E iai kamupani i Samoa ua o latou faaaogā igoa o kamupani lauiloa i Niu Sila ma Amerika e faaigoa ai a latou faleoloa i Apia ae na faaalia e le Loia Sili, seiloga lava ua sau se faitioga mai fafo ona faatoa aloaia lea ma fai i ai se faiga.
O le tatalaga o le NPF Plaza i Savalalo na toatele na talanoa i le vaega o lenei faletele ua ave e le kamupani o le Farmers. O se kamupani tele i Niu Sila.
Peitai o le asia o lea faleoloa na iloa ai e lē o le Farmers i Niu Sila le faleoloa lea, e ui o foliga uma o le igoa i le amataga o le Farmers o loo vaaia i le faleoloa lea.
Na fesiligia pe aisea ua faaigoa ai le kamupani i le igoa o le faleoloa i Niu Sila pe iai se fesootaiga ae na faaalia e tamaitai o loo vaaia le faleoloa lenei e suafa ia Siolo, o loo i fafo le alii pule o le kamupani lea i Samoa ma e lē mafai ona fai mai se faamatalaga. O le faamatalaga foi lea a le tamaitai Saina lea e faatamo‘ea le faatautaiga o faatau i Savalalo.
Na iloa mulimuli ane o le kamupani lenei e faatautaia lava e le kamupani o le Coin Save le isi foi kamupani Niu Sila lea ua faaaogā foi lona igoa i faleoloa lava nei, peitai e leai ma se fesootaiga ma ia kamupani i fafo.
Na fesiligia le kamupani a le Farmers i Niu Sila ma o le tali na aumai, e lē o iai se latou lala i Samoa ma e lē o iai se fuafuaga e tatala se latou lala i lenei itu o le Pasefika.
O le lisi o faleoloa a le Farmers o loo manino ai na o totonu lava o Niu Sila o loo iai ona lala.
O le faamatalaga a le sui o le Matagaluega o Alamanuia, Pisinisi ma Leipa (MCIL) o tulafono e puipui ai igoa ma faailoga o se kamupani poo se faleoloa na o totonu lava o Samoa ma meatotino a Samoa e nafa ma le latou ofisa.
Peitai a iai se faitioga e aumai i kamupani i fafo ona faatoa mafai loa lea ona gaioi le latou ofisa e taofi. Faaalia e le MCIL atonu o tulafono faapea e talafeagai ma le Ofisa o le Loia Sili.
Na tapa se finagalo o le Loia Sili ma na faaalia ai e le Afioga Aumua Ming Leung Wai o le tele ia o kamupani ua faaaogā igoa o kamupani mai i fafo ma e iai le tulafono ae e pei ona ta‘ua e le MCIL, seiloga lava e iai se faitioga mai kamupani oi fafo ona faatoa fai lea i ai o se faiga. Ae a fua i galuega o loo feagai ma le ofisa e tele atu vaega tāua e tatau ona agai i ai nai i lo le tulituli o kamupani o loo faaaogā nei igoa.
Na fesiligia pe faafefea le taufaavalea i le au faatau auā e lē teitei faaaogā igoa lauiloa nei ae faaalia e le afioga Aumua e lē o se faafitauli tele lea tulaga i le taimi lenei.
