O le aoga maualuga lenei a le Ekalesia Katoliko e tau leai ni tamaiti Pasefika e iai. Ua luasefuluono tausaga talu ona faavae ma e i lalo o le puleaga a Wollongong. O le aufaipese poo le school choir na amataina i le 2007, auā tauvaga e pei o le Eistedfods, o misasa, ma soo se faamoemoe o le aoga e pei o laugatogi ma aso fiafia.
E 30 tamaiti o loo auai i le aufaipese i le taimi nei ma o loo aofia ai ni alo se toafā o le atunuu. O i latou nei o Masina Unasa, Melanie Tietie, Edwin Tuigamala ma Xavier Titie.
O se mitamitaga o le agaga ona o loo faauluulu lenei aufaipese i se alo o le atunuu o loo faiaoga ai foi i lenei kolisi. O se metotia maualuga ua ia ausia ona e seāseā maua ni tamafanau ua ofi atu ni a latou taumafaiga i lea foi matata fita, aemaise o se aoga a se lotu.
O le Susuga ia Laurence Malaesilia e 31 tausaga o lona soifua, sa a‘oa‘oina i le Iunivesite i Aukilani. O ona tuaa e mai afioaga o Vaiee ma Fagamalo. Ua sefulu tausaga talu ona faauu faafaiaoga, ae ua 4½ tausaga talu ona galue i MtCarmel.
E atoa le vaiaso o faagasolo le Music Festival i Rotorua Niu Sila, lea na avea ai Mt Carmel Catholic High ma sui o aoga mai New South Wales. E (2) lua aoga mai Perth, ma le (2) lua mai Victoria na autovaa uma atu mo lenei faamoemoe. E (8) aoga mai Niu Sila na filifilia mo lenei festival, ona maua ai lea o le (13) le aofai aoao.
E (4) fā pese na tuufaatasia e le susuga ia Laurence mo lenei faamoemoe. O le “My Life, my love, my all”, “Ave Maria”, o le usiuna faa-Maori o le “Now is the Hour”, ma le pese ua teufatu i le toatele o le atunuu, “Lota Nuu Moni”.
Na faamanuiaina MtCarmel ma le latou tauasa mamao atu i le Bronze poo le tulaga tolu. O lona uiga e fai o le matuā siufofoga lelei o le aufaipese, ae matuā talenia lava o le susuga i le faiaoga Samoa le alii o Laurence.
E pei ona ta‘ua e Laurence, ana lē aunoa le lagolagosua a le alii pule o Andrew Coman, Woolworths Eaglevale, le Pule Aoga, o vasega o faiaoga aemaise mātua, e lē mafai ona tino mai lenei moemitiga.
Amuia nei alo o le atunuu, o loo saili malo ma faaeaea i le suafa pele o Samoa. Malo lava le galue punouai!
