Iosua 2:1 “… Ona la o ai lea, ma ulufale atu i le fale o le fafine talitane e igoa ia Raava, ua nonofo ai i laua …”
Ou te lei fetaui lava i se tamaitai e igoa ia Raava. Ou te lē iloa foi se tina e faaigoa sana tama teine ia Raava. Toatele e faaigoa fanau teine ia Eseta, Maria, Tepora, Ruta ma isi igoa mananaia o le Tusi Paia, ae ou te lē iloaina se isi e igoa ia Raava.
A o ai e fia faaigoa sona afafine i se igoa o se fafine paumutu? O ai se tamā e fia valaau sona afafine ia Raava? Silafia foi la le malo o pipo, o tagata fai anana tele, o lona uiga e lē valaau Raava, ae valaau ni igoa matagā toe uigā.
O le mea mālie, e tulaga lelei Raava i totonu o le Feagaiga Fou, e tutusa ma Aperaamo, Noa, Iosefa ma Mose. A ta‘u loa le Eperu e 11, o lona uiga o le tala i siamupini o le faatuatua, ae faavāvā mai ai Raava (11:31) le fafine talitane. E lei ta‘ua o se siamupini ona o lana galuega sa fai, ua ta‘ua ona o lona faatuatua. Tafefe i le Atua ma le maoa‘e o lona alofa.
Ina ua maliu Mose, sa tofia Iosua e faaauau le malaga a le nuu i Kanana. Ae lē se faigamalaga faigofie. E toatele le nuu, a o Luitau sa feagai e faigata.
Sa faalogo tagata Ieriko i le matautia o le Atua o Isaraelu, pei o le faamateina o le sami Ulaula ae savavali le nuu, ma le olopalaina o tupu e toalua o sa Amorī. O tala nei sa inoino ai Ieriko, vaganā le fafine talitane.
O se luitau sa feagai ma Iosua, a fia tuvae i le nuu na folafolaina, ia faatoilalo Ieriko. Ona filifili lea e Iosua alii e toalua e asiasi faalilolilo i le nuu, ma vaavaai pe faapefea na aea le aai. Ua o nei alii ma ulufale i le fale o Raava, auā o le fale lea e o i ai tamaloloa mai i ma o.
Ua talafeagai, e faaitiitia ai le masalosalovale o le nuu, peitai na logo le tupu, ona alu lea o le mānu ia saili i laua. Peitai sa nanā ma faalafi e Raava nei alii, ma lana faamemelo ane, ua liu suavai o matou loto ona o lo outou Atua. O lo outou Atua foi, o le Atua ia o le lagi ma le lalolagi.
E iai atua sa auauna i ai Raava, o atua e faaeaea ma faaviivii i ai tagata Ieriko. Ae sa matuā talitonu le fafine talitane i tala o le Atua o Isaraelu, ma sa faamaonia i lana galuega laveai ina ua nanā sipai ma lana olega, ia agalelei ia te ia ma lona aiga. Sa iloa lelei e Raava ua tuuina atu Ieriko i lima o Isaraelu.
Sa lē manatu i lona tulaga talitane ma le maualalo. Ua faagalo lona nuu, a ua galue ia laveaina tagata o le Atua. O i sa tatala ai e le Atua faamanuiaga mo Raava, ma maua ai le faaolataga e lona aiga. Ua ogatasi le faatuatua ma galuega. E lē gata i le tautinoga, a ua faatino galuega lelei mo le Atua o Isaraelu.
Manatua, e faaolaina tatou i le faatuatua ia Iesu Keriso, ae iloa ma aliali lo tatou faatuatua ona o galuega lelei tatou te fai. Toatele na o le taulagi, ae aunoa ma se fesoasoani i se isi o mafatia.
Ua fai si tetelē o lauga, ae laitiiti pe augapiu se faatinoga. Ua masau le lauga, ae gaogaoiī ma se alofa. Sa alu le isi alii i lana faifeau ma fai i ai o ia e fia avea ma failauga.
Sa fai i ai le faifeau, e lē fia faalogo i sana lauga, ae fia vaai i sana lauga. E lē se lauga o upu ma le savili, ae ia fua muamua ni galuega lelei e iloa ai lona faatuatua.
O le masina lenei o le auaunaga mo isi e ala i le Servolution. O se galuega e lē totogia, ae fai ona ua talitonu i le alofa o le Atua i tagata.
E tele atunuu o le lalolagi o loo galulue faatasi i lea faamoemoe, ae ou te talanoa atu i isi tagata ma ekalesia, ae sau le fesili, e fia se tupe e maua mai nei mea? O le tali, e lē totogia. O le faatinoina o le faatuatua.
O se isi fesili e masani ai, aisea tatou te o ai fua e fai, o loo iai tagata faigaluega e faia galuega? O le tali, e ese lava mea o le malo o le Atua, ese mea o le malo faalelalolagi. A fia muamua, ia mulimuli. A fia maualuga, ia faamaualalo. A fia maumea, foai, a fia sili, fai ma auauna. A fia vaai i le Atua, ia liua pei o tamaiti.
E matautia le alofa o le Atua ma le ta‘u o Raava o le tina faatuatua. Aisea? Auā na ona faalogo lava o Raava i tala aave mai, talitonu loa o le Atua moni lea. Talofa e, tele taimi tatou te faalogo ai i lauga, tatou te vaaia vavega, ae faigata ona talitonu i le Atua. Tatou te alalaga, ia savavali i le faatuatua, ae alu se taimi o tau faaoleole ma tauanau, ia galulue mo le Atua.
O Raava, e lei manuia lona amataga, ae sa faamanuia e le Atua lona taunuuga. Raava lea sa fanaua Poasa le alii milionea. Sa manuia Poasa ona o le faatuatua o lona tina.
O le atalii o Poasa Opeta, Opeta le tamā o Iese, lea sa fanaua Tavita le tupu tautaua o Isaraelu. Le tupu lea a faalagi faalupega o Iesu ona faapea lea, o le Alo o Tavita, ae sa faaui ane i galuega laveai a le fafine talitane.
E amanaia e le Atua galuega, o le faatinoga o lou faatuatua. Fai mai Iakopo, a leai ni galuega, e mate le faatuatua. Soifua.
