Lavea taavale a le fuimu, lē talia le finau e totogi e se tamalii faipisinisi

O se tasi o taavale a le pulega o le Fuimu ma galuega laveai i taimi o faalavelave faafuasei, na aafia i se faalavelave tau taavale a o natinati atu i se valaau o ni suauu oona sa maua i le lotoā sa iai le fale suauu popo i Vaitele-tai.

O se tasi o alii ofisa o le pulega le susuga Kirkpatrick Ioapo, sa ia aveina le taavale sa malaga ai ma le tamaitai ofisa o le pulega o faalavelave faafuasei i le Disaster Management office, o Filomena Nelson. O le masina o Iulai o le tausaga e 2008 na natinati atu ai le tamaitai ofisa i se valaau o se vailaau oona i le lotoā sa iai le falesuauu popo.

O le faatelevave atu o le taavale a le vaega o le fuimu o se pikiapu Hilux sa aafia ai i se faalavelave ina ua so‘a e le loli Dyna o se taavale a se tasi o tamalii faipisinisi le susuga Gerwin Keil.

O le mafuaaga lea o le tuuina atu e le pulega o le fuimu ma faalavelave faafuasei o se tagi i le faamasinoga na finauina ai le totogi e le faipisinisi o le tau o mea na faaleagaina o le taavale a le Malo, ona sa finau le avetaavale ma le tamaitai ofisa o le sese o le taavale a Gerwin Keil na mafua ai ona tupu le faaletonu.

O faamaumauga a le faamasinoga i le mataupu o loo faaalia ai, na tupu le faalavelave a o agai le taavale a le fuimu e aumai le pailate i le lotoā a le kamupani o le Yasaki e tuu ai i luga le kalone vailaau ua liki ma tafe i fafo le vailaau sa iai.

O le aofaiga o le tupe sa finauina e totogi atu mo le lavea o le taavale ma le tau o mea na faaleagaina e $11,014. 90 sene tala.

E$9,514.90 sene mo le toe faaleleia o mea na leaga o le taavale, ae $1,500 mo le aotelega o mea na faaleagaina poo general damages.

E suesueina le tagi a le pulega o fuimu ma faalavelave faafuasei, ua lē toe galue le ave taavale o Kirkpatrick Ioapo i le pulega o le fuimu, ona ua malaga i atunuu i fafo.

Ua na o le tamaitai ofisa sinia o le vaega o le Disaster Management office a le Matagaluega o Puna‘oa Faalenatura ma le siosiomaga sa tuuina atu lana molimau e lagolago ai le finauga a le itu tagi.

A o nanati ane le taavale a le fuimu ma le pailate e tuu ai i luga le kalone vailaau, ina ua faaaogā ane se tasi o magaala i Vaitele e lē pisi, ae tupu ai loa le faalavelave ina ua taia i le vaega pito i tua o le loli a lē na faasaga i ai le tagi.

E malosi le molimau a le tamaitai ofisa o Filomena, e lei ola le moli faailoilo le indicator a le taavale a Gerwin e afe ai i le itu agavale, le mafuaaga o le soso‘a o le pito i tua e le taavale a le fuimu.

Peitai sa tetee i ai lē na faasaga i ai le tagi ona o lana faamatalaga, na te lei vaaia ni moli faailoilo o le pikiapu a le fuimu o emoemo poo se leo foi o se sailini na ee. Na ia faato‘ā iloa lava le mea ua tupu ina ua pa‘ō le pito i tua o lana loli Dyna ua soso‘a e le pikiapu a le fuimu.

O le molimau a le tamaitai ofisa sa lagolagoina i ni molimau tusitusia mai Komesina o le pulega o le tineimu ma galuega laveai i taimi o faalavelave faafuasei, peitai o le ave taavale o Kirkpatrick Ioapo, e lei mafai ona auai i le faamasinoga ona ua malaga ese ma le atunuu.

O lana molimau ma le faamatalaga tusitusia sa finauina e le itu tagi ina ia avea lea ma molimau i le mataupu, ae o le mae‘a ona iloiloina o le talosaga na teena ai ma lē talia.

E iai vaega o le molimau tusitusia a le tamaitai ofisa sa feteenai ma lana molimau tuu fofoga, ma o se isi lea itu sa silasila i ai le faamasinoga i le faia o lana faaiuga.

Ua teena ma faaleaogāina le tagi a le pulega o le fuimu ona ua lē mafai ona faamaonia e molimau na tuuina atu, le iai o se lape poo se sese o lē na faasaga i ai le tagi. O lona uiga ua totogi lava e le pulega o le fuimu le toe faaleleia o le taavale na aafia i le faalavelave.