O le susuga ia Tala Pauga

O le susuga ia Tala Pauga

O loo i Samoa nei le alii o Tala Pauga, lea na logologoa lana gaioiga lea na fai, a’o faia le saunoaga autu a le taitai o le atunuu, Tuilaepa Lupesoliai Sailele Malielegaoi, i le tatalaina o le ala vaalele faaopoopo a le Samoa Airways i Brisbane Ausetalia i le tausaga na tea nei.

Atonu o loo manatua pea e le mamalu o le atunuu le gaioiga a Tala Pauga lea na fai, e faapea, na taumafai e osofai le alii Palemia, e ala lea i lona taumafai e togi i le ulu puaa, atoa ai ma lona afifiina o ni feau tusitusia i tamai maa ma tauai agai i le nofoaga o loo tu ai le Palemia, a’o faaauau pea ona saunoa le Palemia i le saunoaga autu.

O Tala Pauga o loo i Samoa nei, ma o ia o se tasi o alii o loo taitaiina le vaaega a le SSIG o loo agai atu i le fale faamasino e lagolagoina le mataupu a le SSIG, i le latou tagi faasaga i le malo.

Talu ai nei na faia ai le fonotaga a matai o le afioaga o Manono, ma faatalanoa ai le mataupu faasaga ia Pauga. O nisi na iai le manatu atonu o le a faasala ai lea alii aua o lea ua i Samoa, peitai, e lei faia iai se gaioiga a le saofaiga a le nuu, ona na faamuamua ia I latou le nofo filemu, aemaise tuaoi e vase ai lo latou aia tatau.

E iai isi mataupu na faatalanoaina i le fonotaga peitai, o le mataupu lenei ia Tala Pauga, na eseese ai finagalo, ona e manatu nisi e faasala lea alii ona o le gaioiga na ia faia faasaga i le Palemia ina ua taunuu atu. Peitai atonu ua aogā le malaga mai o Pauga, se’i faafofoga ai le atunuu pe aisea lava na ia faia ai lea gaioiga ua ta’uleagaina ai lona tagata aemaise o le silasila mai o le lalolagi atoa ia Samoa.

Saunoa Pauga, o lana gaioiga e lē faapea na fai faasaga i le Palemia, o lana osoafaiga na fai ona o lona lē fiafia tele i faiga piopio, corruption lea o loo faia e le vaega faaupufai a le HRPP.

Faaalia e Pauga, o se alii mai Manono Tai, ua faauigaseseina e le tele o lipoti a le autusitala lana gaioiga na fai, ma ua ia fia faailoa atu i le Palemia, e lē faapea o ia tonu lea na faatatau iai lana gaioiga.

“Ou te fia faailoa atu i le Palemia o Samoa, o loo matuā iloga ona aafia i faiga faapolokiki a le malo lenei, o loo toatele tagata Samoa o loo nonofo i fafo ma Samoa nei, o loo aafia, ae e lē o pisa, e lē o mafai ona iai so latou leo e faaali ai o latou finagalo, poo mea o loo i totonu o latou loto.”

“E lē na’o lena foi, o loo matou nonofo ma matau mai, le tele o faiga lē talafeagai ma le piopio o loo fai e le faigamalo lenei, ma o le mafuaaga tonu lea o lo’u faia o lea tulaga.” “O la’u gaioiga, o lo’u tetee atu lea i faiga sese ma faiga piopio, ma na ou taumafai atu ia toso mai le finagalo o le taitai o le atunuu i mea lē fetaui toe sese, o loo fai e le vaega faaupufai a le HRPP, ma ua tatau ona fai le mea sa’o.”

Saunoa Pauga, o ana fuafuaga e lei faia i se po e tasi, ua leva ona fuafua lelei ana fuafuaga e fua i le taunuu atu o le Palemia o Samoa. “E toatele foi isi e lei fiafia ma autasi i la’u fuafuaga, ae mo a’u lava ia na matuā faamautuina a’u fuafuaga e faaataunuu pea le mea o i lo’u loto, ona o lo’u faanaunauga e tatau lava ona faaoo i le Palemia.”

Talu ai nei na faaalia manino ai e le failautusi o le faalapotopotoga o tagata Samoa i Brisbane i Ausetalia, lona lē fiafia i le auala na faaoo ai le lē fiafia o Pauga. O le faamatalaga a le failautusi, e matuā sese lava le auala na faailoa ai le lē fiafia o lea alii.

“Sa tatau ona faaui atu ia i latou ona o latou faatulaga lea o se taimi e feiloai ai le Palemia.”

Peitai e lē o le manatu lena o Pauga, fai mai Pauga o tusi ia na salalau solo i totonu o le nofoaga na fai ai le sauniga ma fafo o le hall, e faatatau i le Palemia ma ana faiga piopio, ma na faasalalau solo ma lona faamoemoe e faitau ai foi tagata na auai i lea aso. E tamau pea Pauga i le mafuaaga o lana solo tetee, ma na ia faaalia foi ua faalēaogāina moliaga o le faatupu vevesi lea na molia ai ia e leoleo Brisbane Ausetalia.