E pei ona sa lipotia i la tatou pepa i nai tausaga ua tuanai atu, le tatalaina ma faalauiloa le tautua lenei a le faletua ia Pei Taulapapa ma nisi o tamalii, ona faaauau mai ai pea lea o fesootaiga e pei ona lipotia foi la latou savali faaaloalo e fai ma avefu‘a a Samoa i le savali o le ANZAC a le pitonuu o Werribee i nai masina ua tuanai, ma o loo faaauau pea la latou tautua fesoasoani mo soo se tagata aemaise lava le Pasefika ma Samoa.
O nai vaiaso na tuanai atu na faataunuu ai le tolauapiga (camp) a le Doors of Opportunity i le Don Bosco Camp i le Tolotolo o le Penisula (Mornington Peninsula) i le aai o Melepone. E selau ma le ono 106 tagata aofai na malaga, ae na mafai ona faatupeina e le faalapotopotoga ia latou sailiga seleni sa faia mo sina vaitaimi.
Faaalia e le faletua ia Pei, na filifilia le Don Bosco ona o le fetaui lelei ma manaoga o aiga ma tagata uma, aemaise lava o le malupuipuia, faatasi ma le manaia o ona malae taalo ma ona atufalega mo fuafuaga faapenei.
O nisi o polokalame na maitauina le faatāuaina o fagotaga (fishing) a tamā ma o latou atalii, o le a‘oa‘oina o le lalaga (weaving) a tina ma alo tamaitai, i le gaseseina o taumafa na faataitai ai le faiga o le umu e tamā ia latou fanau tama, ae o le faiga o pai ma panipopo (baking) e tina ma fanau teine.
Felanulanuai ma fefiloi taaloga na fiafia faatasi ai le faatasiga uma, aemaise lava o alo ma fanau. O Fiafia ma le Taumafataga tele faa-Pasefika (Island Nite n Feast) na faaiuina ai le aso o taaloga, ae faaavanoa le aso mulimuli mo savalivaliga ma faamasani atili aemaise lava o mātua ma tagata matutua.
O se taimi tāua ma le aogā tele e fau ai mafutaga a mātua ma fanau, ona o le soifuaga i nei atunuu, e faigaluega i aso e fitu, faaleai ni taimi faaleaiga o maua. O le toatele ua amata nei ona toe fuafua mo le isi tolauapiga.
