O le vaetamaina o fanau o se gaioiga e faia faaletulafono ma ua silafia e i latou sa aafia i ni vaetamaga lea tulaga. O pepa e faatino e loia ma le ofisa o faamasinoga e faataunuuina i auala manino ma malamalama e aunoa ma le faia i ai o ni auala faaalatua poo nisi faiga e soli ai le tulafono faasino i le vaetamaina o tagata poo le adoption.
O suesuega na faia e le tusitala na oo mai ai se faamaumauga o se vaetamaga ua faaalia ai e se molimau faatuatuaina, o se faamaumauga ua faamalosi ona saini ai le suafa o se faamasino o le faamasinoga a le atunuu.
Sa sailiili pea lenei mataupu ma tuuina mai ai se faamaumauga a le faamasinoga o loo iai le saini a lea faamasino ma iloa ai, e matuā eseese mamao lana saini o loo iai, ma le saini ua tuuina i le pepa o faamaumauga o le vaetama o loo tuua‘ia na faia e se tagata faigaluega o le ofisa o faamasinoga.
O le a lē faailoaina le suafa o lea tagata faigaluega ona o loo faaauau pea sailiiliga i le fia fesiligia o lē o loo tuua‘ia na faia le saini a le faamasino.
Peitai na maua se avanoa faasamasamanoa o le tusitala e talanoa atu i le faamasino e ana le saini. Na lulu lona ao ma lona lē talitonu e tupu se mea faapea mai totonu o le ofisa o loo galue ai. O lona lē fiafia foi na iloa vave ina ua faailoa i ai e le tusitala ua ia (tusitala) umia se kopi o le faamaumauga o le pepa o le vaetama o loo tuua‘ia na saini faamalosi ai e se tagata lona suafa.
Sa faia se suesuega talu ai nei a le komisi e pulea tagata faigaluega a le Malo i ni tuua‘iga faasaga i le faauluuluga o le matagaluega o faamasinoga, ma ua maua e le tusitala se molimau faatuatuaina e lei aofia i lea suesuega ni tuua‘iga o ni gaioiga faasolitulafono poo criminal allegation.
Sa agai le suesuega i mataupu mai nisi o le atunuu sa tuua‘ia ai le faatinoga o tiute o le faauluuluga, lea ua toe galue ina ua mae‘a ona faia le sailiiliga a le komisi e pulea tagata faigaluega a le Malo le PSC poo le Public Service Commission.
O loo iai se isi molimau e lei faamaonia ua ta‘ua ai, o le faalua lea ona tupu o lea gaioiga, lea sa maua ua saini faamalosi e se tagata ofisa le suafa o se tasi o faamasino i se pepa foi o faamaumauga o le vaetamaina o tagata.
O le molimau lea e faapea sa aami se tagata faigaluega na tuua‘ia, ma faia ai se faatoesega i le faamasino na aafia lona mamalu i le saini faamalosi o lona suafa i pepa o faamaumauga. O le a tuliloaina pea lenei mataupu ina ia mafai ona maua mai se faamatalaga mai le pulega o le matagaluega faapea ma le komisi e pulea tagata faigaluega a le Malo.
