le fatu o le tama ina ua taunuu atu le tusi a lana pele, ma e lei talia gofie e Feausi le fanoga o le teine, e ui i lona le mautinoa pe aisea ua sui faafuasei ai lagona o Lola.
Sa lei faavaivai Feausi ae ua na o le sosoo mai o tusi, o imeli ma telefoni, peitai ua leai se mea e mafai e le teine, ua na o le tagi lava ma tilotilo atu i le telefoni o loo tatagi, ae ua le mafai ona toe tautala atu i ai.
E oo foi i matua o Lola ua la lagona le alolofa i si a la tama, ona manatu ai lea e sili pe a see atu i se isi mea e nonofo ai, pe atonu e tau faagalogalo atu ai e le teine mea e tele i lo latou nuu na te manatua ai lana uo, le alii o Feausi.
Ua see atu nei le aiga i Amerika Samoa ma faamautu ai, ma ua taumafai nei le teine e aoao lana gagana e faaaoga ai taga. O aso uma e faamanatu ai pea e Lola i lona loto, ua tatau ona ia faagalo ia Feausi.
Peitai na faateia Lola i se tasi aso ina ua tau ane i ai e se tasi o ona tuagane, na la feiloai ma Feausi lea ua taunuu atu i Amerika Samoa, ma o le auga o le faiga malaga o le fia saili pea ia te ia.
Sa talosaga maumauai le teine i ona tuagane, ia aua lava nei tauina ia Feausi le tulaga lea ua iai o ia, ma talu mai lena taimi, ua le toe maua lava e le teine se tala mai ia Feausi.
Na atoa le tausaga ua le toe iai se fesootaiga, ma o le manatu o Lola ai ua toe foi Feausi i Ausetalia poo se isi atunuu. Peitai i se tasi o aoauli o se Aso Toonai, ae agai atu le tuagane laititi o Lola ma tuu i le teine se teutusi, o loo iai i totonu se tusi valaaulia o se faaipoipoga, o le faaipoipoga a le tama o Feausi.
Na faafuasei ona lagona e Lolona ua pei e pe atoa lona tino a o ia sei ae le tusi, ma ua lagona foi lona lia, pe faapefea ona fai e Feausi lenei mea ia te ia.
Ua tatala le tusi valaaulia ma na matua faateia Lola a o faasolo lana faitau i upu o loo tusia i le valaaulia, ina ua oo ane lana tilotilo i le pito o loo tusia ai igoa o le tama ma le teine faaipoipo, auoi tafefe e, o lona igoa lava lea e tusi ai, i le suafa o le tamaitai faaipoipo.
Ua ea ae le teine ma tau sasalu atu lana fesili i lona tuagane poo le a lenei mea, ae ona vaaia loa si ana manamea o Feausi, ua tootuli ifo i ona luma.
Sa fai atu e Feausi ana taga e tau atu ai ia Lola e faapea, “E atoa le tausaga o ou aoaoina le gagana lenei o taga. Lola, e le o galo ia te au la ta tautoga na fai.
Ua ou iloa ua leai sou leo, ae o au lea o le a avea ma o ta leo. Lola lau pele, ou te alofa faamaoni ia te oe e oo mai le faavavau.” Na uma ona fai atu taga nei a Feausi, ona ia toe faamaulu lea o le mama i le tamailima o le teine, ma sogi umi atu i ai.
Ua na o le laulaututu o matua o le teine ma ona tuagane ma maligi o latou loimata, a o tilotilo atu ma molimauina lenei mafutaga mafana, ma na faatoa toe vaaia foi lea e le aiga, ni foliga ataata o le teine o Lola.
