Laveai e le tama talavou lona aiga atoa – Peyton Siva

E na o le 13 tausaga o le alii talavou o Peyton Siva, ae na mafai ona ia suia i se tulaga sili ona mataina olaga o lona aiga, ma toe laveaia ai i latou mai ni tulaga matautia na semanu e maumau ai o latou ola ona o le malosi o olaga leaga na ola ai.
O le vaitaimi o le taumafanafana o le 2005, na fealuai solo ai lenei tama talavou sa na o le 13 ona tausaga i lea taimi, i le taavale a lona uso matua, e tau saili solo ai lona tamā ua atoa le vaiaso e lē iloa poo fea o iai. O se mea ua masani ai le aiga, i le alu ese o le tamā mo le tele o aso, ma ua amata foi ona lē toe ano i ai le aiga, sei vaganā le tamaitiiti o Peyton sa mamafa pea i lona mafaufau lenei olaga o loo iai lona tamā.
E telē le lamatiaga o le fealuai a Peyton i lena aso, auā e le gata i le lē saogalemu o magaala ia e fealuai ai, ae o lea foi sa fealuai i le taavale e aunoa ma sona laisene avetaavale. Na matau e le tamaitiiti le vaipanoa o fale e masani ona ia maua i ai lona tamā, o se nofoaga e nofonofo ai le tamā ma faaaogā fualaau faasāina ma maruana, o se nofoaga e matuā lē fia pupula i ai Peyton pe a alu e sue i ai lona tamā.
Ina ua foi le alii o Peyton ma ave lona tamā i le fale, sa fesili le tamaloa i lona atalii, pe aisea lava e tau alu atu ai fua e saili mai o ia. O le tali a le atalii, “Ou te fia fesoasoani ia te oe, ma ou te manao e te fesoasoani mai ia te au.” Na faailoa e le tamaloa i lona atalii ona mafatiaga o loo iai, ma ua manatu foi e fia pule i lona ola, auā sa mafatia le tamaloa talu ai ua tele masina e lē o toe maua sana galuega.
Peitai a o faailoa lagona nei o le tamaloa i lona atalii, na faapea atu Peyton i lona tamā, o ni mafaufauga valea ma le manatu faapito nei mafaufauga, auā o ia o lona tamā, ma e faapefea ona fai mai ua fia oti, ae o ai la sona tamā o le a fesoasoani mai ia te ia?
E matuā tele faafitauli i totonu o le aiga o lenei tama talavou ma sa ia iloa, o le ituaiga o olaga lenei o loo tele ina maumau ai ola o nisi o tagata Samoa i totonu o Amerika. Sa ia iloa op le olaga leaga lava lea o loo tuufaasolo mai i tagata uma o le aiga o lona tamā, o ia la lea e laitiiti, e tatau ona ia faia se suiga e ese mai isi uma tagata o le aiga, ina ia momotu ai loa lenei olaga leaga.
E oo foi i isi tagata o lona aiga e pei o lona tuafafine fai, ua fai ma masani le gaoi i faleoloa; o lona uso e matua atu ia te ia, e auai i se kegi leaga ma ua amata foi ona faaaogā fualaau faasāina. O lona tina e lua galuega e faigaluega ai i le taumafaiga e tausi le aiga, o nisi lava taimi ua tolu ni galuega e fai. Ae sili ai lava ona leaga lona tamā lea ua fai ma ona olaga masani le alu i le falepuipui ma toe magalo mai, ma toe alu foi, talu ai lava moliaga o fualaau faasāina,
O le olaga lenei o lea aiga Samoa sa vaavaai pea i ai lenei tama talavou, o tagata uma ua ola i fualaau faasāina, o le ava malosi ma tele ai lava ina vevesi ma misa i aso uma. O le popolega lea o le alii o Peyton, afai e leai sana gaioiga e faia e laveai ai lona aiga, e iu ane foi ua ola ai ma ia i lenei lava olaga leaga. Ona ia filifili ai lea o le a ia faia se suiga mo i latou.
O le faigamalaga lea a Peyton ma lona tamā i le aso na alu ai e sue, na ia matuā faamatala ai i lona tamā lana moemitiga ma mea o loo ia manao e faia i lona olaga, aemaise mo lona aiga.
Sa ia manao ia lelei lana aoga, e fia mafuta lelei i le lotu, ma e naunau foi ia lelei lana taalo i le basketball, ina ia oo i se tulaga e tautaua ai, ma ta‘utaua atu ai ma le igoa o le latou aiga. Ae o lona manaoga na faailoa i lona tamā, e faatoa mafai ona ia maua uma ona moemitiga nei, pe afai e lagolago mai lona tamā ia te ia.
Na matuā ootia le tamaloa i le talanoa a lona atalii. E lei mafaufauina e le tamaloa e talanoa atu faapea lenei alii talavou ia te ia, e pei o se matua o loo talanoa i sona atalii le auala o loo talanoa atu ai lona atalii ia te ia. Ma o inā lava na folafola ai e lenei tamā, o le a ia suia lona olaga, ma o le a galue malosi e fesoasoani atu i lona atalii ina ia ausia ana moemitiga e pei ona moomoo i ai, mo ia ma lona aiga atoa.
O lenei ua toeitiiti atoa le sefulu tausaga talu mai le aso na fofola ai e Peyton lana moemitiga i lona tama, ae ua avea nei le alii Samoa o Peyton Siva, o se tasi o igoa ua iloga o se tama sili ona taalo lelei i se tasi o ‘au basketball sili ona tautaua i totonu.
Ma ua tautaua Peyton i totonu o le latou aai, e le gata i lana taalo, ae o se tama talavou e malosi lona olaga faakerisiano, ma ona uiga lelei.
O le olaga lelei lenei o Peyton ua faapena foi ona atili faalelei atu ai ma amioga a tagata uma o  lona aiga. Na galue malosi le alii o Peyton i sui uma o lona aiga, na ia unaia lona uso matua ia sui lona olaga, ma o le taimi nei, ua alu ese lona uso matua mai kegi sa iai, ae ua toe foi e fai lelei lana aoga ma saili sona faailoga i le tomai tau faimeafale.
Na faigaluega mamafa Peyton ina ia sefe se tupe e totogi ai le toe foi atu o lona tina e faaauau ana aoga i le kolisi mo ni faailoga, e faapena foi i lona tuafafine sa mafai ona toe foi e ave lana mataupu o le faaaogāina o vali e teuteu ai foliga.
O le tamā o Peyton, ua faaauau pea ona tumalosi e fesoasoani i taaloga a lona atalii, ma ua avea foi o se faiaoga lakapi mo nisi talavou, ma faigaluega faavaitaimi i ni faugafale.
O loo faaauau pea ona agaigai i luma le tomai o Peyton i lana taaloga o le basketball, ae faapea foi i le lakapi faa-Amerika. Ua tautaua lenei alii talavou Samoa, ae o le iuga silisili o ana taumafaiga, o le suiga tele ua iai i totonu o lona aiga.
O loo taalo nei Peyton i le tausinioga o taaloga basketball a le NCAA (National Collegiate Athletic Association), le American College/University Basketball competition, o se taamilosaga e faitau miliona tagata i Amerika e matamata ai i vaiaso taitasi. Ua iloga ma tautaua le igoa Siva i totonu o Amerika, ona o le finau o lenei tama taavou e faia liliu le olaga leaga sa iai lona aiga.