O le feau lea mai le Pule o le Aoga a Don Bosco, Fr. Mosese Vitolio Tu‘i, o le lauga na saili mo le Faauuga a le Vaega mo Mataupu Faatekonolosi ma Mataupu Faamatata Eseese, a le Iunivesite Aoao o Samoa (NUS).
O le faamatalaina e Fr. Mosese o le auga atoa o lea alagaupu e faapea, afai e te faamaoni e pei foi ona iai i totonu o aoga, i le faatinoina o meaaoga, faamaoni i soo se vaega o itu tau i le aoaoga, e lē taumate lou faamanuiaina.
“O lou faamaoni, punouai i le sailiga o le poto ma le atamai, ina ia maua ai se lumanai manuia.”
O lau tautua lea i ou mātua o loo nofo tapuai, ina ia iu lelei lau tausinioga o loo e alo atu i ai, o le faaopoopo lea a Fr. Mosese.
“Ae a fai e te usu mai i le taeao i le aoga, e tafao i le maketi, tietie pasi, e lē iloa poo le ā le ituaiga lumanai e maua ai.”
Peitai i le faamoemoe e pei ona faataunuuina e ala i le faauuina o i latou ua manuia taumafai i lea aso, na momoli ai le faamalo a Fr. Mosese e le gata o le aufaauu ae faapea foi i mātua ma aiga, o i latou na faia le faiva o le tapuai, a o alo a latou fanau i aoaoga i lea tausaga.
“O lea ua iu le tausinioga, ua malo onosai, malo tauivi, malo le tau, faafetai o lea ua taulau o le fa’amoemoe e pei ona outou moemiti i ai.”
E silia ma le 400 i latou na faauuina ma maua a latou Tusipasi aemaise o faailoga o le Tipiloma.
O Tusipasi e aofia ai Tusipasi mo le faafailelega & Tausia o Laau Toto, Faaleleiga ma le valiina o Tino o Taavale, Tusipasi Tausaga 2 i le Faainisinia Faaeletise, Tusipasi Tausaga 2 i le Fausaga ma Faakamuta, Tusipasi Tausaga 2 i le Gaosiga o Uamea mo totoga o Masini, Tusipasi Tausaga 2 o le Faapalama, Tusipasi Tausaga 2 i le Fausiga o Pusa ‘Aisa & Ea Malulu, Tusipasi tausaga 2 i le Sooina o Uamea, Tusipasi o le Faaturisi ma Auaunaga Faatalimalo, Gasesega o Taumafa, Auaunaga mo Taumafa ma mea Inu, Auaunaga Faaofisa ma le Faatalimalo aemaise o le Tusipasi i le Mataupu o le Faakomepiuta.
O Faailoga Tipiloma e aofia ai le Tipiloma i Faaleitio & Fesootaiga. Tipiloma Faatusitala, Tipiloma o Galuega Faaofisa, Tipiloma o Faaturisi ma le Tipiloma o Faapisinisi.
I le Itu tau i Faailoga faapitoa na maua ai e le tamaitai o Theresa Faleavao Wright le faailoga o lē ua faaao i ai le Vasega o le Faafailelega & Tausia o Laau Toto.
O lea faailoga o se faamanatu i lē ua fai i lagi lana folauga le susuga ia Albert Peters.
O le ipu a le Asosi a Tusitala i totonu o Samoa, na maua e le alii o Joshua Lafoai ma o ia foi lea na sili i le Vasega Faatusitala.
O le faailoga na saunia e le Aoga Faamatata Eseese a Manukau na maua lea e Mercy Iafeta, o lē na sili i le Mataupu tau i le Faaturisi ma Auaunaga Faatalimalo.
Ae o le faailoga a le Afioga i le Palemia, o le Minisita foi lea o Turisi, na maua e le tamaitai o Maria Julily Fui.
O le Faletaalo a le Iunivesite i Lepapaigalafala lava na faatautaia ai lea faamoemoe.
